1 Samuel 25:1-44
25 Udah nya, Samuel mati. Semua orang Israel begempuru tusah ati ke Samuel lalu nguburka iya semak enggau rumah iya, ba Ramah. Pengudah nya, David mupuk ngagai menua puang Paran.
2 Bisi siku lelaki ari Maon gawa ba Karmel.* Lelaki nya amat kaya. Iya bisi 3,000 iku bedus enggau 1,000 iku kambin, lalu maya nya iya benung nyukur bulu bedus ba Karmel.
3 Lelaki nya datai ari peturun Kalep. Nama iya Nabal, lalu bini iya benama Abigail. Bini iya bajik sereta pintar,* tang Nabal kasar sereta jai perangai.
4 Maya ba menua puang, David ninga pasal Nabal ke benung nyukur bulu bedus.
5 Nya alai, David nganjung 10 iku bala iya betemu enggau Nabal. Iya madah ngagai sida: “Alai ngagai Karmel. Lebuh kita betemu enggau Nabal, padahka tabi basa aku ngagai iya.
6 Udah nya, padah ngagai iya: ‘Awakka tuan panjai umur sereta idup lantang. Awakka ruang bilik tuan idup lantang, lalu semua utai ke enggi tuan manah magang.
7 Aku ninga tuan benung nyukur bulu bedus tuan. Lebuh bala pengibun bedus tuan enggau kami, kami nadai kala ngachau sida. Sida pan nadai kala lenyau utai sekumbang sida ba Karmel.
8 Tanya bala nuan empu lalu sida deka madahka nuan. Arapka nuan lantang ati nerima bala aku, laban kami datai ba hari ti ngagaka ati.* Beri meh aku enggau bala aku nama-nama utai ke ulih diberi tuan.’”
9 Nya alai, bala David mupuk lalu madahka semua jaku David ngagai Nabal. Udah nya,
10 Nabal nyaut sida: “Sapa David? Sapa anak Jesi nya? Diatu mayuh amat ulun ngerarika diri ari tuan sida.
11 Nadai aku ka ngambi roti, ai, enggau dagin jelu ke udah disayat aku ke bala orang ke nyukur bulu bedus aku, lalu meri utai nya ngagai orang ke enda ditemu penatai.”
12 Nya alai, bala David pulai lalu madahka iya semua utai nya.
13 David lalu tekala nya madah ngagai bala iya: “Tangkin pedang kita!” Semua sida lalu nangkin pedang magang. David mega nangkin pedang iya. Kira-kira 400 iku orang nitihka David, lalu 200 iku orang da agi tinggal ngibun barang sida.
14 Tang, siku ari ulun Nabal bejaku enggau Abigail, bini Nabal: “Dinga nuan! David bisi nganjung bala iya ari menua puang mai pesan tabi basa ngagai tuan kami, tang tuan ngeleseka sida.
15 Sida manah amat enggau kami. Sida nadai kala ngemediska kami, lalu kami mega nadai kala lenyau nama-nama utai sekumbang sida ke enggau kami ba menua puang.
16 Lebuh kami ngibun bedus kami begulai enggau sida, sida baka dinding ke ngelindung kami siang enggau malam.
17 Nya alai, perundingka utai ke deka dikereja nuan, laban utai tu tentu deka mai penusah ti besai ngagai tuan Nabal enggau semua ruang bilik iya. Iya sigi nadai guna, lalu iya tusah deka dibai berandau.”
18 Abigail lalu berumban ngambi 200 iti tuku roti, dua iti sarang wain ti besai, lima iku bedus ke udah disayat, lima guni* bijirin ke udah dipanggang, 100 iti kuih kismis, enggau 200 iti kuih buah ara. Iya manggaika semua nya ba atas beberapa iku keledai.
19 Udah nya, iya bejaku enggau bala ulun iya: “Kita mupuk dulu. Legi aku nitihka kita.” Tang, iya nadai madah nama-nama ngagai laki iya, Nabal.
20 Lebuh Abigail benung nepan keledai iya, David enggau bala iya benung mansang ngagai Abigail. Sida enda ulih meda iya laban dilindung gunung. Udah nya, Abigail betemu enggau sida.
21 Sebedau nya, David udah madah: “Nadai guna aku nyaga utai orang nya ba menua puang. Nadai siti pan utai iya lenyau, tang iya malas pemanah aku ngena penyai.
22 Enti aku enda munuh Nabal enggau semua lelaki dalam rumah iya sebedau pagi pagila, awakka Petara balat ngukum bala munsuh aku.”*
23 Lebuh Abigail meda David, iya jejampat nurun ari keledai iya. Iya besugang lalu meremi ba depan David.
24 Udah nya, iya meremi semak kaki David, lalu bejaku: “Tuan, awakka aku betanggungjawap. Awakka aku bejaku lalu pendingka meh utai ke dipadah ulun indu tuan tu.
25 Anang pedulika Nabal, orang ke nadai guna nya, laban iya endang baka nama iya empu. Nama iya Nabal,* lalu iya orang ke enda nemu berunding. Maya nya, aku nadai betemu enggau bala tuan lebuh sida datai.
26 Aku besumpah atas nama Jehovah, Petara ti idup, enggau atas nyawa tuan, Jehovah meh ke udah nagang tuan ari berutang darah sereta malas dendam.* Awakka bala munsuh tuan enggau orang ke deka ngemediska tuan nyadi baka Nabal.
27 Terima meh pemeri* ke dibai aku tu, lalu beri meh pemeri tu ngagai bala tuan.
28 Ampunka penyalah ulun nuan tu. Jehovah tentu deka ngasuh peturun tuan lama merintah nyadi raja,* laban tuan belaban ba perang Jehovah lalu tuan nadai ngereja penyai sepemanjai pengidup tuan.
29 Lebuh bisi orang begagaika tuan lalu deka munuh tuan, Jehovah, Petara tuan, deka ngelindung nyawa tuan, baka siku orang ke ngelindung barang ti berega ke dibalut dalam beg. Taja pia, Petara deka nikau jauh nyawa bala munsuh tuan, baka batu ke ditikauka ngena pangwang.*
30 Lebuh Jehovah ngamatka semua utai ti manah ke udah disemayaka Iya ngagai tuan lalu ngelantik tuan nyadi tuai orang Israel,
31 ati tuan sigi enda nyalahka tuan tauka ngasuh tuan berasai nesal, laban tuan enda malas dendam* sereta berutang darah enggau nadai kebuah. Lebuh Jehovah merekatka tuan, ingat meh ke aku.”
32 Nya alai, David madah ngagai Abigail: “Puji meh Jehovah, Petara orang Israel, ke udah nganjung nuan ngagai aku seharitu!
33 Awakka Petara merekatka nuan laban nuan udah ngayanka pemintar. Awakka Petara merekatka nuan laban nuan udah nagang aku ari berutang darah sereta malas dendam.*
34 Aku besumpah atas nama Petara orang Israel ti idup, Jehovah, ke udah nagang aku ari ngemediska nuan, enti nuan enda berumban kitu, aku tentu udah munuh semua lelaki dalam rumah Nabal sebedau pagi pagila.”
35 David nerima utai ke diberi Abigail lalu madah ngagai iya: “Pulai meh enggau selamat. Aku udah mendingka utai ku nuan, lalu aku deka ngamatka utai ke dipinta nuan.”
36 Udah nya, Abigail pulai. Maya nya, Nabal benung rami makai besai baka raja. Nabal ngelantangka diri sereta mabuk. Nya alai, Abigail enda madah nama-nama ngagai iya nyentuk ngagai pagi hari siti.
37 Pagi nya, lebuh Nabal enda agi mabuk, bini iya lalu madahka semua utai ngagai iya. Pengudah Nabal ninga nya, jantung iya nyadi lemi, lalu iya pan gegaring enda engkebut baka batu.
38 Kira-kira 10 hari udah nya, Jehovah munuh Nabal lalu iya pan mati.
39 Lebuh David ninga Nabal udah mati, iya lalu bejaku: “Puji meh Jehovah. Iya udah ngetanka aku pengudah aku dikeleseka Nabal. Jehovah udah nagang aku ngereja penyai, lalu Iya udah ngukum Nabal ketegal penyai ke udah dikereja Nabal!” Udah nya, David nganjung orang minta Abigail nyadika bini iya.
40 Nya alai, bala ulun David betemu enggau Abigail ba Karmel, lalu ku sida: “David udah nganjung kami ngambika mai nuan nyadika bini iya.”
41 Tekala nya, Abigail nyungkurka diri lalu bejaku: “Aku sanggup nyadi ulun iya. Aku mega sanggup masu kaki bala ulun iya.”
42 Udah nya, Abigail berumban angkat lalu nepan keledai iya. Lima iku ulun indu iya bejalai nitihka iya ari belakang. Abigail sama mupuk enggau bala orang ke dianjung David, lalu iya pan nyadi bini David.
43 David mega jadi enggau Ahinoam ari Jesril. Abigail enggau Ahinoam sama nyadi bini David.
44 Tang, Saul udah meri anak indu iya, Mikal, iya nya bini David, ngagai Palti anak Lais ke datai ari Galim.
Nota Kaki
^ Siti kuta ba menua Judah; ukai merujuk ngagai Gunung Karmel.
^ Tauka “tajam runding.”
^ Jaku Asal, “ba hari ti manah.”
^ Jaku Asal, “5 seah.” Peda Rujukan B14.
^ Tauka engka, “ngukum David.”
^ Reti nya “Enda Nemu Berunding; Beli.”
^ Tauka “mai penyelamat.”
^ Jaku Asal, “berekat.”
^ Jaku Asal, “deka ngaga siti rumah ti tan lama ke tuan.”
^ Senyata ke betali ti dikena nikauka batu.
^ Tauka “mai penyelamat.”
^ Tauka “mai penyelamat.”
