Bansa Israel ti Kedua 8:1-18
8 Pengudah Solomon ngaga Rumah Jehovah enggau istana iya empu pengelama 20 taun,
2 iya nirika baru kuta-kuta ke udah diberi Hiram ngagai iya lalu ngasuh orang Israel diau ba dia.
3 Solomon mega ngagai Hamat-sobah lalu ngerampas menua nya.
4 Udah nya, iya nirika baru* Tadmor ba menua puang sereta semua kuta ke bisi setor ke udah digaga iya ba Hamat.
5 Iya negapka Bet-horon Atas enggau Bet-horon Baruh ngena dinding, pintu, enggau palang.
6 Iya mega nirika baru Baalat, kuta alai nyimpan pemakai, enggau alai nyimpan kerita kuda, sereta kuta ke raban soldadu ke nepan kuda. Semua utai ke deka digaga Solomon ba Jerusalem, ba Lebanon, enggau ba serata kawasan ke dipegai iya pan tembu magang.
7 Bekaul enggau semua peturun orang Amor, orang Het, orang Peris, orang Ibi, enggau orang Jebus ke agi idup, ke ukai sebagi ari orang Israel,
8 sida wajib gawa nyadi ulun Solomon nyentukka seharitu. Sida nya orang ke enda dibunuh orang Israel, lalu diau ba menua Israel.
9 Tang, Solomon nadai ngasuh orang Israel nyadi ulun iya. Iya ngasuh sida nyadi soldadu, ketuai pegawai soldadu, ketuai orang ke nepan kerita kuda, enggau ketuai bala soldadu ke nepan kuda.
10 Bisi 250 iku ketuai bala pemesai Solomon ke diasuh ngemataka bala pekereja.
11 Solomon mega ngasuh anak indu Firaun* pindah ari Kuta David ngagai istana ke udah digaga Solomon ke iya. Ku Solomon madah: “Taja pan iya bini aku, tang iya enda tau diau ba istana David, raja Israel, laban enda ngira dini endur alai peti lampang batu Adat Jehovah udah diengkah, semua endur nya kudus magang.”
12 Udah nya, Solomon nyerahka pemeri tunu ngagai Jehovah ba alta Jehovah, ke udah didirika iya ba depan Rumah Petara.
13 Ninting hari, iya nyerahka pemeri ke patut diserahka, nitihka Adat Moses. Iya mega ngereja nya maya Hari Sabat, maya pengerami bulan baru, enggau maya tiga iti pengerami ke diintu ninting taun, iya nya Pengerami Roti ti Enda Beragi, Pengerami Ngetau, enggau Pengerami Belangkau.
14 Solomon magi bala imam ngagai beberapa iti raban nitihka pengawa ke udah ditetapka apai iya, David. Iya mega meri pengawa ngagai orang Lewi. Ninting hari, orang Lewi patut belagu muji Petara sereta gawa ba depan bala imam. Udah nya, iya magi bala jejaga ngagai beberapa iti raban, lalu meri sida pengawa nyaga semua pintu penama nitihka giliran raban sida empu. Solomon ngereja semua utai ke diasuh David, nembiak Petara ti bendar.
15 Semua utai ke dipadahka raja ngagai bala imam enggau orang Lewi, enda ngira nya pasal setor, tauka pasal utai bukai, udah dititihka magang.
16 Semua pengawa Solomon diatur enggau manah, berengkah ari asas Rumah Jehovah digaga sampai Rumah nya tembu. Rumah Jehovah pan tembu digaga.
17 Udah nya, Solomon mupuk ngagai Esion-geber enggau Elot, ke ba tebing tasik menua Edom.
18 Hiram nganjung kapal enggau bala iya, iya nya bala kelasi kapal ke bepengalaman, ngagai Solomon. Sida belayar enggau bala Solomon ngagai Opir ngambi 450 talenta* emas, lalu mai emas nya ngagai Raja Solomon.
