John 17:1-26
17 Pengudah Jesus nyebut semua nya, iya engkadah ke langit lalu bejaku: “Apai, maya udah datai. Muliaka anak Nuan ngambika anak Nuan ulih ngemuliaka Nuan.
2 Nuan udah meri iya kuasa atas semua orang, ngambika iya ulih meri pengidup ti meruan belama iya ngagai semua orang ke diberi Nuan ngagai iya.
3 Enti orang ngelala* Nuan, siku aja Petara ti bendar, sereta ngelala Jesus Kristus ke dikirumka Nuan, sida deka bulih pengidup ti meruan belama iya.
4 Aku nembuka pengawa ke diberi Nuan ngagai aku. Enggau nya, aku udah ngemuliaka Nuan ba dunya.
5 Nya alai diatu, Apai, awakka aku dimuliaka ba sepiak Nuan ngena mulia ke dikembuan aku ba sepiak Nuan sebedau dunya* digaga.
6 “Aku udah ngasuh nama Nuan ditemu orang ba dunya. Sida udah diberi Nuan ngagai aku. Sida enggi Nuan, lalu Nuan nyerahka sida ngagai aku, lalu sida ngasika jaku Nuan.
7 Diatu sida nemu, semua utai ke diberi Nuan ngagai aku nya datai ari Nuan.
8 Laban jaku ke diberi Nuan ngagai aku, udah diberi aku ngagai sida lalu sida nerima jaku nya. Sida amat udah nemu aku datai nyadi pengari Nuan, lalu sida pechaya Nuan meh ke ngirumka aku.
9 Aku besampi ke sida. Aku besampi ukai ke dunya, tang ke sida ke udah diberi Nuan ngagai aku laban sida enggi Nuan.
10 Semua utai ke enggi aku nya, enggi Nuan. Lalu utai ke enggi Nuan, enggi aku. Ba entara sida, aku ke udah dimuliaka.
11 “Aku deka datai ngagai Nuan. Aku enda agi diau ba dunya tu. Tang sida agi ba dunya tu. Apai ti kudus, jaga meh sida ketegal nama Nuan ke udah diberi Nuan ngagai aku, ngambika sida beserakup baka tua ke beserakup.*
12 Lebuh aku enggau sida, aku seruran nyaga sida ketegal nama Nuan ke udah diberi Nuan ngagai aku. Aku udah nyaga sida, lalu nadai siku ari sida ke dipunaska. Semina iya aja ke deka dipunaska kena ngamatka ayat Bup Kudus.
13 Tang diatu, aku deka datai ngagai Nuan, lalu aku bejaku pasal pekara tu ba dunya, ngambika sida amat ulih ngasaika pengaga ati aku.
14 Aku udah nusui jaku Nuan ngagai sida. Tang dunya begedika sida, laban sida ukai sebagi ari dunya baka aku ke ukai sebagi ari dunya.
15 “Aku enda minta Nuan ngambi sida ari dunya. Tang aku minta Nuan nyaga sida ari Sitan.*
16 Sida ukai sebagi ari dunya, baka aku ke ukai sebagi ari dunya.
17 Kuduska* sida ngena pemendar. Jaku Nuan nya pemendar.
18 Baka Nuan ke udah ngirumka aku ke dunya, aku mega ngirumka sida ke dunya.
19 Aku nguduska diri ke sida, ngambika sida mega dikuduska ngena pemendar.
20 “Aku besampi ukai ke sida aja, tang ke semua orang ke arapka aku pengudah ninga utai ke diajar sida.
21 Enggau nya, semua sida deka beserakup,* Apai, baka Nuan ke beserakup enggau aku, lalu aku beserakup enggau Nuan, sida mega beserakup enggau tua, ngambika dunya ulih pechaya Nuan meh ke ngirumka aku.
22 Aku udah meri sida mulia ke diberi Nuan ngagai aku, ngambika sida beserakup baka tua ke beserakup.*
23 Aku beserakup enggau sida, lalu Nuan beserakup enggau aku, ngambika sida amat-amat beserakup.* Enggau nya, dunya deka nemu, Nuan meh ke ngirumka aku, lalu Nuan rinduka sida baka Nuan ke rinduka aku.
24 Apai, aku deka minta ngagai Nuan ngambika ba dini endur aku, ba dia meh orang ke udah diberi Nuan ngagai aku mega begulai enggau aku. Enggau nya, sida ulih meda mulia aku ke udah diberi Nuan ngagai aku, laban Nuan rinduka aku sebedau penumbuh dunya.*
25 Apai ti lurus, taja pan dunya enda ngelala Nuan, aku ngelala Nuan. Lalu sida nemu, Nuan meh ke ngirumka aku.
26 Aku udah ngasuh nama Nuan ditemu sida, lalu aku deka terus ngereja nya, ngambika sida rinduka orang bukai baka Nuan ke rinduka aku, lalu ngambika aku beserakup enggau sida.”
Nota Kaki
^ Tauka “bulih penemu pasal.” Jaku pengawa Gerika ke dikena ditu nunjukka pengawa ke patut terus digaga.
^ Tauka “mensia.”
^ Tauka “ngambika sida nyadi siku baka tua ke endang siku.”
^ Jaku Asal, “iya ti jai.”
^ Iya nya, milih sida ngambika bejalaika pengawa ti tuchi.
^ Tauka “nyadi siku.”
^ Tauka “ngambika sida nyadi siku baka tua ke endang siku.”
^ Tauka “amat-amat nyadi siku.”
^ Iya nya, sebedau anak Adam seduai Awa ada.
