2 Raja 18:1-37
18 Ba taun ti ketiga Hoshea anak raja Israel ke benama Elah merintah, Hesekiah anak Raja Ahas ari Judah berengkah nyadi raja.
2 Iya beumur 25 taun lebuh iya nyadi raja, lalu iya merintah ba Jerusalem pengelama 29 taun. Nama indai iya Abi* anak Sekariah.
3 Iya terus ngereja utai ti betul ba mata Jehovah baka aki iya, David.
4 Iya meh ke nganchurka endur alai orang nyembah petara pelesu, mechahka tiang batu keramat, enggau nebang tiang kayu keramat. Iya mega nganchurka patung ular temaga ke digaga Moses, laban maya nya orang Israel agi nunu pemeri* ba depan patung nya. Orang Israel ngangauka patung nya Nehustan.*
5 Iya pechayaka Jehovah, Petara orang Israel. Nadai raja Judah ke baka iya, nemuka sebedau iya tauka pengudah iya.
6 Iya setia ngagai Jehovah lalu nadai kala limpang ari Iya. Iya seruran nitihka pesan ke diberi Jehovah nengah Moses.
7 Jehovah bisi enggau iya. Enda ngira nama utai ke digaga iya, iya ngereja nya ngena penemu-dalam. Iya ngelaban raja Asiria lalu enggai nunduk ngagai raja nya.
8 Iya mega ngalahka orang Pilistin sampai ngagai Gaza enggau kawasan ke dipegai Gasa, ari menara jaga sampai kuta ke bisi dinding ti teguh.*
9 Ba taun ti keempat Raja Hesekiah merintah, Raja Salmaneser ari Asiria nyerang Samaria lalu berengkah ngepung kuta nya. Nya meh taun ti ketujuh raja Israel ke benama Hoshea anak Elah merintah.
10 Nyauka tiga taun udah nya, sida mujur nguasa kuta Samaria. Utai nya nyadi ba taun ti keenam Raja Hesekiah merintah, iya nya taun ti kesemilan Raja Hoshea ari Israel merintah.
11 Udah nya, raja Asiria nangkap orang Israel lalu nabanka sida ngagai Asiria. Iya ngasuh sida diau ba Halah, ba Habor ke semak enggau Sungai Gosan, enggau ba kuta-kuta orang Media.
12 Utai nya nyadi laban sida enggai mendingka Petara sida, Jehovah. Sida majak ngelanggar sempekat Iya, lalu sida enggai ngasika pesan Jehovah ke udah dipadahka nengah nembiak Iya, Moses. Sida enggai mendingka Iya sereta enggai ngasika Iya.
13 Ba taun ke-14 Raja Hesekiah merintah, Raja Senakerip ari Asiria nyerang semua kuta ke bisi dinding ti teguh ba Judah. Iya mujur nguasa kuta-kuta nya.
14 Nyadi, Raja Hesekiah ari Judah pan ngirumka pesan tu ngagai raja Asiria ba Lakis: “Aku meh ke salah. Anang nyerang aku agi. Aku deka meri nuan nama-nama utai ke dipinta nuan.” Raja Asiria pan ngasuh Raja Hesekiah ari Judah mayar denda 300 talenta* pirak enggau 30 talenta emas.
15 Hesekiah pan meri semua pirak ke bisi ba Rumah Jehovah enggau ba endur alai nyimpan reta ba istana.
16 Maya nya, Hesekiah ngerebakka pintu enggau bingkai pintu Rumah Sembiang Jehovah ke udah dilapis iya ngena emas, lalu meri semua nya ngagai raja Asiria.
17 Udah nya, raja Asiria ngasuh siku Tartan,* siku Rabsaris,* siku Rabsakeh,* enggau seraban soldadu ti besai ari Lakis mansang ngagai Raja Hesekiah ba Jerusalem. Sida mansang ngagai Jerusalem lalu datai ba siti saluran ai. Nya meh jalai ai ke datai ari Kolam Atas. Saluran ai nya semak enggau jalai besai ke nuju ngagai endur alai orang betuchi.
18 Sida ngangauka raja pansut, tang Eliakim anak Hilkiah, Sebna, enggau Joah anak Asaf ke pansut betemu enggau sida. Eliakim nya orang ke ngemataka istana, Sebna nya sekretari, lalu Joah nya orang ke nulis rekod.
19 Rabsakeh madah ngagai sida: “Padahka tu ngagai Hesekiah: ‘Tu meh utai ke dipadahka raja ti amat bekuasa, raja Asiria: “Nama utai ke ngasuh kita yakin?
20 Nuan madah nuan bisi pelan enggau kuasa kena beperang. Tang semua nya jaku ngapa! Nuan pechayaka sapa sampai nuan berani ngelaban aku?
21 Kita ngarapka orang Ejip nulung kita, tang Ejip baka batang rumput ke udah redak lalu deka ngachuk tapa jari orang ke bepanggai ba iya. Nya meh penyadi ngagai orang ke bepanggai ba raja Ejip ke dikumbai Firaun.
22 Tang enti kita madah ngagai aku: ‘Kami arapka Petara kami, Jehovah.’ Endaka Hesekiah empu ke nganchurka endur alai nyembah Iya enggau alta Iya? Endaka Hesekiah empu ke madah ngagai orang Judah enggau Jerusalem: ‘Kita mesti besugang ba alta ke bisi ba Jerusalem aja’?”’
23 Betuie meh enggau tuan aku, raja Asiria. Tuan aku madah: Aku deka meri nuan 2,000 iku kuda enti nuan ulih tegigaka chukup orang kena nepan semua kuda nya.
24 Enti sema Ejip meri nuan kerita kuda enggau orang ke nepan kuda, ulih kini nuan ngalahka siku aja pegawai aku ke pemadu baruh pangkat?
25 Kumbai nuan nadai pemendar ari Jehovah aku kitu? Jehovah Empu ke madah ngagai aku: ‘Serang lalu anchurka menua tu.’”
26 Udah nya, Eliakim anak Hilkiah, Sebna, enggau Joah madah ngagai Rabsakeh: “Kami minta nuan bejaku ngena jaku Aramaik* enggau kami, laban kami meretika jaku nya. Anang ngena jaku orang Judah, laban semua orang ke ba atas dinding kuta nya mending magang.”
27 Tang ku Rabsakeh madah ngagai sida: “Kita ngumbai tuan aku nganjung aku bejaku enggau kita sereta enggau tuan kita aja? Enda. Aku madahka semua tu ngagai sida ke duduk ba dinding kuta mega, ke deka makai tai diri empu enggau ngirup ai kemi diri empu sama enggau kita!”
28 Udah nya, Rabsakeh bejaku enggau nyawa ti inggar ngena jaku orang Judah. Ku iya: “Pendingka meh jaku raja Asiria ti amat bekuasa.
29 Ku raja madah: ‘Anang ngelakka Hesekiah nipu kita laban iya enda ulih nyelamatka kita ari aku.
30 Iya engka madah: “Jehovah tentu deka nyelamatka kitai lalu kuta tu enda diserahka ngagai raja Asiria.” Anang nejuka jaku Hesekiah ngasuh kita pechayaka Jehovah.
31 Anang mendingka Hesekiah laban raja Asiria madahka: “Ngalahka diri aja, lalu bebaik meh enggau aku. Nya baru kita deka makai buah anggur ari pun anggur kita empu enggau buah ara ari pun kayu ara kita empu. Kita deka ngirup ai ari telaga kita empu.
32 Aku deka mai kita ngagai menua ke baka menua kita. Menua nya bisi mayuh bijirin, wain ti baru, pemakai, kebun anggur, pun kayu kana, enggau madu. Enti kita ngereja utai ke diasuh aku, kita enda mati, tang kita deka terus idup. Hesekiah madah: ‘Jehovah deka nyelamatka kitai.’ Anang mendingka iya. Bula iya nya!
33 Bisi ka petara bansa bukai nyelamatka menua sida ari raja Asiria?
34 Ni petara orang Hamat enggau orang Arpat? Ni petara orang Separbaim, orang Hena, enggau orang Iwah? Bisi sida nyelamatka Samaria ari aku?
35 Ni petara ke udah nyelamatka menua sida ari aku? Kita ngumbai Jehovah deka nyelamatka Jerusalem?”’”
36 Tang orang ke ba dia enda bemunyi, lalu sida nadai nyaut iya laban raja udah madah: “Anang nyaut iya.”
37 Udah nya, Eliakim anak Hilkiah ke nyadi orang ke ngemataka istana, Sebna ke nyadi sekretari, enggau Joah anak Asaf ke nyadi orang ke nulis rekod lalu nyarikka gari diri. Sida datai betemu enggau Hesekiah, lalu madahka iya utai ke dipadahka Rabsakeh.
Nota Kaki
^ Nama pandak Abijah.
^ Tauka “nunu pemeri nyentukka asap niki ke atas.”
^ Tauka “patung ular temaga.”
^ Iya nya, ba semua endur, enda ngira ba endur ke bisi mayuh orang tauka mimit orang.
^ Peda Rujukan B14.
^ Tauka “ketuai soldadu.”
^ Tauka “ketuai pegawai istana.”
^ Tauka “ketuai ke nyaga ai irup raja.”
^ Tauka “jaku orang Siria.”
