2 Raja 3:1-27
3 Ba taun ke-18 Raja Jehosapat merintah Judah, Jehoram anak Ahap nyadi raja Israel ba Samaria, lalu iya merintah pengelama 12 taun.
2 Iya majak ngereja utai ti jai ba mata Jehovah. Taja pia, iya enda sejai apai indai iya, laban iya ngeruntuhka tiang batu keramat Baal ke digaga apai iya.
3 Tang, iya ngereja dosa ti sama baka ke digaga Jeroboam anak Nebat, ke udah ngasuh orang Israel bedosa. Iya enggai badu ngereja dosa nya.
4 Raja Mesa ari Moap bisi nupi bedus. Iya biasa meri 100,000 iku anak bedus enggau 100,000 iku bedus lelaki ke bedau diguntin bulu ngagai raja Israel kena iya mayar chukai.*
5 Tang, pengudah Ahap mati, raja Moap terus angkat ngelaban raja Israel.
6 Nya alai, Raja Jehoram mupuk ari Samaria, lalu ngempuruka semua soldadu Israel.
7 Iya mega ngirumka pesan ngagai Jehosapat, iya nya raja Judah. Ku iya: “Raja Moap angkat ngelaban aku. Kati nuan deka enggau aku beperang ngelaban Moap?” Ku Jehosapat nyaut: “Au, aku deka enggau nuan. Bala aku deka mupuk enggau bala nuan. Raban kuda aku deka mupuk enggau raban kuda nuan.”
8 Udah nya, Jehosapat nanya: “Ni bagi jalai ke deka dikena kitai?” Ku Jehoram nyaut: “Kitai deka nengah menua puang Edom.”
9 Raja Israel pan mupuk enggau raja Judah enggau raja Edom. Pengudah tujuh hari sida bejalai, sida nyau nadai agi ai ke bala soldadu enggau bala jelu ke dibai sida.
10 Ku raja Israel madah: “Akai, pedis tu! Jehovah udah mai kitai tiga ngambika diserahka ngagai orang Moap!”
11 Jehosapat lalu madah: “Nadai nabi Jehovah ba ditu ke ulih nulung kitai nanya Jehovah?” Udah nya, siku ari ulun raja Israel nyaut: “Bisi. Nama iya Elisa anak Sapat. Suba, iya penulung Elijah.”*
12 Jehosapat lalu madahka: “Jehovah bejaku nengah iya.” Nyadi, raja Israel, Jehosapat, enggau raja Edom pan mupuk betemu enggau Elisa.
13 Ku Elisa bejaku ngagai raja Israel: “Nama kebuah nuan datai ngagai aku?* Uji nuan ngiga bala nabi apai nuan tauka bala nabi indai nuan.” Tang raja Israel nyaut iya: “Anang pia. Jehovah udah mai kami tiga ngambika diserahka ngagai orang Moap.”
14 Ku Elisa madah: “Aku besumpah atas nama Jehovah, ketuai soldadu serega sereta Petara ti idup, ke disembah aku, enti ukai ketegal Raja Jehosapat ari Judah, aku enggai meda nuan tauka kiruhka nuan.
15 Asuh orang ke nemu nebah belikan* datai kitu.” Lebuh orang nya berengkah nebah belikan, kuasa Jehovah datai ngagai Elisa.
16 Ku Elisa bejaku: “Tu meh utai ke dipadahka Jehovah: ‘Tumbak parit ba lebak* tu,
17 laban tu meh utai ke dipadahka Jehovah: “Kita nadai meda ribut lalu kita nadai meda ujan, tang lebak tu deka penuh enggau ai. Kita enggau jelu kita deka ngirup ai nya.”’
18 Semua utai tu senang aja ba Jehovah, lalu Iya mega deka nyerahka orang Moap ngagai kita.
19 Kita mesti nganchurka tiap iti kuta ke dikelingi dinding ti teguh sereta nganchurka tiap iti kuta ti penting. Kita mesti nebang tiap iti pun kayu ti manah, lalu kita mesti nutup semua mata ai. Kita mega mesti nikauka batu ngagai semua tanah ti manah, ngambika tanah nya enda mansutka asil.”
20 Maya pagi hari, iya nya lebuh maya pemeri bijirin diserahka, tiba-tiba ai datai tunga ari Edom lalu lebak nya penuh enggau ai.
21 Semua orang Moap ninga bala raja nya udah datai deka belaban enggau sida. Nya alai, sida ngangauka semua lelaki ke ulih mai senyata, lalu sida bejaga ba sempadan menua sida.
22 Lebuh orang Moap dani tumu pagi, mata panas manchar ngagai ai nya, lalu orang Moap meda ai ke ba seberai sida mirah baka darah.
23 Ku sida madahka: “Darah nya! Bala raja nya tentu udah bebunuhka pangan diri ngena pedang. O orang Moap, bah, aram kitai ngerampas barang sida!”
24 Lebuh sida datai ba kem orang Israel, orang Israel pan angkat lalu nyerang sida. Nyadi, orang Moap pan ngerarika diri ngagai menua sida. Tang, orang Israel begagaika sida lalu munuh sida.
25 Orang Israel ngeruntuhka kuta orang Moap. Tiap iku sida nikauka batu ngagai tiap iti tanah ti manah, sampai tanah nya penuh laban batu. Sida nutup semua mata ai, lalu nebang tiap iti pun kayu ti manah. Pengujung iya, semina dinding batu ba kuta Kir-hareset ke agi tinggal. Bala soldadu ngelingi kuta nya, lalu nikau batu ngena pangwang* sampai dinding nya runtuh.
26 Lebuh raja Moap nemu diri udah alah, iya lalu mai 700 iku soldadu ke bisi pedang nempuh barisan bala soldadu nuju ngagai raja Edom. Tang sida enda mujur.
27 Nyadi, iya pan ngambi anak tuai iya lalu nyerahka anak nya nyadika pemeri tunu ba atas dinding kuta. Nya meh anak lelaki ke deka nganti iya nyadi raja. Ketegal nya orang balat ringat ngagai Israel. Nya alai, bala soldadu nyurutka diri ari endur nya lalu pulai ngagai menua sida empu.
Nota Kaki
^ Tauka “ngagai raja Israel nyadika pemeri.”
^ Tauka “iya orang ke nuangka ai ngagai jari Elijah.”
^ Tauka “Nama sangkut paut aku enggau nuan?”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “wadi.”
^ Senyata ke betali ti dikena nikauka batu.
