Bansa Israel ti Kedua 17:1-19
17 Udah nya, anak Assa ke benama Jehosapat nganti iya nyadi raja, lalu iya negapka perintah iya ba Israel.
2 Iya ngengkahka bala soldadu iya ba semua kuta ke bisi dinding ti teguh ba Judah. Iya mega nganjung raban soldadu ngambika bejaga ba kawasan Judah enggau ba kuta-kuta Efraim ke udah dialahka apai iya, Assa.
3 Jehovah bisi enggau Jehosapat laban iya nitihka teladan moyang iya, David, lalu iya enda nyembah Baal.
4 Iya ngiga Petara ke disembah apai iya, lalu ngasika pesan Petara. Iya enda nitihka pengawa ke biasa digaga orang Israel.
5 Jehovah negapka perintah Judah ke di baruh kuasa Jehosapat, lalu semua orang ke diau ba Judah enda ngetu meri iya hadiah. Nya alai, pengaya enggau mulia Jehosapat majak nambah.
6 Iya berani nitihka jalai Jehovah. Iya indah nganchurka endur alai orang nyembah petara pelesu* sereta tiang kayu keramat ba Judah.
7 Ba taun ketiga Jehosapat merintah, iya nganjung bala pegawai iya, iya nya Ben-hail, Obadiah, Sekariah, Netanel, enggau Mikaiah ngambika ngajar orang ba kuta-kuta Judah.
8 Bisi mega orang Lewi ke enggau sida, iya nya Semayah, Netaniah, Sebadiah, Asahel, Semiramot, Jehonatan, Adonijah, Tobijah, enggau Tob-adonijah. Bisi mega dua iku imam ke enggau sida, iya nya Elisama enggau Jehoram.
9 Sida mai bup Adat Jehovah lalu berengkah ngajar ba Judah. Sida ngagai semua kuta ba Judah lalu ngajar orang ba din.
10 Jehovah ngasuh semua perintah ke ngelingi Judah berasai takut. Nya alai, sida enda berani beperang ngelaban Jehosapat.
11 Orang Pilistin mai hadiah enggau duit nyadika chukai ngagai Jehosapat. Orang Arab mai jelu tupi sida, iya nya 7,700 iku bedus lelaki enggau 7,700 iku kambin lelaki, lalu meri semua nya ngagai Jehosapat.
12 Jehosapat majak bekuasa, lalu iya enda ngetu nirika kuta ke bedinding sereta kuta alai nyimpan pemakai ba Judah.
13 Iya bisi projek ti besai ba kuta-kuta Judah. Kelimpah ari nya, iya ngengkahka bala soldadu iya ti kering ba Jerusalem.
14 Sida dibagi nitihka suku sida. Ari raban bansa Judah bisi Adnah. Iya ketuai atas 300,000 iku soldadu ti kering. Iya mega siku ari tuai atas 1,000 iku orang.
15 Di baruh Adnah bisi Jehohanan. Iya ketuai atas 280,000 iku soldadu.
16 Di baruh Adnah mega bisi Amasiah anak Sikri. Iya sukarela gawa ke Jehovah, lalu bisi 200,000 iku soldadu ti kering enggau iya.
17 Ari raban bansa Benjamin bisi Eliada. Iya siku soldadu ti kering, lalu bisi 200,000 iku soldadu ke mai panah enggau terabai enggau iya.
18 Di baruh Eliada bisi Jehosabat, lalu iya bisi 180,000 iku soldadu ke besenyata.
19 Semua soldadu nya gawa ke Raja Jehosapat, nyengkaum bala soldadu ke gawa ba kuta-kuta ke dikelingi dinding ti teguh ba serata Judah.
Nota Kaki
^ Tauka “endur ti tinggi.”
