Esra 3:1-13
3 Ba bulan ti ketujuh, orang Israel udah diau ba kuta sida empu. Maya nya, sida begelumu ba Jerusalem, lalu sida bisi tuju ti sama.
2 Jesua anak Jehosadak enggau bala imam ke bukai, sereta Serubabel anak Sheltil enggau bala iya ngaga alta* Petara Israel, ngambika sida ulih nyerahka pemeri tunu ba alta nya, sejalai enggau Adat ke dipadah nembiak Petara ti bendar, iya nya Moses.
3 Taja pan sida takutka orang ke diau ngelingi endur nya, tang sida agi tetap ngaga alta nya ba endur asal alta nya. Sida berengkah nyerahka pemeri tunu ngagai Jehovah ba alta nya maya pagi hari enggau lemai hari.
4 Udah nya, sida ngintu Pengerami Belangkau, nitihka utai ke udah ditulis ba Adat. Sida nyerahka pemeri tunu nitihka penyampau pemeri ke patut diserahka tiap hari.
5 Udah nya, sida nyerahka pemeri tunu ke patut seruran diserahka, pemeri ke pengerami bulan baru, sereta semua pengerami bukai ti kudus ke Jehovah. Sida mega nyerahka ngagai Jehovah pemeri sukarela ke diberi semua orang.
6 Berengkah ari hari keterubah, ba bulan ti ketujuh, sida nyerahka pemeri tunu ngagai Jehovah, taja pan asas Rumah Sembiang Jehovah bedau agi digaga.
7 Sida meri duit ngagai bala orang ke mutung batu enggau bala orang ke nemu betukang. Sida mega meri pemakai, ai irup, enggau minyak ngagai orang Sidon enggau orang Tirus, ke udah mai kayu sidar ari Lebanon ngagai Jopa. Orang Sidon enggau orang Tirus ngangkut kayu nya nengah jalai tasik, lalu sida bisi pemendar ari raja Persia ke benama Sairus.
8 Ba bulan ti kedua, dalam taun ti kedua, pengudah orang Israel datai ngagai Rumah Petara ti bendar ba Jerusalem, Serubabel anak Sheltil, Jesua anak Jehosadak enggau bala iya ke bukai, bala imam enggau orang Lewi, sereta semua sida ke udah pulai baru ngagai Jerusalem* berengkah bejalaika pengawa. Sida ngelantik orang Lewi ke beumur 20 taun ke atas ngambika ngemataka pengawa begagaka Rumah Jehovah.
9 Nyadi, Jesua, bala anak iya enggau bala iya, sereta Kadmiel enggau bala anak iya sama-sama ngemataka pengawa ngaga Rumah Petara ti bendar. Semua sida datai ari peturun Judah. Bala peturun Henadat, bala anak sida, enggau kaban belayan sida mega sama enggau ngemataka pengawa nya. Semua sida nya orang Lewi.
10 Pengudah bala pekereja tembu ngaga asas Rumah Sembiang Jehovah, bala imam pan ngena baju jubah rasmi sida lalu mai terumpit. Orang Lewi ke datai ari peturun Asaf mega bebaika simbal. Semua sida bediri lalu muji Jehovah nitihka utai ke diasuh David, raja Israel.
11 Sida berengkah muji sereta meri terima kasih ngagai Jehovah. Sida belagu nimbal pangan diri munyi tu: “Ketegal Iya manah, pengerindu Iya ti setia ngagai Israel meruan belama iya.” Udah nya, semua orang manjung enggau nyawa ti inggar muji Jehovah, laban asas Rumah Jehovah udah tembu digaga.
12 Mayuh ari bala imam, orang Lewi, enggau bala tuai suku nya orang ke udah tuai, ke kala meda Rumah Petara suba. Lebuh sida meda asas Rumah Petara udah digaga baru, sida nyabak enggau nyawa ti inggar, tang orang ke bukai manjung gaga ati.
13 Nadai orang nemu bagi munyi orang ke manjung gaga ati enggau munyi sabak, laban sida inggar amat nyentukka nyawa sida ulih didinga ari jauh.
