Dua Korint 10:1-18
10 Diatu aku, Paul, bebendar minta ngagai kita enggau nelap sereta manah ati baka Kristus. Sekeda ari kita ngumbai aku lemi lebuh aku begulai enggau kita, tang berani lebuh aku enda begulai enggau kita.
2 Aku ngarapka lebuh aku datai ngagai kita, aku enda ibuh terit ngagai sida ke ngumbai kami nitihka chara pengidup orang ba dunya.
3 Taja pan kami idup ba dunya, kami enda beperang nitihka chara orang ba dunya.
4 Senyata ke dikena kami beperang ukai datai ari dunya, tang datai ari Petara. Senyata nya amat bekuasa, lalu ulih ngerubuhka nama-nama utai ke dikelingi dinding ti teguh.
5 Kami ngalihka runding ti salah sereta ngeruntuhka nama-nama utai ke belaban enggau penemu pasal Petara. Kami nangkap tiap iti runding, ngambika runding nya ngasika Kristus.
6 Kami mega sedia deka ngukum sapa-sapa ke enda ngasi, pengudah kita nunjukka diri ngasi enggau pengabis iya.
7 Kita semina beratika utai nitihka gamal. Enti orang ngumbai diri enggi Kristus, lalu iya andalka nya, iya patut berundingka pekara tu baru: Baka iya, kami mega enggi Kristus.
8 Tuan udah meri kami kuasa kena negapka kita, ukai kena ngelemika kita. Taja pan aku engka kelalu temegah pasal nya, tang aku enda malu.
9 Aku enggai kita ngumbai aku nguji deka ngenakutka kita ngena surat aku.
10 Ku sida: “Surat iya kasar sereta terit. Tang lebuh iya begulai enggau kitai, iya lemi lalu jaku iya nadai reti.”
11 Awakka orang ke nyebut munyi nya nemu, utai ke disebut kami ba dalam surat deka dikereja kami lebuh kami begulai enggau kita.
12 Kami enda berani mandingka diri tauka madahka diri sama penuduk enggau orang ke ngeninggika diri. Sida enda nemu berunding, laban sida beratika diri nitihka penemu diri empu, lalu mandingka diri enggau diri empu.
13 Kami enda temegah pasal pengawa ke enda dikereja kami. Tang kami temegah pasal pengawa ke udah diterima kami ari Petara, lalu nya nyengkaum nginjil ngagai kita.
14 Kebendar iya, kami enda ngereja utai ngelui ari pengawa kami lebuh kami datai ngagai kita, laban kami meh orang keterubah ke nusui Berita Manah pasal Kristus ngagai kita.
15 Kami enda temegahka pengawa orang bukai, ke enda dipejalaika ba endur kami gawa. Tang kami ngarapka pengarap kita majak mansang, ngambika utai ke udah digaga kami ba endur kami bejalaika pengawa deka majak mansang. Enggau nya, kami ulih ngereja mayuh agi pengawa,
16 ngambika kami nusui Berita Manah ba menua bukai ke jauh ari kita. Enggau nya, kami enda temegahka utai ke udah digaga ba endur orang bukai bejalaika pengawa.
17 “Barang sapa ke temegah ati, awakka iya temegah ati ketegal Jehovah.”
18 Laban Jehovah lantang ati enggau orang ke ditinggika Iya, tang ukai orang ke ngeninggika diri empu.
