Au. Bisi empat iti prinsip Bup Kudus ke ulih nulung nuan mutarka penanggul duit enggau utang:

1.   Atur belanja nuan. “Bejimat lebuh nuan ngaga pelan, nya baru nuan deka bulih mayuh utai. Enti nuan kelalu beguai-guai ngereja utai, nuan nadai kala chukup utai.” (Jaku Dalam 21:5) Anang berumban meli sesiti utai taja pan nya enda mar. Atur meh belanja nuan, lalu titihka atur nya.

2.   Anang berutang. “Enti nuan nginjau duit, nuan nyadi ulun orang ke nyali nuan duit nya.” (Jaku Dalam 22:7) Enti nuan enda ulih mayar utang, berandau meh enggau orang ke endur nuan berutang, ngambika seduai ulih ngatur chara mayar ti senang agi ba nuan. Titihka lalau Bup Kudus tu, ‘Mansang nuan enggau jampat ngagai orang nya lalu minta iya ngelepaska nuan. Anang tinduk, tauka ngetu lalu belelak.’ (Jaku Dalam 6:1-5) Amat, anang meh jampat ngalahka diri. Enti utai ke dipinta nuan enda diterima, terus meh minta.

3.   Ngembuan runding ti betul pasal duit. “Orang ke semina berundingka diri empu aja beguai-guai deka nyadi kaya datai ke sida nyau enda nemu diri deka ditinggang penyeranta.” (Jaku Dalam 28:22) Asai ati ti chemburu sereta amu deka ngenataika penanggul ba duit, lalu ngelimpangka seseiku orang ari pengarap.

4.   Puas. “Enti kitai bisi pemakai enggau gari, kitai patut nemu puas ati ke nya.” (1 Timoti 6:8) Duit enda ulih meli pengelantang sereta pemuas dalam pengidup. Orang ke pemadu lantang ba dunya, ukai orang ke kaya. Sida ulih lantang ketegal bisi penyayau ari diri sebilik, bala kaban, kelebih agi bisi kaul ti rapat enggau Petara.—Jaku Dalam 15:17; 1 Peter 5:6, 7.