Saut ari Bup Kudus

 Ba ajar Jesus atas bukit iya bisi madah, “rinduka munsuh kita.” (Matthew 5:44; Luke 6:27, 35) Reti jaku Jesus ditu, kitai patut rinduka orang ke begedika kitai tauka ke ngelayan kitai enggau enda adil.

 Jesus mandangka pengerindu ngagai bala munsuh iya, enggau chara ngampunka orang ke jai ngagai iya. (Luke 23:33, 34) Ajar iya ke bekaul enggau rinduka bala munsuh sejalai enggau utai ke disebut ba Bup Kudus jaku Hebrew, kesuah agi dikumbai Sempekat Lama.—Pemansut 23:4, 5; Jaku-Dalam 24:17; 25:21.

 “Anang ngetu rinduka munsuh kita, lalu besampika sida ke merinsaka kita.”—Matthew 5:43, 44.

Dalam artikel tu

•  Nama kebuah patut rinduka bala munsuh nuan?

•  Baka ni chara nuan ulih rinduka munsuh nuan?

•  Kati nuan patut beperang ngelaban munsuh nuan?

•  Salah penemu pasal rinduka munsuh nuan

•  Ayat Bup Kudus ke meransang nuan rinduka munsuh

 Nama kebuah patut rinduka bala munsuh nuan?

•   Petara ngayanka teladan. Petara “manah ati indah ngagai orang ke enda beterima kasih sereta ngagai orang ke jai.” (Luke 6:35) Iya mega “ngasuh mata panas manchar ngagai orang ke jai.”—Matthew 5:45.

•   Pengerindu engka ulih ngasuh bala munsuh berubah. Ajar Bup Kudus meransang kitai ngelayan bala munsuh enggau manah. “Enggau nya, kita ulih ngelembutka ati iya.” (Rome 12:20) Jaku sempama tu nunjukka proses ngangatka batu, nyentukka batu nya ulih ngasilka besi ti berega. Sama mega, enti kitai manah ati ngagai orang ke begedika kitai, kitai ulih ‘ngelembutka’ pengeringat lalu mansutka pemanah ke bisi dalam sida.

 Baka ni chara nuan ulih rinduka munsuh nuan?

•   ‘Kereja utai ti manah ngagai sida ke begedika nuan.’ (Luke 6:27) Munyi ku ajar Bup Kudus, “Enti munsuh kita lapar, beri iya makai. Enti iya aus, beri iya ai irup.” (Rome 12:20) Nuan mega ulih tetemuka chara bukai ngayanka pengerindu ngagai bala munsuh. Chunto iya, nuan ulih nitihka jaku ajar Jesus ti tebilang ke madahka, “Kereja ngagai orang baka ke dikedekaka kita kereja orang ngagai kita.”—Luke 6:31.

•   “Sebut utai ti manah pasal sida ke nyumpah kita.” (Luke 6:28) Kitai tetap nyebut utai ti manah pasal bala munsuh kitai. Chunto iya, kitai nelap enggau sida sereta berundingka sida, taja pan sida nyebut utai ti enda manah pasal kitai. Nitihka ajar Bup Kudus, “Anang malas penyai ngena penyai, . . . Tang balas meh ngena jaku ti manah.” (1 Peter 3:9) Lalau tu nulung kitai muai ati ti begedi.

•   “Besampi meh ke sida ke ngeleseka kita.” (Luke 6:28) Enti bisi orang ngeleseka nuan, anang meh “malas penyai ngena penyai.” (Rome 12:17) Minta meh Petara ngampunka orang nya. (Luke 23:34; Surat Kereja Rasul 7:59, 60) Ari ke bebalas, serahka meh pekara tu ngagai Petara, ngambika Petara empu ngakim orang nya nitihka standard Iya.—Adat Lewi 19:18; Rome 12:19.

 “Anang ngetu rinduka munsuh kita, kereja utai ti manah ngagai sida ke begedika kita, sebut utai ti manah pasal sida ke nyumpah kita, sereta besampi meh ke sida ke ngeleseka kita.”—Luke 6:27, 28.

•   “Sabar sereta manah ati.” (1 Korint 13:4) Rasul Paul ngena siti leka jaku ti tebilang, kena nerangka reti pengerindu ari jaku Gerika iya nya a·gaʹpe, ke ulih ditemu kitai ba Matthew 5:44 enggau Luke 6:27, 35. Kitai ulih ngayanka pengerindu tu ngagai bala munsuh kitai enggau chara sabar, manah ati, enda chemburu, enda sumbung, tauka enda kasar.

 “Orang ke bisi pengerindu nya orang ti sabar sereta manah ati. Iya enda chemburu, enda bejaku begah, enda sumbung, enda jai adat, enda ngenuluka diri empu, sereta enda jampat ringat. Iya mega enda bedendam lebuh orang ngemediska ati iya. Iya enda gaga ati enggau utai ti enda lurus, tang iya gaga ati enggau utai ti bendar. Iya ngenatka semua utai, pechayaka semua utai, seruran andal nganti utai ke dikearapka, sereta tan napi semua utai. Pengerindu enda nemu abis.”—1 Korint 13:4-8.

 Kati nuan patut beperang ngelaban munsuh nuan?

 Enda. Jesus ngajar bala murid iya, sida enda patut belaban enggau bala munsuh sida. Chunto iya, lebuh iya nangkan sida pasal Jerusalem ke deka diserang, iya nadai ngasuh sida betan dia lalu belaban. Tang iya ngasuh sida ngerarika diri. (Luke 21:20, 21) Jesus mega ngasuh Peter, “Selitka pedang nuan. Semua orang ke ngena pedang deka mati laban pedang.” (Matthew 26:52) Bup Kudus sereta sejarah nunjukka, bala murid Jesus ba abad keterubah enda beperang ngelaban munsuh sida. a—2 Timoti 2:24.

 Salah penemu pasal rinduka munsuh nuan

 Salah penemu: Adat Petara dekaka orang Israel begedika munsuh sida.

 Salah penemu: Rinduka munsuh nuan, reti iya nerima ulah sida ti salah.

 Iya ke amat: Ajar Bup Kudus nunjukka, nuan ulih rinduka sesiku orang tang ukai reti iya nuan ulih nerima ulah iya ti salah. Chunto iya, Jesus enda rinduka keganasan, tang iya besampika orang ke munuh iya. (Luke 23:34) Nambahka nya, iya mega begedika utai ti enda lurus tauka dosa, tang iya sanggup nebus orang ke bedosa.—John 3:16; Rome 6:23.