Satu Korint 3:1-23
3 Nya alai, bala menyadi, aku enda ulih bejaku ngagai kita baka ke bejaku enggau orang ke nitihka iring kuasa kudus Petara. Tang aku bejaku ngagai kita baka ke bejaku enggau orang ke nitihka pengingin diri empu, tauka baka ke bejaku enggau anak ke agi mit ba jalai Kristus.
2 Aku meri kita ai tusu, ukai pemakai ti kering, laban kita bedau chukup tegap. Indah diatu pan kita agi bedau chukup tegap,
3 laban kita agi nitihka runding dunya. Enti kita chemburu lalu belaya enggau pangan diri, endaka nya nunjukka kita agi nitihka runding dunya sereta ngayanka ulah baka orang ba dunya tu?
4 Siku madahka, “Aku nitihka Paul,” tang siku da agi madahka, “Aku nitihka Apollos.” Endaka ulah kita sebaka enggau orang ba dunya tu?
5 Kebendar iya, sapa Apollos? Sapa Paul? Kami semina ulun ke ngereja pengawa ari Tuan kitai. Kami semina nulung kita nyadi orang ke arap.
6 Aku nanam, Apollos manjah, tang Petara ke ngasuh utai nya majak tumbuh.
7 Nya alai, iya ke beguna* agi nya Petara ke ngasuh utai nya tumbuh, ukai orang ke nanam tauka orang ke manjah.
8 Orang ke nanam enggau orang ke manjah bisi tuju ti sama. Tang tiap iku orang deka nerima upah nitihka pengawa ke dikereja siku-siku.
9 Kami gawa begulai enggau Petara. Kita nya ladang Petara ke benung diintu Iya enggau rumah ke digaga Petara.
10 Ketegal pemanah ati Petara ti besai ke diberi ngagai aku, aku nyadi baka tukang ke landik ngaga rumah.* Aku udah nudukka pugu. Tang orang bukai ke ngaga rumah ba atas pugu nya. Nya alai, awakka tiap iku orang terus beratika baka ni chara iya ngaga rumah ba atas pugu nya.
11 Nadai orang ke ulih nudukka pugu bukai kena nganti pugu ke udah bisi, iya nya Jesus Kristus.
12 Bisi orang ngena emas, pirak, batu ti berega, kayu, tauka rumput ti rangkai, kena ngaga rumah ba atas pugu nya.
13 Tang bisi maya iya ila, pengawa ke udah digaga tiap iku orang deka diuji ngena api, lalu api nya deka nunjukka baka ni gaya pengawa ke digaga sida.
14 Enti utai ke digaga ba atas pugu nya enda angus, orang nya deka nerima upah.
15 Tang enti utai nya angus, iya deka rugi. Taja pan iya empu deka selamat, tang iya deka nyadi baka orang ke udah selamat ari penusah angus.
16 Endaka kita nemu, kita nya Rumah Sembiang Petara, lalu kuasa kudus Petara diau dalam kita?
17 Enti orang ngerubuhka Rumah Sembiang Petara, Petara deka ngemunaska orang nya, laban Rumah Sembiang nya kudus, lalu kita nya meh Rumah Sembiang Petara.
18 Anang nipu diri: Enti bisi ari bala kita ngumbai diri bepenemu-dalam ba dunya* tu, awakka orang nya nyadi beli ngambika iya nyadi amat-amat bepenemu-dalam.
19 Ba Petara, penemu-dalam ba dunya tu utai ti beli, laban baka ke udah ditulis: “Petara ngasuh orang ke bepenemu-dalam kena sintak panjuk diri empu.”
20 Kelimpah ari nya, Bup Kudus mega madahka: “Jehovah nemu runding orang ke bepenemu-dalam nya lebu ngapa.”
21 Nya alai, anang temegahka mensia laban semua utai enggi kita magang.
22 Paul, Apollos, Kefas,* dunya tu, pengidup, pemati, utai ke bisi diatu tauka utai ke deka datai, semua nya enggi kita magang.
23 Lalu kita enggi Kristus, lalu Kristus enggi Petara.
Nota Kaki
^ Tauka “penting.”
^ Tauka “ketuai ke pintar ngatur pengawa.”
^ Tauka “jeman; sistem dunya.” Peda Penerang Leka Jaku, “Sistem dunya.”
^ Mega dikumbai Peter.
