1 Raja 13:1-34
13 Ari asuh Jehovah, siku nembiak Petara ari Judah mupuk ngagai Bethel. Maya nya, Jeroboam benung bediri semak alta sambil nyerahka pemeri nyentukka asap niki ke atas.
2 Baka ke diasuh Jehovah, nembiak Petara nya bejaku pasal alta nya. Ku iya: “Alta, alta! Tu utai ke dipadah Jehovah: ‘Siku anak lelaki ke benama Josiah deka ada ba ruang bilik David. Ba atas nuan, iya deka munuh bala imam ke bekereja ba endur alai orang nyembah petara pelesu,* ke nyerahka pemeri nyentukka asap niki ke atas. Iya mega deka nunu tulang mensia ba atas nuan.’”
3 Ba hari nya, nembiak Petara nya meri siti tanda lalu madah: “Tu meh tanda ari Jehovah. Peda! Alta nya deka belah lalu amau* ba atas alta nya deka ngachir.”
4 Lebuh Raja Jeroboam ninga utai ke disebut nembiak Petara ti bendar nya pasal alta ba Bethel, iya nguingka jari iya ari alta lalu nunjukka jari iya ngagai lelaki nya. Ku iya madah: “Tangkap iya!” Tekala nya, jari Jeroboam tengkering nyentukka jari iya enda ulih engkebut.
5 Udah nya, alta nya tebelah lalu amau ba atas alta nya ngachir ba tanah. Semua nya nyadi sama baka tanda ke diberi Jehovah nengah nembiak Petara ti bendar nya.
6 Raja lalu bejaku ngagai nembiak Petara ti bendar nya: “Besampi meh ngagai Jehovah, Petara nuan, lalu minta Iya ngeraika jari aku.” Nya alai, nembiak Petara ti bendar nya besampi minta kasih ari Jehovah, lalu jari raja pan gerai.
7 Raja bejaku ngagai nembiak Petara nya: “Aram makai ba rumah aku, aku deka meri nuan hadiah.”
8 Tang, nembiak Petara nya madah ngagai raja: “Enti sema tuan meri aku setengah ari istana tuan, enggai meh aku enggau tuan makai ngirup ba endur tu,
9 laban Jehovah udah mesan aku: ‘Anang makai tauka ngirup, lalu anang pulai nengah jalai nuan mansang.’”
10 Nya alai, iya pan pulai nengah jalai bukai, ukai nengah jalai iya mansang ngagai Bethel.
11 Bisi siku nabi ke tuai diau ba Bethel. Lebuh bala anak lelaki iya pulai, sida lalu nusui semua utai ke udah nyadi ba Bethel ba hari nya. Sida nusui semua utai ke digaga nembiak Petara ti bendar nya sereta utai ke disebut iya ngagai raja. Pengudah sida nusui semua utai nya ngagai apai sida,
12 apai sida lalu nanya: “Ni jalai ke ditengah iya?” Bala anak iya pan nunjukka jalai ke ditengah nembiak Petara ti bendar ari Judah nya.
13 Nya alai, iya madah ngagai bala anak iya: “Sediaka keledai ke aku.” Pengudah sida nyediaka keledai, apai sida pan nepan keledai nya.
14 Nabi nya nitihka nembiak Petara nya, lalu tetemuka iya benung duduk ba baruh pun kayu ti besai. Nabi nya lalu nanya: “Kati nuan tu nembiak Petara ti bendar ari Judah?” Ku nembiak Petara nya nyaut: “Au.”
15 Ku nabi nya madah: “Aram makai ba rumah aku.”
16 Tang, ku nembiak Petara nya nyaut: “Aku enda ulih pulai enggau nuan tauka datai ngagai rumah nuan. Aku mega enda ulih makai tauka ngirup enggau nuan ba endur tu,
17 laban Jehovah enda ngasuh aku makai ngirup ba endur tu, lalu aku enda tau pulai nengah jalai aku mansang.”
18 Nabi nya madah: “Aku pan nabi baka nuan. Melikat Jehovah udah ngenataika pesan Iya ngagai aku: ‘Bai iya pulai enggau nuan ngambika iya ulih makai ngirup ba rumah nuan.’” Tang kebendar iya, nabi nya ngemulaka nembiak Petara nya.
19 Nya alai, nembiak Petara nya pulai enggau iya, lalu makai ngirup ba rumah iya.
20 Lebuh seduai iya benung makai, Jehovah madahka pesan Iya ngagai nabi ke tuai nya.
21 Ku nabi ke tuai nya madah ngagai nembiak Petara ti bendar ari Judah nya: “Tu meh utai ke dipadah Jehovah: ‘Nuan enda ngasika pesan Jehovah sereta enda nitihka atur ke diberi Jehovah, Petara nuan.
22 Nuan udah pulai ngagai endur tu, lalu makai ngirup taja pan nuan udah ditangkan: “Anang makai tauka ngirup.” Nya alai, bangkai nuan enda dikuburka ba kubur aki ini nuan.’”
23 Pengudah nembiak Petara ti bendar nya makai ngirup, nabi ke tuai nya nyediaka keledai ke nembiak Petara nya.
24 Udah nya, nembiak Petara nya pan mupuk. Tang, siku singa nyerang iya lalu munuh iya ba rantau jalai. Bangkai iya gegaring ba jalai, lalu keledai enggau singa nya bediri ngimbai bangkai iya.
25 Sekeda orang ke nengah jalai nya bisi meda bangkai nya gegaring ba jalai, lalu siku singa bediri ngimbai bangkai nya. Sida ngagai kuta alai nabi ke tuai nya diau, lalu nusui pasal utai nya.
26 Lebuh nabi ke tuai nya ninga pasal nya, iya lalu madah: “Iya meh nembiak Petara ti bendar ke enda ngasika pesan Jehovah. Nya kebuah Jehovah nejuka iya diserang lalu dibunuh siku singa, baka ke udah dipadah Jehovah ngagai iya empu.”
27 Udah nya, iya madah ngagai bala anak lelaki iya: “Sediaka keledai ke aku.” Nya alai, sida pan ngereja nya.
28 Iya pan mupuk lalu tetemuka bangkai nya gegaring ba jalai. Siku keledai enggau siku singa bediri ngimbai bangkai nya. Singa nya enda makai bangkai nya tauka nyerang keledai nya.
29 Iya nanggung bangkai nya lalu manggaika bangkai nya ba atas keledai. Udah nya, iya mai bangkai nya pulai ngagai kuta, lalu tusah ati ke pemati nembiak Petara nya. Udah nya, iya nguburka bangkai nya.
30 Iya nguburka bangkai nya dalam lubang kubur iya empu. Bala orang nyabakka iya lalu madah: “Kasih amat menyadi aku!”
31 Pengudah nguburka bangkai nya, iya madah ngagai bala anak lelaki iya: “Pengudah aku mati, kuburka aku ba endur ke sama enggau nembiak Petara ti bendar nya. Engkahka tulang aku ngimbai tulang iya.
32 Pesan Jehovah ke dipadahka nengah iya pasal alta ba Bethel enggau pasal semua kuil ba endur alai orang nyembah petara pelesu ba kuta-kuta Samaria, tentu deka dikeamatka magang.”
33 Taja pan utai nya nyadi, tang Jeroboam agi enggai ngelengkaka pengawa iya ti jai. Iya majak ngelantik orang biasa gawa nyadi imam ba endur alai orang nyembah petara pelesu. Ku iya madah: “Awakka iya nyadi imam gawa ba endur alai orang nyembah petara pelesu.” Raja ngelantik sapa-sapa ke deka nyadi imam.
34 Pengawa nya ngasuh ruang bilik Jeroboam bedosa lalu ngujungka sida dipunaska ari dunya.
Nota Kaki
^ Jaku Asal, “endur ti tinggi.”
^ Iya nya, amau ke bechampur enggau lemak jelu korban ke ditunu.
