1 Raja 18:1-46
18 Ba taun ti ketiga, maya kemarau benung nyadi, Jehovah bejaku ngagai Elijah: “Alai nuan betemu enggau Ahap. Aku deka ngasuh ujan labuh ke tanah.”
2 Nya alai, Elijah pan mupuk betemu enggau Ahap. Maya nya, lapar pungkang balat amat nyadi ba Samaria.
3 Ahap ngangauka Obadiah, iya nya pengurus istana iya. (Obadiah nangi amat ke Jehovah.
4 Lebuh Jesebel munuh bala nabi Jehovah, Obadiah ngelalaika 100 iku nabi ba gua. Ba dalam siti gua bisi 50 iku nabi. Iya mega nyediaka roti enggau ai ke sida.)
5 Ahap madah ngagai Obadiah: “Mupuk ngagai semua mata ai enggau semua lebak.* Engka kitai ulih tetemuka chukup rumput ke kuda enggau baghal* kitai, ngambika semua jelu kitai enda mati.”
6 Seduai iya pan nentuka kawasan ke deka dituju seduai iya siku-siku. Ahap mupuk ngagai kawasan iya empu, lalu Obadiah mupuk ngagai kawasan iya empu.
7 Lebuh Obadiah benung ba rantau jalai, iya betemu enggau Elijah. Obadiah ngelala Elijah. Obadiah besugang ba depan iya lalu nanya: “Tuan Elijah, amat nuan tu?”
8 Elijah nyaut: “Au, aku meh tu. Mupuk lalu padah ngagai tuan nuan, aku bisi ditu.”
9 Ku Obadiah: “Nama dosa aku sampai nuan deka nyerahka aku ngagai Ahap ngambika dibunuh iya?
10 Aku besumpah atas nama Jehovah, Petara nuan ti idup, Ahap udah begigaka nuan ba semua bansa enggau semua perintah. Lebuh sida madah sida nadai tetemuka nuan, Ahap lalu ngasuh semua sida besumpah madahka sida nadai tetemuka nuan.
11 Diatu, nuan empu ke ngasuh aku madah ngagai Ahap, nuan bisi ditu.
12 Pengudah aku mupuk, kuasa kudus* Jehovah deka mai nuan ngagai endur ke enda ditemu aku. Lebuh aku madah ngagai Ahap pasal nuan, lalu iya nadai tetemuka nuan, iya tentu deka munuh aku. Aku nangika Jehovah kenyau ari aku agi biak.
13 Kati nuan enda nemu utai ke digaga aku, lebuh Jesebel munuh bala nabi Jehovah? Aku udah ngelalaika 100 iku bala nabi Jehovah ba gua. Ba siti gua bisi 50 iku nabi. Aku mega enda ngetu nyediaka roti enggau ai ke sida.
14 Tang diatu, nuan ngasuh aku madah ngagai raja, nuan bisi ditu. Raja tentu deka munuh aku.”
15 Tang Elijah madah: “Aku besumpah atas nama Jehovah, Petara ti idup, ketuai soldadu serega, ke disembah aku, aku deka betemu enggau raja seharitu.”
16 Nya alai, Obadiah mansang betemu enggau Ahap lalu madah ngagai iya pasal Elijah. Ahap lalu mupuk betemu enggau Elijah.
17 Lebuh Ahap meda Elijah, iya madah ngagai Elijah: “Nuan tu orang ke balat mai penusah ngagai Israel!”
18 Elijah nyaut: “Ukai aku ke mai penusah ngagai Israel. Tuan enggau ruang bilik tuan meh ke mai penusah ngagai Israel, laban kita sebilik enda ngasika pesan Jehovah sereta nitihka Baal.
19 Diatu, asuh semua orang Israel betemu enggau aku ba Gunung Karmel. Bai mega 450 iku nabi Baal enggau 400 iku nabi ke nyembah tiang kayu keramat, ke makai ba mija Jesebel.”
20 Nya alai, Ahap ngirumka pesan nya ngagai semua orang Israel, lalu ngempuruka semua nabi nya ba Gunung Karmel.
21 Udah nya, Elijah mansang ngagai semua orang nya lalu bejaku: “Ni pengelama kita deka bebagi ati? Enti Jehovah nya Petara ti bendar, titihka meh Iya. Tang enti Baal nya Petara ti bendar, titihka meh Baal!” Tang, semua orang nya nadai nyaut iya.
22 Ku Elijah nampung: “Semina aku aja nabi Jehovah ke agi tinggal, tang nabi Baal bisi 450 iku.
23 Diatu, bai dua iku anak sapi lelaki lalu asuh bala nabi Baal milih siku ari anak sapi nya. Sida patut netak anak sapi nya lalu manggaika iya ba atas kayu, tang anang ngidupka api. Aku mega deka ngereja utai ti sama ngagai siku da agi anak sapi lelaki, lalu aku mega enda ngidupka api.
24 Udah nya, kita patut ngangauka nama petara kita, lalu aku deka ngangauka nama Jehovah. Petara ke nyaut ngena api, nya meh Petara ti bendar.” Semua orang lalu nyaut: “Kami setuju.”
25 Udah nya, Elijah madah ngagai bala nabi Baal: “Pilih siku anak sapi lelaki lalu sediaka iya, laban penyampau bala kita mayuh agi. Udah nya, kangauka nama petara kita, tang anang ngidupka api.”
26 Sida pan ngambi anak sapi ke udah dipilih sida lalu nyediaka sapi nya. Udah nya, sida enda ngetu ngangauka nama Baal, ari pagi nyentuk ngagai tengah hari. Ku sida: “O Baal, saut meh kami!” Tang, nadai munyi nyawa nyaut sida. Sida majak jengkak-jengkak betanda ngelingi alta ke udah digaga sida.
27 Maya tengah hari, Elijah belabuh ngemelika sida: “Kangauka inggar agi! Baal kan petara! Kada enda iya benung temenung, tauka bira,* tauka tinduk. Gerak iya enti iya tinduk!”
28 Sida pan bendar agi nyerauh enggau inggar, lalu nelihka tubuh diri ngena pisau enggau sangkuh, baka ke biasa digaga sida, sampai darah nyau nelusur tubuh sida.
29 Pengudah tengah hari, sida majak baka orang gila* sampai hari nyau lemai, iya nya maya alai nyerahka pemeri bijirin. Tang, agi ga nadai munyi nyawa ke nyaut sida. Nadai utai ke nyadi.
30 Elijah pan bejaku ngagai semua orang nya: “Datai semak ngagai aku.” Nya alai, semua sida datai semak ngagai iya. Iya lalu ngaduka alta Jehovah ke udah runtuh.
31 Udah nya, Elijah ngambi 12 igi batu. Tiap igi batu ngarika siti raban bansa Jakop. Jehovah kala bejaku ngagai Jakop: “Nuan deka dikangau ngena nama Israel.”
32 Elijah nusun semua batu nya kena ngaga alta ke ngemuliaka nama Jehovah. Iya ngaga parit ngelingi alta nya, lalu pemesai parit nya chukup alai naburka kira-kira 10 kilogram* benih.
33 Udah nya, iya nusun kayu ba atas alta, netak anak sapi lelaki nya, lalu ngengkahka iya ba atas kayu nya. Ku Elijah: “Isi ai ngagai empat iti tempayan ti besai, lalu tuang ai nya ngagai pemeri tunu enggau ngagai kayu nya.”
34 Udah nya, ku Elijah: “Tuangka baru.” Nya alai, sida pan ngereja nya. Ku Elijah agi: “Tuangka baru kali ketiga.” Sida pan ngereja nya kali ketiga.
35 Ai mengalir ngelingi alta nya. Elijah mega ngisi parit nya enggau ai.
36 Lemai nya, kira-kira maya alai nyerahka pemeri bijirin, Elijah mansang semak ngagai alta nya lalu bejaku: “O Jehovah, Petara Abraham, Isak, enggau Israel. Seharitu awakka semua orang nemu, Nuan meh Petara orang Israel, lalu aku meh nembiak Nuan ke ngereja semua utai tu nitihka pesan Nuan.
37 Saut meh aku, O Jehovah! Saut meh aku ngambika semua orang tu nemu Nuan, Jehovah, endang Petara ti bendar, lalu Nuan meh ke nguingka ati sida pulai baru ngagai Nuan.”
38 Jehovah pan nurunka api, lalu api nya nganguska pemeri tunu, kayu, batu, enggau tanah ke ngelingi alta nya. Api nya mega ngerangkaika ai dalam parit nya.
39 Lebuh semua orang meda nya, sida tekala nya besugang lalu bejaku: “Jehovah meh Petara ti bendar! Jehovah meh Petara ti bendar!”
40 Elijah lalu bejaku ngagai sida: “Tangkap bala nabi Baal! Anang nejuka siku pan ari sida rari.” Tekala nya, sida nangkap bala nabi nya. Elijah mai sida ngagai sungai ba Kison, lalu munuh sida ba dia.
41 Udah nya, Elijah bejaku ngagai Ahap: “Alai nuan makai enggau ngirup, laban aku bisi ninga munyi ujan bangat.”
42 Lebuh Ahap mansang makai enggau ngirup, Elijah niki ngagai Gunung Karmel. Ba din, iya besugang ke tanah. Lebuh iya besugang, mua iya semak enggau patung* iya.
43 Pengudah nya, iya bejaku ngagai ulun iya: “Alai niki, lalu peda tunga ke tasik.” Nya alai, ulun iya pan mupuk. Pengudah ulun iya pulai, iya lalu madah: “Nadai aku meda utai.” Tujuh kali Elijah madah ngagai iya: “Peda baru.”
44 Ba kali ti ketujuh, ulun nya pulai lalu madah: “Aku bisi meda remang* ke ngemesai tapa jari pansut ari tasik.” Nya alai, Elijah madah ngagai ulun iya: “Alai mupuk, lalu padah ngagai Ahap: ‘Sediaka kerita kuda tuan lalu mupuk, enggaika tuan enda ulih mupuk ketegal ujan bangat.’”
45 Langit pan penuh enggau mua hari ti petang. Ribut balat bepuput, lalu hari balat ujan. Ahap nepan kerita kuda iya nyentuk ngagai Jesril.
46 Jehovah meri Elijah kuasa. Iya nyintalka gari iya ba punggung, lalu belanda ngelih Ahap nyentuk ngagai Jesril.
Nota Kaki
^ Tauka “wadi.”
^ Merujuk ngagai anak ke ada ari keledai lelaki enggau kuda indu.
^ Peda Penerang Leka Jaku.
^ Tauka engka, “iya benung bejalai ngagai endur bukai.”
^ Tauka “baka nabi.”
^ Jaku Asal, “2 seah.” Peda Rujukan B14.
^ Tauka “lutut.”
^ Tauka “awan.”
