Esra 4:1-24
4 Munsuh orang Judah enggau orang Benjamin bisi ninga pasal orang benung ngaga Rumah Sembiang ke Jehovah, Petara orang Israel. Sida ke ngaga Rumah Sembiang nya orang ke udah pulai ari menua alai sida dibuai.
2 Bala munsuh nya pan beguai betemu enggau Serubabel enggau bala tuai suku lalu madahka: “Awakka kami enggau kita ngaga Rumah tu. Kami pan baka kita. Kami nyembah Petara kita lalu nyerahka pemeri ngagai Iya kenyau ari jeman Raja Asiria ke benama Esar-hadon. Iya meh ke udah mai kami kitu.”
3 Ku Serubabel, Jesua, enggau bala tuai suku orang Israel nyaut sida: “Kita nadai hak enggau kami ngaga Rumah ke Petara kami. Kami empu deka ngaga Rumah ke Jehovah, Petara orang Israel, baka ke diasuh Raja Sairus ari Persia.”
4 Udah nya, orang ba menua nya majak ngasuh orang Judah lemi semengat sereta putus asa, ngambika sida ngetu ngaga Rumah nya.
5 Sida ngupah bala penasihat* ngambika pelan orang Judah enda mujur. Sida ngereja nya sepemanjai timpuh Raja Sairus ari Persia merintah, nyentuk ngagai maya Raja Darius ari Persia merintah.
6 Lebuh Raja Ahasurus baru berengkah merintah, sida nulis jaku tuduh pasal orang Judah enggau orang Jerusalem.
7 Udah nya, maya jeman Raja Artaserses ari Persia merintah, Bislam, Mitredat, sereta Tabil enggau bala kaban iya, nulis surat ngagai Raja Artaserses. Sida ngalihka jaku dalam surat nya ngagai bansa jaku Aramaik, lalu surat nya ditulis ngena urup Aramaik.*
8 * Rehum enggau Simsai nulis surat ngagai Raja Artaserses kena ngelaban orang Jerusalem. Rehum nya siku pegawai perintah ke tinggi pangkat, lalu Simsai nya siku penulis. Tu utai ke dipadah ba surat nya:
9 (Surat tu ari Rehum, iya nya siku pegawai perintah ke tinggi pangkat, Simsai, iya nya siku penulis, enggau bala kaban seduai iya, iya nya bala hakim, bala pegawai ke bukai, bala sekretari, orang Erek, orang Babilon, enggau orang Elam ke diau ba Susa.
10 Surat tu mega datai ari bansa bukai ke udah ditangkap Asenapar ti tebilang enggau bemulia, iya nya sida ke ditabanka iya ngagai kuta-kuta ba Samaria, enggau ari orang bukai ke diau ba kawasan seberai Sungai Eupratis.*
11 Tu siti salinan surat ke dianjung sida.)
“Nuju Raja Artaserses, surat tu ari bala ulun nuan ke ba seberai Sungai Eupratis.
12 Kami deka madahka ngagai nuan, tuan raja, pasal orang Judah ke datai ari menua nuan. Sida udah datai ba Jerusalem, lalu benung nirika baru kuta Jerusalem. Orang ke diau ba kuta nya orang ke jai sereta rindu ngelaban. Sida nyauka tembu ngaga dinding kuta nya sereta ngaduka asas kuta nya.
13 Tuan raja, enti kuta nya tembu digaga lalu dinding kuta nya tembu didirika, sida tentu enda mayar chukai* lalu duit perintah* deka bekurang.
14 Kami madahka pasal tu ngagai tuan raja laban kami enggai meda tuan raja rugi. Nambahka nya, kami nerima gaji ari istana.*
15 Enti tuan raja mansik bup rekod pasal peturun tuan raja, tuan raja deka tetemuka rekod pasal orang ke diau ba kuta nya sigi orang ke rindu ngelaban perintah. Sida suah ngasuh penyarut nyadi ngagai bala raja enggau wilayah ke dipegai tuan raja. Endang ari kelia menya sida udu ngelaban perintah. Nya meh kebuah kuta nya dianchurka.
16 Kami madahka tu ngagai tuan raja, laban enti kuta nya didirika baru lalu dinding iya tembu digaga, tuan raja enda agi ulih merintah kawasan ke ba seberai Sungai Eupratis.”
17 Raja pan malas surat ke dikirumka Rehum, Simsai, bala kaban seduai iya ke diau ba Samaria, enggau orang ke diau ba kawasan seberai Sungai Eupratis. (Rehum nya siku pegawai perintah ke tinggi pangkat, lalu Simsai nya siku penulis.) Tu utai ke dipadah dalam surat nya:
“Tabi ke semua kita!
18 Surat rasmi ke dikirumka kita udah terang dibacha* ba depan aku.
19 Aku udah ngasuh orang nasat pekara nya. Endang amat, ari suba orang ba kuta nya rindu ngelaban bala raja. Sida endang suah angkat ngelaban sereta ngasuh penyarut nyadi ba kuta nya.
20 Suba, bisi mayuh raja ke bekuasa ke kala merintah ba Jerusalem enggau semua kawasan ke ba seberai Sungai Eupratis. Bala raja nya minta orang mayar chukai* ngagai sida.
21 Nya alai, gaga siti atur ke ngasuh bala orang nya badu nirika baru kuta nya, nyentukka ngagai maya aku meri sida atur ti baru.
22 Kita mesti ingat ngereja utai ke diasuh aku tu, ngambika perintah aku enda majak rugi.”
23 Pengudah surat rasmi ari Raja Artaserses dibacha ngagai Rehum, Simsai, enggau bala kaban seduai iya, sida pan jampat-jampat mansang ngagai Jerusalem lalu maksa orang Judah ngetu gawa.
24 Kenyau ari maya nya, pengawa nirika Rumah Petara ba Jerusalem diketuka, lalu Rumah nya enda digaga nyentuk ngagai taun ti kedua Raja Darius ari Persia merintah.
Nota Kaki
^ Tauka “penyanding penemu.”
^ Tauka engka, “ditulis dalam bansa jaku Aramaik lalu dikalihka ngagai bansa jaku bukai.”
^ Asal iya, Esr 4:8 ngagai 6:18 ditulis dalam bansa jaku Aramaik.
^ Merujuk ngagai kawasan ba sepiak barat Sungai Eupratis.
^ Dalam jaku asal, tu merujuk ngagai tiga jenis chukai, iya nya chukai pala, chukai barang, enggau chukai jalai alun.
^ Jaku Asal, “bala raja.”
^ Jaku Asal, “kami makai garam ari istana.”
^ Tauka engka, “udah dikalihka sereta dibacha.”
