2 Raja 24:1-20
24 Maya jeman Jehoyakim merintah, Raja Nebukadnesar ari Babilon datai nyerang iya, lalu Jehoyakim nyadi ulun Nebukadnesar pengelama tiga taun. Tang udah nya, iya angkat ngelaban Nebukadnesar.
2 Jehovah lalu ngasuh bala perumpak ari Kaldea, Siria, Moap, enggau Amon datai nyerang iya. Jehovah majak ngasuh sida nyerang Judah ngambika Judah dipunaska, baka ke dipadahka Iya nengah bala nabi Iya.
3 Semua utai tu tentu nyadi nitihka pesan Jehovah. Iya deka muai Judah ngambika nadai agi dipeda Iya ketegal semua dosa Manasi.
4 Manasi mega udah munuh orang ke nadai penyalah nyentukka darah sida ngemenuhka Jerusalem, lalu Jehovah enggai ngampunka Judah.
5 Sejarah bukai pasal Jehoyakim, iya nya pasal semua utai ke udah digaga iya, bisi ditulis ba bup sejarah pasal jeman bala raja Judah.
6 Udah nya, Jehoyakim mati lalu anak lelaki iya, Jehoyakin, nganti iya nyadi raja.
7 Kenyau ari maya nya, raja Ejip nadai agi ngasuh bala soldadu iya pansut ari menua iya, laban raja Babilon udah ngambi semua utai ke diempu iya ari Wadi* Ejip sampai ngagai Sungai Eupratis.
8 Jehoyakin beumur 18 taun lebuh iya nyadi raja, lalu iya merintah pengelama tiga bulan ba Jerusalem. Nama indai iya Nehusta. Nehusta nya anak Elnatan ari Jerusalem.
9 Jehoyakin majak ngereja utai ti jai ba mata Jehovah, nitihka semua utai ke udah digaga apai iya.
10 Maya nya, bala pegawai Raja Nebukadnesar ari Babilon nyerang Jerusalem lalu ngepung kuta nya.
11 Lebuh sida benung ngepung kuta nya, Raja Nebukadnesar ari Babilon pan datai kia.
12 Raja Jehoyakin ari Judah lalu nyerahka diri ngagai raja Babilon sama enggau indai iya, bala pegawai iya, bala pegawai tinggi iya, enggau bala pegawai istana iya. Raja Babilon pan nangkap iya ba taun kelapan raja Babilon nya merintah.
13 Udah nya, raja Babilon ngambi semua reta ba Rumah Jehovah enggau ba istana. Iya ngambi semua pekekas emas ba Rumah Jehovah ke udah digaga raja Israel ke benama Solomon, lalu mutung pekekas nya nyadi beberapa iti begian. Utai tu nyadi baka ke udah dipadahka Jehovah.
14 Iya mega nangkap semua orang Jerusalem, nyengkaum semua pegawai tinggi, semua pahlawan ti kering, semua orang ke nemu betukang, enggau semua tukang besi.* Penyampau orang ke ditabanka iya nya bisi 10,000 iku orang. Semua orang ditabanka iya magang. Semina orang ke pemadu miskin aja ditinggalka iya.
15 Raja Nebukadnesar mai Jehoyakin ngagai Babilon, nyengkaum indai Jehoyakin, bala bini iya, bala pegawai istana iya, enggau orang ke penting ari Jerusalem.
16 Raja Babilon mega nangkap 7,000 iku pahlawan, nyengkaum 1,000 iku orang ke nemu betukang enggau tukang besi,* lalu mai sida ngagai Babilon. Semua sida orang ti kering sereta landik beperang.
17 Raja Babilon ngelantik Mataniah nyadi raja kena nganti Jehoyakin. Mataniah nya aya Jehoyakin. Raja Babilon mega nukar nama Mataniah nyadi Sedekiah.
18 Sedekiah beumur 21 taun lebuh iya nyadi raja, lalu iya merintah pengelama 11 taun ba Jerusalem. Nama indai iya Hamutal. Hamutal nya anak Jeremiah ari Libnah.
19 Sedekiah majak ngereja utai ti jai ba mata Jehovah, nitihka semua utai ke udah digaga Jehoyakim.
20 Jehovah balat amat ringat. Nya alai, semua utai tu nyadi ba Jerusalem enggau ba Judah, nyentukka Iya muai sida ngambika nadai agi dipeda Iya. Udah nya, Sedekiah angkat ngelaban raja Babilon.
Nota Kaki
^ Peda Penerang Leka Jaku.
^ Tauka engka, “orang ke ngaga benteng.”
^ Tauka engka, “orang ke ngaga benteng.”
