John 15:1-27
15 “Aku meh pun anggur ti bendar, lalu Apai aku Orang ke nanam anggur.
2 Iya muai tiap iti dan ke enda bebuah ari aku, lalu Iya nyarau* tiap iti dan ke bebuah ngambika dan nya bebuah lebat agi.
3 Kita udah diberesi ngena utai ke diajar aku ngagai kita.
4 Mengkang beserakup enggau aku, lalu aku deka mengkang beserakup enggau kita. Dan ke enda mengkang bejantil ba pun iya, enda ulih bebuah. Pia mega, enti kita enda mengkang beserakup enggau aku, kita enda ulih bebuah.
5 Aku meh pun anggur, lalu kita nya dan iya. Barang sapa mengkang beserakup enggau aku, aku mega deka beserakup enggau iya. Enggau nya, iya deka mansutka mayuh buah. Kita enda ulih ngereja nama-nama utai, enti nadai aku.
6 Barang sapa ke enda mengkang beserakup enggau aku nya, baka dan ke dibuai lalu nyadi rangkai. Orang ngumpul dan nya, lalu nikauka iya ngagai api ngambika ditunu.
7 Enti kita mengkang beserakup enggau aku, lalu nyimpan jaku aku dalam ati kita, kita ulih minta nama-nama utai ke dikinginka kita, lalu utai nya deka nyadi.
8 Apai aku dimuliaka, enti kita majak mansutka mayuh buah, lalu nunjukka* kita nya murid aku.
9 Aku rinduka kita baka Apai ke rinduka aku. Awakka kita mengkang dalam pengerindu aku.
10 Enti kita nitihka pesan aku, kita mengkang dalam pengerindu aku, baka aku ke udah nitihka pesan Apai lalu mengkang dalam pengerindu Iya.
11 “Aku udah madahka semua nya ngagai kita, ngambika kita ulih gaga ati baka aku, lalu kita deka penuh enggau pengaga ati.
12 Tu meh pesan aku: Kita patut rinduka pangan diri, baka aku ke udah rinduka kita.
13 Nadai orang bisi pengerindu ke besai agi ari orang ke sanggup nyerahka nyawa diri ke bala kaban iya.
14 Kita kaban aku enti kita ngereja utai ke diasuh aku.
15 Aku enda agi ngumbai kita ulun, laban ulun enda nemu utai ke dikereja tuan iya. Tang aku ngumbai kita kaban aku, laban aku udah madah ngagai kita semua utai ke didinga aku ari Apai aku.
16 Kita enda milih aku, tang aku meh ke milih kita. Aku udah milih kita ngambika kita terus mansutka buah, iya nya buah ke ulih tan. Enggau nya, nama-nama utai ke dipinta kita ari Apai dalam nama aku deka diberi ngagai kita.
17 “Aku meri kita semua pesan tu, ngambika kita rinduka pangan diri.
18 Enti dunya begedika kita, ingat meh dunya udah begedika aku sebedau iya begedika kita.
19 Enti kita sebagi ari dunya, dunya deka rinduka kita laban kita enggi dunya. Tang aku udah milih kita, lalu kita ukai sebagi ari dunya. Nya kebuah dunya begedika kita.
20 Kingatka utai ti udah dipadah aku ngagai kita: Nadai ulun ke besai agi ari tuan iya. Enti sida udah nitihka ajar aku, sida mega deka nitihka ajar kita. Enti sida udah merinsaka aku, sida mega deka merinsaka kita.
21 Sida deka ngereja semua tu ngagai kita ketegal nama aku, laban sida enda ngelala Iya ke ngirumka aku.
22 Enti aku enda datai lalu bejaku enggau sida, sida enda bedosa. Tang diatu sida nadai dalih* ke dosa sida.
23 Barang sapa begedika aku, begedi mega ke Apai aku.
24 Enti sida enda meda aku ngereja pengawa ke enda kala dikereja orang, sida enda bedosa. Tang diatu, sida udah meda aku lalu begedika aku sereta Apai aku.
25 Utai tu nyadi kena ngamatka utai ke ditulis dalam Adat sida: ‘Sida begedika aku enggau nadai kebuah.’
26 Aku deka ngirum ngagai kita penulung ke datai ari Apai, iya nya kuasa kudus Iya ke mandangka pemendar. Lebuh penulung ari Apai nya datai, penulung nya deka meri saksi pasal aku.
27 Kita mega deka meri saksi pasal aku laban kita udah enggau aku kenyau ari pun.
