1 Raja 5:1-18
5 Kenyau ari suba, Raja Hiram ari Tirus bekaban enggau David.* Lebuh iya ninga Solomon udah ditata nyadi raja nganti apai iya, David, iya nganjung beberapa iku pegawai iya betemu enggau Solomon.
2 Solomon lalu ngirumka pesan tu ngagai Hiram:
3 “Tuan raja nemu apai aku, David, enda ulih ngaga rumah kena ngemuliaka nama Jehovah, Petara iya, laban iya beperang ngelaban bala munsuh ke ngelingi iya. Lalu pengujung iya, Jehovah nulung iya menang ngelaban bala munsuh iya.
4 Tang diatu, Jehovah, Petara aku, udah meri aku pengelantang. Aku bibas ari semua munsuh ke ngelingi aku. Nadai orang ngelaban aku, lalu nadai utai jai nyadi ba menua aku.
5 Jehovah udah besemaya ngagai apai aku, David: ‘Aku deka ngelantik anak nuan duduk ba kerusi diraja nuan. Iya meh ke deka ngaga rumah kena ngemuliaka nama Aku.’ Nya alai, aku deka ngaga rumah kena ngemuliaka nama Jehovah, Petara aku.
6 Nyadi, asuh meh rayat tuan raja nebang pun kayu sidar ba Lebanon ke aku. Bala rayat aku deka gawa enggau bala rayat tuan. Aku deka mayar upah bala rayat tuan nitihka penyampau ke dipinta tuan. Baka ke ditemu tuan raja, nadai siku pan ari kami nemu nebang pun kayu baka orang Sidon.”
7 Pengudah ninga jaku Solomon, Hiram gaga amat ati, lalu ku iya: “Awakka Jehovah dipuji seharitu, laban Iya udah meri David anak ke bepenemu-dalam merintah bansa ti besai.”*
8 Hiram lalu ngirumka pesan tu ngagai Solomon: “Aku udah nerima pesan ke dikirumka tuan raja. Aku deka ngereja semua utai ke dipinta tuan. Aku deka nyediaka kayu sidar enggau kayu juniper.
9 Ari Lebanon, bala aku deka nganjung kayu nya ngagai tasik. Kayu nya deka ditanchang nyadi rakit lalu dianyutka ngagai endur ke dipilih tuan. Ba din, bala aku deka muka tanchang rakit nya ngambika bala tuan ulih ngangkut kayu nya. Lalu aku minta tuan nyediaka pemakai ke diguna semua orang ba istana aku nyadika upah.”
10 Nya alai, Hiram nyediaka kayu sidar enggau kayu juniper ke Solomon baka ke dikedekaka iya.
11 Solomon meri Hiram 3.2 juta kilogram* gandum enggau 4,400 liter* minyak kana ti tulin nyadika pemakai semua orang ba istana Hiram. Nya meh utai ke dikereja Solomon ninting taun.
12 Jehovah ngamatka semaya Iya lalu meri penemu-dalam ngagai Solomon. Hiram enggau Solomon bisi kaul ti manah, lalu seduai iya ngaga sempekat enggau pangan diri.
13 Raja Solomon ngambi 30,000 iku lelaki ari serata menua Israel gawa ke iya. Semua sida wajib gawa ke iya.
14 Ninting bulan, Raja Solomon nganjung 10,000 iku orang ke Lebanon nitihka gilir. Sida gawa pengelama sebulan ba Lebanon, lalu pulai ke rumah diri empu pengelama dua bulan. Adoniram betanggungjawap ngemataka orang ke wajib gawa ke raja.
15 Solomon bisi 70,000 iku pekereja ke ngangkut utai ti berat enggau 80,000 iku orang mutung batu ba kawasan ke begunung.
16 Solomon mega bisi 3,300 iku pemesai ke ngemataka bala pekereja nya.
17 Nitihka utai ke diasuh Solomon, sida ngulihka batu ti besai sereta ti mar rega lalu mutung batu nya nyadika asas Rumah Sembiang.
18 Nyadi, bala pekereja Solomon, bala pekereja Hiram, enggau orang Gebal, gawa mutung batu. Sida mega nyediaka kayu enggau batu kena ngaga Rumah Sembiang.
Nota Kaki
^ Tauka “seruran sayauka David.”
^ Tauka “mayuh.”
^ Jaku Asal, “20,000 kor.” Peda Rujukan B14.
^ Jaku Asal, “20 kor.”
