2 Raja 21:1-26
21 Manasi beumur 12 taun lebuh iya berengkah nyadi raja, lalu iya merintah ba Jerusalem pengelama 55 taun. Nama indai iya Hepsibah.
2 Manasi ngereja utai ti jai ba mata Jehovah, baka pengawa ke suah dikereja bansa bukai ke udah diburu Jehovah ari Israel.
3 Iya nirika baru endur alai orang nyembah petara pelesu* ke udah dianchurka apai iya, Hesekiah. Iya ngaga alta ke Baal sereta ngaga tiang kayu keramat, baka ke udah digaga Raja Ahap ari Israel. Iya besugang lalu nyembah semua utai ke ba langit.
4 Taja pan Jehovah kala madah: “Aku deka ngengkahka nama Aku ba Jerusalem,” tang Manasi ngaga alta ba dalam Rumah Jehovah.
5 Ba dua iti laman Rumah Jehovah, iya ngaga alta kena nyembah semua utai ke ba langit.
6 Iya mega nunu anak lelaki iya empu, ngereja pengawa ilmu sihir,* betilitka nasit kena nemu utai ke deka nyadi, sereta ngelantik manang enggau orang ke nemu nujum.* Manasi ngereja mayuh utai ti jai ba mata Petara Jehovah, lalu nya ngasuh Petara ringat.
7 Iya ngengkahka patung, iya nya tiang kayu keramat, ba Rumah Sembiang, taja pan Jehovah kala madah ngagai David enggau anak iya, Solomon, munyi tu: “Aku deka ngengkahka nama Aku ba Jerusalem enggau ba rumah tu belama iya. Nya meh endur ke udah dipilih Aku ari semua raban bansa Israel.
8 Enti orang Israel ngasika semua pesan Aku, iya nya semua Adat ke dipadahka nembiak Aku, Moses, ngagai sida, Aku enda agi muru sida pansut ari menua ke udah diberi Aku ngagai aki ini sida.”
9 Tang orang Israel enda ngasi, lalu Manasi majak nguluka sida limpang nyentukka sida balat ngereja penyai. Penyai sida balat agi ari penyai bansa bukai ke dipunaska Jehovah lebuh sida datai nguasa menua orang nya.
10 Jehovah bejaku munyi tu nengah bala nembiak Iya, iya nya bala nabi Iya:
11 “Raja Manasi ari Judah udah ngereja semua utai ke dipegedika Aku. Iya jai agi ari semua orang Amor ke idup sebedau iya. Ngena patung ti kamah,* iya udah ngasuh orang Judah bedosa.
12 Nya alai, tu meh utai ke dipadahka Jehovah, Petara orang Israel: ‘Aku deka ngenataika penulah ti balat ngagai Jerusalem enggau Judah. Sapa-sapa ke ninga pasal utai nya deka tekenyit.
13 Tali penyukat ke udah dikena Aku ba Samaria enggau buah lampa* ke udah dikena Aku ba ruang bilik Ahap, deka dikena Aku ba Jerusalem. Aku deka meresi Jerusalem, baka orang ke ngelap mangkuk sampai beresi lalu mangkuk nya ditungkupka.
14 Aku deka ninggalka nembiak Aku ke agi bisi ba menua tu, lalu nyerahka sida ngagai bala munsuh. Sida deka ditaban, lalu reta sida deka dirampas bala munsuh sida.
15 Tu ketegal sida ngereja utai ti jai ba mata Aku, lalu majak ngemediska ati Aku kenyau ari maya aki ini sida pansut ari Ejip sampai ke seharitu.’”
16 Manasi ukai aja bedosa ketegal udah ngasuh orang Judah ngereja utai ti jai ba mata Jehovah. Iya mega munuh mayuh amat orang ke nadai penyalah, nyentukka darah sida ngemenuhka Jerusalem ari ujung siti ngagai ujung siti.
17 Sejarah bukai pasal Manasi, iya nya pasal semua utai ke udah digaga iya sereta dosa iya, bisi ditulis ba bup sejarah pasal jeman bala raja Judah.
18 Pengujung iya, Manasi mati lalu dikuburka ba taman istana iya, iya nya ba taman Uza. Anak lelaki iya, Amon, nganti iya nyadi raja.
19 Amon beumur 22 taun lebuh iya berengkah nyadi raja. Iya merintah ba Jerusalem pengelama dua taun. Nama indai iya Mesulemet. Mesulemet nya anak Harus ari Jotbah.
20 Amon majak ngereja utai ti jai ba mata Jehovah baka apai iya, Manasi.
21 Iya enda ngetu nunda pengawa ke dikereja apai iya. Iya majak nyembah sereta besugang ngagai patung ti kamah ke disembah apai iya.
22 Iya ninggalka Jehovah, Petara aki ini iya, lalu enda idup nitihka jalai Jehovah.
23 Pengujung iya, bala pegawai Amon bepakat ngelaban iya lalu munuh iya ba istana iya empu.
24 Tang, rayat ba menua nya munuh semua orang ke bepakat ngelaban Raja Amon. Udah nya, sida ngasuh anak lelaki Raja Amon ke benama Josiah nyadi raja.
25 Sejarah bukai pasal Amon, iya nya pasal utai ke udah digaga iya, bisi ditulis ba bup sejarah pasal jeman bala raja Judah.
26 Amon dikuburka ba kubur iya empu ba taman Uza, lalu anak lelaki iya ke benama Josiah nganti iya nyadi raja.
Nota Kaki
^ Jaku Asal, “endur ti tinggi.”
^ Peda Penerang Leka Jaku, “Ilmu sihir.”
^ Pengawa ke ngasuh orang nemu utai ke deka nyadi.
^ Leka jaku Hebrew nya engka bekaul enggau leka jaku “tai” kena nunjukka asai ati ti balat keji.
^ Perengka tu dikena nentuka utai ke didirika nya singit tauka enda.
