Hebrew 8:1-13
8 Tu meh utai penting ke deka dipadahka kami: Kitai bisi siku imam besai ke baka nya, lalu iya udah duduk ba sepiak kanan kerusi diraja Petara ti Bekuasa ba serega.
2 Iya gawa ba endur ti kudus, ba langkau kain ti bendar ke didirika Jehovah, ukai mensia.
3 Tiap iku imam besai dipilih ngambika meri pemeri jelu* enggau pemeri ke bukai. Nya alai, iya mega patut meri pemeri.
4 Enti iya ba dunya, iya enda ibuh nyadi imam laban udah bisi bala imam ke bukai meri pemeri nitihka Adat.
5 Pengawa ti tuchi ke dipejalaika bala imam nya ngambarka sereta mandangka utai ke ba serega. Tu sama baka lebuh Petara ngasuh Moses nirika Langkau Kain. Ku Iya: “Tentuka nuan ngaga semua utai nitihka pelan ti dipandangka ngagai nuan ba bukit tu.”
6 Tang diatu, Jesus udah bulih pengawa ti jauh manah agi, laban iya mega udah nyadi orang tengah ke sempekat ti manah agi. Sempekat nya udah disahka nitihka semaya ti manah agi.
7 Enti sempekat ti keterubah nadai pengurang, sempekat ti kedua tentu enda ibuh digaga.
8 Tang Petara meda penyalah nembiak Iya, laban ku Jehovah bejaku: “‘Maya deka datai alai Aku deka ngaga sempekat ti baru enggau orang Israel sereta enggau orang Judah.
9 Sempekat tu enda sama enggau sempekat ke digaga Aku enggau aki ini sida, lebuh Aku megai jari sida ngambika ngiring sida pansut ari Ejip. Ketegal sida enda ngasika sempekat Aku, nya alai, Aku badu agi ibuhka sida,’ ku Jehovah.
10 “‘Tu meh sempekat ke deka digaga Aku enggau orang Israel pengudah maya nya,’ ku Jehovah. ‘Aku deka ngengkahka adat Aku ba dalam runding sida lalu nulis iya ba ati sida. Aku deka nyadi Petara sida, lalu sida deka nyadi nembiak Aku.
11 “‘Sida enda ibuh agi nyebut: “Kelala meh Jehovah!” kena ngajar orang ke semenua enggau sida sereta bala menyadi sida. Nya ketegal semua sida, ari sida ke pemadu baruh pangkat nyentuk ngagai sida ke pemadu tinggi pangkat, deka ngelala Aku.
12 Aku deka ngampunka pengawa sida ti enda lurus, lalu Aku enda agi ingatka dosa sida.’”
13 Ketegal Petara bejaku pasal “sempekat ti baru,” nya alai, Iya ngaga sempekat ke sebedau tu nyadi sempekat ti lama. Nyadi, enti utai nyau lama lalu majak jai, iya deka jampat lenyau.
Nota Kaki
^ Tauka “pemeri ti disayat; korban.”
