Ngingatka Hari Pemati Jesus nya siti peluang ti manah endur kitai ngambarka berekat ke jemah ila, ke ulih nyadi ketegal bisi tebus, chunto iya pengangkat ari mati. Jehovah nadai kala dekaka mensia mati. Nya kebuah, siti ari utai ke pemadu ngenusahka ati kitai, lebuh orang ke dikesayauka kitai mati. (1 Kor. 15:26) Jesus balat tusah ati lebuh meda pemerinsa bala murid iya maya Lasarus mati. (Jhn. 11:33-35) Ketegal Jesus ngayanka pemanah Apai iya enggau sempurna, kitai nemu Jehovah mega tusah ati meda pemerinsa kitai lebuh orang ke dikesayauka kitai mati. (Jhn. 14:7) Jehovah keran nganti maya Iya ngidupka nembiak Iya baru, lalu kitai mega sama baka Iya.—Jop 14:14, 15.

Laban Jehovah ukai Petara ti ngasuh utai charut, nya alai kitai nemu pengangkat ari mati deka dikereja enggau teratur. (1 Kor. 14:33, 40) Maya nya ukai jam endur nguburka orang, tang maya endur nyambut penatai orang ke udah diidupka baru. Kati nuan bisi belematika pengangkat ari mati, kelebih agi maya orang ke dikesayauka mati? (2 Kor. 4:17, 18) Bisi kitai beterima kasih ngagai Jehovah laban udah nyediaka tebus sereta meri ayat Bup Kudus ke nunjukka orang ke udah mati deka idup baru?—Kol. 3:15.

• Sapa bala kawan sereta kaban belayan ke deka ditemu nuan baru?

• Sapa orang ba Bup Kudus ke deka ditemu sereta dibai nuan berandau?