Ester 8:1-17
8 Ba hari nya, Raja Ahasurus meri semua reta Haman, iya nya munsuh orang Judah, ngagai Kuin Ester. Mordikai lalu dibai betemu enggau raja, laban Ester madahka Mordikai nya kaban belayan iya.
2 Udah nya, raja muka tinchin iya lalu meri tinchin nya ngagai Mordikai. Nya tinchin ke bisi chop diraja ke diambi iya ari Haman. Udah nya, Ester ngelantik Mordikai ngambika Mordikai ngemataka semua reta Haman.
3 Ester bejaku baru enggau raja. Iya nyungkurka diri ba kaki raja lalu nyabak. Iya bebendar minta raja mutarka utai ti enda manah ke udah nyadi ketegal Haman, orang Agak nya. Iya mega minta raja nagang utai ke deka digaga Haman ngagai orang Judah.
4 Raja lalu ngunjurka tungkat emas diraja ngagai Ester. Ester pan angkat lalu bediri ba depan raja.
5 Ku Ester madah: “Enti tuan raja lantang ati sereta setuju enggau aku, lalu enti tu ngena ba tuan raja sereta aku ngerinduka ati tuan raja, aku deka minta tuan raja ngaga siti pesan diraja kena nginsil semua surat ke digaga Haman,* ke ngasuh semua orang Judah dipunaska magang ba semua wilayah ke dipegai tuan raja.
6 Tuan raja, enda sanggup aku meda penusah ti balat ninggang orang ke sebansa enggau aku. Baka ni ku aku ulih tan meda kaban belayan aku empu dipunaska magang?”
7 Nyadi, Raja Ahasurus madah ngagai Kuin Ester enggau Mordikai, orang Judah nya: “Aku udah meri semua reta Haman ngagai Ester. Aku mega udah ngasuh Haman digantung ba tiang ketegal pelan iya ke deka nyerang orang Judah.
8 Tang, aku enda ulih nginsil surat ke udah ditulis dalam nama aku sereta dichop ngena tinchin aku. Taja pia, seduai ulih nulis surat pasal nama-nama utai ti ngena ngarika orang Judah. Surat nya ulih ditulis dalam nama aku sereta dichop ngena tinchin aku.”
9 Kena hari ke-23 ba bulan ti ketiga, iya nya bulan Siban,* raja ngangauka bala sekretari iya lalu ngasuh sida nulis semua utai ke dipadahka Mordikai. Sida ngirumka surat nya ngagai orang Judah, ngagai bala pemerintah wilayah, ngagai bala gabenor, enggau bala tuai wilayah. Surat nya dianjung ngagai 127 iti wilayah, ari India sampai ngagai Etiopia. Surat nya mega ditulis ngena tulisan enggau bansa jaku ke dikena tiap iti bansa ba tiap iti wilayah. Orang Judah mega nerima surat ti ditulis ngena tulisan enggau bansa jaku sida.
10 Semua surat nya ditulis dalam nama Raja Ahasurus, lalu dichop ngena tinchin iya ke bisi chop diraja. Surat nya dianjung orang ke gawa nganjung pesan diraja. Sida nepan kuda ti laju ke endang ditupi ke pengawa diraja.
11 Ba surat nya, raja meri pemendar ngagai orang Judah ke diau ba semua kuta, ngambika begempuru lalu ngelaban orang ke nyerang sida. Sida ulih munuh sereta ngemunaska magang raban ke bisi senyata ke nyerang sida, enda ngira raban nya datai ari bansa ni tauka wilayah ni, nyengkaum indu enggau anak mit. Orang Judah mega tau ngerampas reta sida.
12 Atur nya deka dipejalaika ba hari ti sama ba semua wilayah ke dipegai Raja Ahasurus, kena hari ke-13 ba bulan ke-12, iya nya bulan Adar.*
13 Utai ke dipadah ba surat nya deka ditetapka nyadi undang-undang ba semua wilayah. Undang-undang nya deka dipadahka ngagai semua orang ngambika orang Judah sedia ngelaban munsuh sida maya nya.
14 Orang ke gawa nganjung pesan diraja nepan kuda diraja, lalu jampat mupuk enggau naka pengelaju, baka ke diasuh raja. Undang-undang nya mega dipadahka ba istana ba Sushan.
15 Udah nya, Mordikai pan mupuk pengudah betemu enggau raja. Maya nya, Mordikai ngena gari diraja ke bewarna biru enggau burak, sereta ngena baju jubah ti lawa ke digaga ari bulu bedus ke bewarna ungu. Iya mega ngena makota emas ti amat bemulia. Semua orang ba kuta Sushan manjung gaga ati.
16 Orang Judah berasai amat lantang.* Sida amat gaga ati sereta berasai dipebasa.
17 Ba semua wilayah enggau ba semua kuta, enda ngira ba dini alai pesan raja enggau undang-undang nya ditusui, orang Judah berasai amat gaga ati. Sida nyediaka pengerami sereta makai besai. Mayuh orang ari bansa bukai nyadi orang Judah, laban sida takutka orang Judah.
Nota Kaki
^ Tauka “Haman anak Hamedata, orang Agak nya.”
^ Peda Rujukan B15.
^ Peda Rujukan B15.
^ Jaku Asal, “lempung.”
