Samuel mengkang tetap ati ngagai Jehovah sepemanjai pengidup iya. Taja pan iya agi biak, iya enggai ngereja penyai baka dua iku anak Eli ke benama Hopni enggau Pinehas. (1Sa 2:22-26) Samuel mansang besai, lalu Jehovah meruan enggau iya. (1Sa 3:19) Lebuh Samuel nyau tuai, iya mengkang nyembah Jehovah enggau tetap ati, taja pan bala anak iya enda nitihka teladan iya.—1Sa 8:1-5.

Nama utai ti ulih dipelajarka kitai ari teladan Samuel? Enti nuan nya orang ke biak, pechaya meh Jehovah meretika penanggul sereta asai ati nuan. Jehovah ulih nulung nuan mengkang berani. (Isa 41:10, 13) Enti anak nuan udah ngetu nyembah Jehovah, kingatka, Samuel mega enda ulih ngansak dua iku anak lelaki iya ke udah besai mengkang taluk ngagai standard Jehovah. Samuel nyerahka pekara nya ngagai Jehovah, lalu mengkang taluk sereta ngelantangka ati Jehovah. Teladan nuan engka ulih meransang bala anak nuan pulai baru ngagai Jehovah.

PEDA VIDEO BELAJAR ARI SIDA—SAMUEL, LALU SAUT TANYA TU:

• Baka ni Samuel nunjukka pemerani lebuh iya agi biak?

• Baka ni Danny nunjukka pemerani?

• Baka ni Samuel nyadi teladan ti manah maya iya udah tuai?

• Baka ni apai indai Danny nyadi teladan ti manah?