Bansa Israel ti Kedua 12:1-16
12 Enda lama pengudah perintah Rehoboam nyadi tegap sereta kering, iya enggau semua orang Israel ngelengkaka adat Jehovah.
2 Ba taun ti kelima Raja Rehoboam merintah, Sisak, raja Ejip, nyerang Jerusalem laban sida enda setia ngagai Jehovah.
3 Raja Sisak mai 1,200 iti kerita kuda sereta 60,000 iku soldadu ke nepan kuda. Iya mega mai bala soldadu ari Ejip, ke nyengkaum orang Libia, Sukim, enggau Etiopia. Penyampau sida enda alah diitung.
4 Iya ngalahka kuta-kuta ke dikelingi dinding ti teguh ba menua Judah, lalu pengujung iya datai ba Jerusalem.
5 Rehoboam enggau bala tuai orang Judah begempuru ba Jerusalem laban sida takut ke Sisak. Nabi Semayah betemu enggau sida lalu madah: “Tu utai ke disebut Jehovah: ‘Kita udah ninggalka Aku. Nya alai, Aku mega ninggalka kita lalu nyerahka kita ngagai Sisak.’”
6 Lebuh ninga nya, raja enggau bala tuai orang Israel ngemaruhka diri lalu madah: “Jehovah udah ngereja utai ti lurus.”
7 Lebuh Jehovah meda sida udah ngemaruhka diri, Jehovah bejaku ngagai Semayah: “Sida udah ngemaruhka diri. Nya alai, Aku enda ngemunaska sida, lalu enda lama da agi Aku deka nyelamatka sida. Aku enda mandangka pengeringat Aku ngagai Jerusalem nengah Sisak.
8 Tang sida deka nyadi ulun Sisak, ngambika sida nemu nama bida entara gawa ke Aku enggau gawa ke bala raja ari menua bukai.”
9 Nya alai, Raja Sisak ari Ejip nyerang Jerusalem. Iya ngambi reta ari Rumah Jehovah enggau ari istana raja. Iya ngambi semua utai, nyengkaum semua terabai emas ke digaga Solomon.
10 Nya alai, Raja Rehoboam ngaga terabai ari temaga kena nganti terabai emas nya. Iya nyerahka semua terabai nya ngagai bala ketuai jejaga ke nyaga pintu penama istana raja.
11 Tiap kali raja tama ngagai Rumah Jehovah, bala jejaga deka tama lalu mai terabai nya. Udah nya, sida deka mulaika semua terabai nya ngagai bilik bala jejaga.
12 Ketegal raja udah ngemaruhka diri, lalu agi bisi utai ti manah ba Judah, Jehovah badu agi ringat ngagai raja, lalu Iya enda nyadi ngemunaska sida abis lengis.
13 Raja Rehoboam negapka perintah iya ba Jerusalem, lalu mengkang merintah nyadi raja. Rehoboam beumur 41 taun lebuh iya nyadi raja. Iya merintah pengelama 17 taun ba Jerusalem, iya nya kuta ke udah dipilih Jehovah ari serata kawasan raban bansa Israel, alai ngengkahka nama Iya. Indai Rehoboam nya siku indu orang Amon ke benama Naamah.
14 Tang, Rehoboam ngereja utai ti jai laban ba dalam ati iya, iya nadai pengingin deka ngiga Jehovah.
15 Rehoboam enggau Jeroboam suah beperang. Sejarah pasal pengidup Rehoboam, ari pun sampai ujung, udah ditulis Nabi Semayah enggau Ido dalam lis tusut peturun. (Ido nya siku lelaki ke madahka utai ke dipandang Petara dalam runding iya.)
16 Udah nya, Rehoboam mati lalu dikuburka begulai enggau aki ini iya ba Kuta David. Anak iya ke benama Abijah nganti iya nyadi raja.
