Bansa Israel ti Kedua 5:1-14
5 Solomon nembuka semua pengawa ke patut dikereja iya ke Rumah Jehovah. Solomon lalu mai semua barang ke udah dikuduska apai iya, David, lalu nyimpan pirak, emas, enggau semua barang bukai, ba endur nyimpan reta ba Rumah Petara ti bendar.
2 Udah nya, Solomon ngempuruka bala tuai orang Israel, iya nya bala tuai raban enggau bala tuai suku orang Israel. Sida betemu enggau iya ba Jerusalem laban deka mindahka peti lampang batu Adat Jehovah ari Kuta David, iya nya Sion.
3 Semua orang Israel begempuru ba depan raja maya Pengerami Belangkau ba bulan Etanim,* iya nya ba bulan ti ketujuh.
4 Lebuh semua bala tuai orang Israel udah datai, orang Lewi lalu ngesan peti lampang batu Adat nya.
5 Bala imam enggau orang Lewi mai peti lampang batu Adat, langkau gempuru, enggau semua pekekas ti kudus ke bisi dalam langkau nya.
6 Raja Solomon enggau semua orang Israel ke udah dikangau betemu enggau Raja Solomon begempuru magang ba depan peti lampang batu Adat nya. Bisi mayuh amat bedus enggau sapi ke diserahka nyadika pemeri, nyentukka penyampau semua jelu nya enda ulih diitung.
7 Udah nya, bala imam mai peti lampang batu Adat Jehovah ngagai endur ke udah ditetapka, iya nya ba Endur ti Pemadu Kudus. Bilik nya ba begian paling ujung Rumah Sembiang. Sida ngengkahka peti nya ba baruh sayap dua iku cherub.
8 Sayap dua iku cherub nya ngerembai ngelindung begian atas peti lampang batu Adat nya. Lalu peti nya enggau kayu ke dikena ngesan peti nya ba baruh sayap nya.
9 Kayu ke dikena ngesan peti nya panjai. Ujung kayu nya ulih dipeda ari Endur ti Kudus ke ba depan Endur ti Pemadu Kudus. Tang kayu nya enda ulih dipeda ari luar. Kayu nya agi ba dia nyentukka seharitu.
10 Dalam peti nya semina bisi dua iti lampang batu. Lampang batu nya disimpan Moses dalam peti nya lebuh iya ba Horeb, iya nya lebuh Jehovah ngaga sempekat enggau orang Israel pengudah sida pansut ari Ejip.
11 Semua imam ke bisi dia, enda ngira ari ni raban sida, bela udah nuchi diri empu magang. Lebuh bala imam pansut ari Endur ti Kudus nya,
12 bala penyanyi orang Lewi ari raban Asaf, Heman, Jedutun, enggau bala anak lelaki sida sereta bala sida, benung bediri tunga ke timur alta. Sida ngena gari ke digaga ari kain ti alus. Sida megai belikan,* simbal, enggau perengka musik ti betali. Sama enggau sida nya bisi 120 iku bala imam ke nyepu terumpit.
13 Bala sida ke nyepu terumpit enggau bala penyanyi sama muji sereta meri terima kasih ngagai Jehovah. Sida belagu muji Jehovah “laban Iya manah lalu pengerindu Iya ti setia meruan belama iya.” Munyi terumpit, belikan, enggau perengka musik ke bukai ulih didinga lebuh sida belagu. Maya nya, Rumah Jehovah lalu penuh laban remang.*
14 Bala imam enda ulih bejalaika pengawa sida ketegal remang nya. Mulia Jehovah udah ngemenuhka Rumah Petara ti bendar.
Nota Kaki
^ Peda Rujukan B15.
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “awan.”
