2 Raja 22:1-20
22 Josiah beumur lapan taun lebuh iya berengkah nyadi raja. Iya merintah ba Jerusalem pengelama 31 taun. Nama indai iya Jedidah. Jedidah nya anak Adayah ari Boskat.
2 Josiah ngereja utai ti betul ba mata Jehovah. Iya nunda utai ke digaga aki iya, David. Iya enda limpang ari adat Petara.*
3 Ba taun ke-18 Raja Josiah merintah, raja ngasuh sekretari iya ke benama Sapan anak Asaliah datai ngagai Rumah Jehovah. Sapan nya uchu Mesulam. Ku raja madah ngagai Sapan:
4 “Alai nuan betemu enggau Imam Besai Hilkiah, lalu asuh iya ngumpul semua duit ke udah dibai ngagai Rumah Jehovah, iya nya duit ke udah digumpul orang ke nyaga pintu ari bala rayat.
5 Udah nya, beri duit nya ngagai sida ke ngemataka pengawa ngaduka Rumah Jehovah. Asuh sida meri duit nya ngagai bala pekereja ke ngaduka utai ti jai ba Rumah Jehovah,
6 iya nya ngagai tukang kayu, tukang batu, enggau orang ke ngaga bengunan. Sida deka ngena duit nya kena meli kayu enggau batu ke udah diputung kena ngaduka utai ti jai ba Rumah Sembiang.
7 Anang nanya baka ni chara sida ngena duit nya, laban sida ulih dikearapka.”
8 Udah nya, Imam Besai Hilkiah madah ngagai sekretari raja ke benama Sapan: “Aku bisi tetemuka bup Adat ba Rumah Jehovah.” Hilkiah pan meri bup nya ngagai Sapan, lalu Sapan berengkah macha bup nya.
9 Udah nya, Sapan betemu enggau raja lalu madah: “Bala pegawai nuan udah ngambi duit ke bisi ba Rumah Jehovah, lalu sida udah meri nya ngagai orang ke ngemataka pengawa ngaduka rumah nya.”
10 Sapan mega madah ngagai raja: “Bisi siti bup ke diberi Imam Hilkiah ngagai aku.” Sapan lalu berengkah macha bup nya ba depan raja.
11 Pengudah raja ninga utai ke dipadah ba bup Adat, iya terus nyarikka gari diri.
12 Udah nya, raja meri pesan tu ngagai Imam Hilkiah, Ahikam anak Sapan, Akbor anak Mikaiah, Sapan ke nyadi sekretari, enggau pegawai raja ke benama Asayah:
13 “Alai kita nanya Jehovah ngarika aku, ngarika bala rayat, sereta ngarika serata Judah pasal utai ke dipadah ba bup ke ditemu tu. Aki ini kitai enda ngasi sereta enda ngereja utai ke dipadah dalam bup tu. Nya kebuah Jehovah balat amat ringat ngagai kitai.”
14 Nya alai, Imam Hilkiah, Ahikam, Akbor, Sapan, enggau Asayah mansang betemu enggau siku nabi indu ke benama Huldah. Huldah diau ba Wilayah Kedua ba Jerusalem, lalu ba dia meh sida bejaku enggau iya. Huldah nya bini Salum anak Tikbah. Salum nya uchu Harhas. Salum nya orang ke ngemataka endur nyimpan gari.
15 Ku Huldah madah ngagai sida: “Tu meh utai ke dipadahka Jehovah, Petara orang Israel: ‘Padahka ngagai orang ke ngasuh kita kitu:
16 “Tu meh utai ke dipadahka Jehovah: ‘Aku deka ngasuh endur tu enggau orang ke diau ba endur tu ditinggang penusah, baka ke udah dipadahka ba dalam bup ke dibacha raja Judah.
17 Sida udah ninggalka Aku lalu nunu pemeri* ngagai petara bukai. Semua utai ke digaga sida ngemediska ati Aku. Aku balat amat ringat ngagai endur tu, lalu pengeringat Aku enda nemu padam.’”
18 Tang, padah ngagai raja Judah ke udah ngasuh kita nanya Jehovah: “Tu meh utai ke dipadahka Jehovah, Petara orang Israel: ‘Nuan udah ninga utai ke dipadah ba bup nya.
19 Aku udah madah, orang ke diau ba endur tu deka disumpah, lalu orang ke meda sida deka berasai takut. Tang, pengudah nuan ninga utai ke disebut Aku pasal endur tu enggau orang ke diau ba endur tu, nuan nesal ati sereta ngemaruhka diri ba depan Aku, Jehovah. Nuan nyarikka gari diri lalu nyabak ba depan Aku. Aku mega bisi ningaka sampi nuan, ku Jehovah.
20 Nuan deka mati enggau tenang lalu dikuburka. Mata nuan enda meda semua penusah ke deka dikenataika Aku ba endur tu.’”’” Udah nya, sida mai pesan nya ngagai raja.
Nota Kaki
^ Tauka “enda limpang ke kiba tauka ke kanan.”
^ Tauka “nunu pemeri nyentukka asap niki ke atas.”
