2 Raja 11:1-21
11 Lebuh Ataliah, iya nya indai Ahasiah, nemu anak lelaki iya udah mati, iya lalu deka munuh semua peturun diraja.
2 Tang, lebuh orang ke diasuh Ataliah deka munuh Jehoas anak Ahasiah enggau bala anak raja ke bukai, Jehoseba anak Raja Jehoram, iya nya kakak Ahasiah, belalai nabanka Jehoas.* Jehoseba ngelalaika Jehoas enggau orang ke ngibun iya ba siti bilik tinduk. Sida mujur ngelalaika Jehoas ari Ataliah. Nya kebuah Jehoas enda dibunuh.
3 Jehoas begulai enggau orang ke ngibun iya,* lalu dilalaika ba Rumah Jehovah pengelama enam taun. Maya nya, Ataliah merintah serata menua.
4 Ba taun ti ketujuh, Jehoyada ngasuh bala ketuai atas 100 iku jejaga raja* enggau jejaga istana betemu enggau iya ba Rumah Jehovah. Iya ngaga siti semaya* enggau sida lalu ngasuh sida besumpah ba Rumah Jehovah, ngambika sida ngamatka semaya nya. Udah nya, iya mai anak raja betemu enggau sida.
5 Ku iya madah ngagai sida: “Tu meh utai ke patut digaga kita: Satu pertiga ari kita mesti gawa maya Hari Sabat, lalu kita mesti bebendar nyaga istana raja.
6 Satu pertiga agi deka bejaga ba Pintu Pugu, lalu satu pertiga da agi deka bejaga ba pintu penama ke ba belakang bala jejaga istana. Kita patut begintir nyaga Rumah Sembiang.*
7 Dua iti raban ke enda gawa maya Hari Sabat mesti bebendar bejaga ba Rumah Jehovah kena nyaga raja.
8 Kita mesti ngelingi raja, lalu tiap iku kita mesti megai senyata. Barang sapa ke nguji ngerenchah tama nengah barisan kita mesti dibunuh. Titihka raja enda ngira kini ke penunga iya.”*
9 Bala ketuai atas 100 iku orang nya pan ngereja utai ke diasuh Imam Jehoyada. Nyadi, tiap iku sida mai bala sida ke gawa maya Hari Sabat enggau sida ke enda gawa maya Hari Sabat datai betemu enggau Imam Jehoyada.
10 Udah nya, Imam Jehoyada meri bala ketuai nya sangkuh enggau terabai bulat ke enggi Raja David, ke bisi ba Rumah Jehovah.
11 Bala jejaga istana megai senyata sida lalu bejaga ba kawasan sida empu. Sida bejaga ngelingi raja. Sida bediri ba depan Rumah Sembiang lalu bejaga ari sepiak kanan ngagai sepiak kiba rumah nya. Sekeda sida bejaga semak alta* enggau semak rumah nya.
12 Udah nya, Jehoyada mai anak raja pansut. Iya ngengkahka makota enggau gulung surat ke bisi Adat Petara ba atas pala anak raja nya. Sida nata iya lalu ngelantik iya nyadi raja. Sida nempikka jari lalu madah: “Idup raja!”
13 Lebuh Ataliah ninga munyi orang belanda, iya jampat-jampat datai ngagai bala orang nya ba Rumah Jehovah.
14 Udah nya, iya meda raja bediri ba sepiak tiang baka ke biasa digaga bala raja. Bala tuai enggau bala orang ke nyepu terumpit bisi enggau raja. Semua orang ba menua nya amat gaga ati lalu nyepu terumpit. Nya alai, Ataliah pan nyarikka gari iya lalu manjung: “Sida ngelaban! Sida ngelaban!”
15 Imam Jehoyada lalu madah ngagai bala ketuai atas 100 iku orang nya (iya nya bala ketuai soldadu): “Bai iya pansut! Enti bisi orang nitihka iya, bunuh orang nya ngena pedang!” Nya ketegal Imam Jehoyada kala madah: “Anang munuh Ataliah ba Rumah Jehovah.”
16 Sida pan nangkap Ataliah. Sida mai iya ngagai endur ke suah ditengah kuda tama ngagai istana. Iya lalu dibunuh ba dia.
17 Udah nya, Jehoyada ngaga siti sempekat entara Jehovah, raja, enggau bala rayat ngambika sida mengkang nyadi nembiak Jehovah. Iya mega ngaga siti sempekat entara raja enggau semua rayat.
18 Udah nya, semua orang ba menua nya datai ngagai kuil Baal, lalu sida ngeruntuhka alta Baal. Patung Baal abis dianchurka sida magang, lalu sida munuh imam Baal ke benama Matan ba depan alta.
Udah nya, Imam Jehoyada ngelantik beberapa iku orang ngemataka Rumah Jehovah.
19 Iya mega ngasuh bala ketuai atas 100 iku orang, bala jejaga raja,* bala jejaga istana, enggau semua orang ba menua nya mupuk sama enggau raja ari Rumah Jehovah ngagai istana. Sida tama ngagai istana nengah pintu penama jejaga istana. Udah nya, Jehoas duduk ba kerusi diraja.
20 Semua orang ba menua nya amat gaga ati, lalu kuta nya nadai agi pengachau, laban Ataliah udah dibunuh ngena pedang ba istana raja.
21 Jehoas beumur tujuh taun lebuh iya nyadi raja.
Nota Kaki
^ Jaku Asal, “ngenchuri Jehoas.”
^ Tauka engka, “Jehoseba.”
^ Jaku Asal, “orang Karia.”
^ Tauka “sempekat.”
^ Tauka engka, “istana.”
^ Jaku Asal, “lebuh iya pansut sereta lebuh iya tama.”
^ Peda Penerang Leka Jaku.
^ Jaku Asal, “orang Karia.”
