Dua Korint 2:1-17
2 Aku mutuska enggai ngasuh kita tusah ati agi lebuh aku datai nemuai ngagai kita baru.
2 Enti aku ngasuh kita tusah ati, nadai orang ke ulih ngelantangka ati aku kelimpah ari orang ke udah tusah ati laban aku.
3 Aku nulis surat nya ngagai kita ngambika lebuh aku datai, aku enda tusah ati laban orang ke patut ngasuh aku lantang ati. Tu ketegal aku pechaya utai ke ngasuh aku gaga ati mega ngasuh semua kita gaga ati.
4 Ai mata aku bekeberai lebuh nulis surat nya ngagai kita, laban aku amat merinsa sereta tusah ati. Aku ukai deka ngasuh kita tusah ati, tang aku deka kita nemu, aku amat sayauka kita.
5 Enti orang ngasuh kita tusah ati, kita ke tusah ati, ukai aku. Aku enggai kelalu mayuh bejaku pasal nya.
6 Ukum ke diberi mayuh ari bala kita ngagai orang nya udah chukup.
7 Nya alai, ampunka meh iya enggau pengabis ati sereta lantangka ati iya, ngambika iya enda putus pengarap ketegal kelalu tusah ati.
8 Nyadi, aku minta kita ngasuh iya pechaya kita sayauka iya.
9 Aku mega udah nulis ngagai kita, laban aku deka nemu sekalika kita ngasika jaku aku tauka enda.
10 Enti kita ngampunka penyalah orang, aku mega deka ngampunka orang nya. Kebendar iya, aku ngampunka penyalah orang kena nulung semua kita, lalu aku ngereja nya ba mua Kristus,
11 ngambika Sitan enda ngambi ulih ba kitai, laban kitai sigi nemu panjuk* iya.
12 Lebuh aku datai ba Troas ngerembaika Berita Manah pasal Kristus, aku bulih peluang* alai aku gawa ke Tuan.
13 Tang aku irau laban aku enda betemu enggau menyadi aku, Titus. Nya alai, aku meri selamat tinggal ngagai bala menyadi ba dia, lalu mupuk ngagai Masedonia.
14 Terima kasih ngagai Petara ke seruran ngiring kitai bejalai bebala mayuh begulai enggau Kristus, pengudah kitai menang. Nengah kitai, Iya udah ngasuh penemu pasal Iya ngerembai ngagai serata endur, baka bau rengut ti ngesuh ngagai semua endur.
15 Ba Petara, kitai baka bau rengut ke ngesuh ngagai orang ke deka diselamatka sereta orang ke deka dipunaska lebuh kitai ngerembaika berita pasal Kristus.
16 Ba orang ke deka dipunaska, kitai baka bau pemati ke mai pemati, tang ba orang ke deka diselamatka, kitai baka bau pengidup ke mai pengidup. Sapa ke layak ngereja pengawa tu?
17 Kami ke layak, laban kami enda bejualka* jaku Petara baka ke digaga mayuh orang. Kami meh ke dianjung Petara, lalu ba mua Iya, kami ke nyadi murid Kristus sanggup bejalaika pengawa nginjil.
Nota Kaki
^ Tauka “pelan; tuju ati.”
^ Jaku Asal, “siti pintu tebuka ke aku.”
^ Tauka “enda ngulihka untung ari.”
