Ester 2:1-23
2 Nyau kelama, Raja Ahasurus pan nadai agi ringat. Iya teingatka utai ke udah digaga Vasti sereta pemutus iya ke deka ngukum Vasti.
2 Udah nya, bala penulung raja lalu madahka: “Tuan raja, nuan patut ngasuh orang ngiga ke nuan bala indu dara ke agi biak sereta bajik.
3 Pilih meh orang ari semua wilayah ke dipegai nuan, lalu asuh sida mai semua indu dara ke agi biak sereta bajik ngagai rumah indu* ke ba istana ba Sushan. Serahka meh sida ngagai Hegai, iya nya pegawai tinggi* raja sereta orang ke ngemataka bala indu. Bala indu nya patut diberi rawatan, ngambika sida ulih nyadi bajik agi.*
4 Indu ke pemadu dikerinduka raja deka nyadi kuin kena nganti Vasti.” Raja rinduka cadangan nya, lalu iya pan ngereja nya.
5 Ba istana ke ba Sushan, bisi siku lelaki Judah ke benama Mordikai anak Jair. Iya uchu Shimei, lalu iya mega ichit siku orang Benjamin ke benama Kish,
6 ke udah ditabanka raja Babilon ke benama Nebukadnesar. Nebukadnesar mega udah nabanka raja Judah ke benama Jekoniah* sereta orang bukai ari Jerusalem.
7 Mordikai nya penyaga Hadasah,* ke mega dikumbai Ester. Ester nya petunggal iya. Ketegal apai indai Ester udah nadai, Mordikai lalu ngiru Ester nyadika anak. Ester nya indu ti bajik sereta manah raras tubuh.
8 Lebuh atur enggau pesan raja ditusui, mayuh indu dara ke agi biak, nyengkaum Ester, dibai ngagai istana ba Sushan. Semua bala indu nya dijaga Hegai, iya nya orang ke ngemataka bala indu.
9 Hegai rinduka* Ester. Iya pan ngasuh Ester nerima rawatan ngambika bajik agi.* Iya mega nyediaka pemakai ti istimewa ke Ester. Kelimpah ari nya, iya milih tujuh iku indu ke agi biak, ke endang ari istana raja kena ngintu Ester. Iya ngasuh Ester enggau bala indu nya pindah ngagai endur ti pemadu manah ba rumah indu.*
10 Ester nadai madahka nama-nama utai pasal bansa iya tauka pasal kaban belayan iya, laban Mordikai enda ngasuh iya madah ngagai sapa-sapa pasal nya.
11 Tiap hari, Mordikai bejalai ba laman ke ba depan rumah indu,* laban iya ka nemu baka ni gaya Ester enggau nama utai ke nyadi ngagai Ester.
12 Pengudah tiap iku indu tembu nerima rawatan* pengelama 12 bulan, nya baru sida ulih betemu enggau Raja Ahasurus nitihka giliran sida. Maya rawatan nya, pengelama enam bulan, sida ngena minyak mur, lalu enam bulan da agi, sida ngena minyak balsam* enggau minyak ke bukai.
13 Maya giliran sida betemu enggau raja, sida ulih minta nama-nama utai ari rumah indu,* lebuh sida deka mansang ngagai istana raja.
14 Maya lemai hari, siku indu deka tama, lalu pagi hari siti, iya deka pulai ngagai rumah indu* ti kedua, ke dikemataka Sasgas. Sasgas nya pegawai tinggi raja, ke mega orang ke ngemataka bala gundik. Udah nya, indu nya enda betemu enggau raja nya agi. Iya ulih betemu enggau raja nya baru, enti raja nya rinduka iya lalu ngangauka nama iya.
15 Maya pan nyau datai alai Ester anak Abihail patut betemu enggau raja. Iya nadai minta nama-nama utai, kelimpah ari utai ke udah disediaka pegawai tinggi raja ke benama Hegai, ke mega orang ke ngemataka bala indu. Semua orang ke meda Ester rinduka iya. (Abihail nya aya Mordikai. Mordikai nya ke ngiru Ester nyadika anak iya.)
16 Ester dibai betemu enggau Raja Ahasurus ba istana kena bulan ti ke-10, iya nya bulan Tebet,* ba taun ti ke-7 Raja Ahasurus merintah.
17 Raja lalu sayauka Ester lebih agi ari semua indu ke bukai. Enti dibandingka enggau indu dara ke bukai, iya rindu agi ke* Ester. Nya alai, raja ngengkahka makota* diraja ba pala Ester lalu ngelantik iya nyadi kuin kena nganti Vasti.
18 Raja pan nyediaka pengerami makai besai ke Ester, lalu iya mai semua bala tuai iya enggau bala pegawai iya ngagai pengerami nya. Udah nya, raja meri pengelepas* ngagai rayat ba semua wilayah ke dipegai iya. Iya meri mayuh pemeri ngagai bala rayat laban iya amat kaya.
19 Lebuh bala indu dara* begelumu kali kedua, Mordikai benung duduk ba pintu istana raja.
20 Ester nadai madah ngagai orang pasal bansa iya enggau pasal kaban belayan iya, baka ke diasuh Mordikai. Ester seruran ngereja utai ke diasuh Mordikai, baka iya ke udah ngasika Mordikai lebuh iya agi enggau Mordikai.
21 Bisi sekali, lebuh Mordikai benung duduk ba pintu istana raja, bisi dua iku pegawai istana ke benama Biktan enggau Teres deka munuh Raja Ahasurus, laban seduai iya ringat ngagai raja nya. Seduai iya orang ke nyaga pintu istana.
22 Mordikai nemu pasal nya lalu iya pan terus madah ngagai Kuin Ester. Udah nya, Ester madah pasal nya ngagai raja ngarika Mordikai.
23 Pekara nya dipansik lalu ditemu amat. Nya alai, dua iku pegawai nya pan digantung ba tiang. Semua nya ditulis ba bup sejarah ba depan raja.
Nota Kaki
^ Tauka “ngagai harem.”
^ Peda Penerang Leka Jaku, “Sida-sida.”
^ Tauka “patut diurut.”
^ Reti nya “Mirtel.”
^ Tauka “ngayanka pengerindu ti setia ngagai.”
^ Tauka “ngasuh Ester diurut.”
^ Tauka “ba harem.”
^ Tauka “depan harem.”
^ Tauka “tembu diurut.”
^ Peda Penerang Leka Jaku.
^ Tauka “ari harem.”
^ Tauka “ngagai harem.”
^ Peda Rujukan B15.
^ Tauka “ngayanka pengerindu ti setia.”
^ Tauka “serban.”
^ Reti iya enda ibuh agi mayar chukai tauka meri pemeri, enda ibuh enggau beperang, dilepaska ari jil, tauka semua nya sekali.
^ Tauka “indu ke agi biak.”
