John 2:1-25
2 Dua hari udah nya, bisi pengerami tikah ba Kana, Galili, lalu indai Jesus bisi ba dia.
2 Jesus enggau bala murid iya mega dibai ngagai pengerami tikah nya.
3 Lebuh wain nyauka abis, indai Jesus lalu bejaku enggau iya: “Wain sida udah abis.”
4 Tang Jesus lalu bejaku ngagai iya: “Indai, nama kaul hal nya enggau tua?* Maya aku bedau datai.”
5 Udah nya, indai iya bejaku ngagai sida ke nyadung wain ba dia: “Kereja aja utai ke dipadahka iya ngagai kita.”
6 Ba dia bisi enam igi tajau ai ke digaga ari batu. Tempayan nya diengkah ba dia ngambika orang ulih nuchi diri nitihka adat orang Judah. Tiap igi tajau ulih ngundan dua tauka tiga beledi* ai.
7 Jesus madah ngagai sida: “Isi tajau nya ngena ai.” Sida lalu ngisi semua tajau nya sampai penuh.
8 Udah nya iya madah ngagai sida: “Kauk ai nya mimit lalu bai ngagai ketuai ke ngatur pengerami tikah.” Sida lalu ngereja utai ke diasuh iya.
9 Ketuai ke ngatur pengerami tikah nya pan nyepi ai ke udah ditukar nyadi wain. Iya enda nemu ari ni penatai wain nya (tang sida ke nyadung wain nya nemu). Iya lalu ngangauka pengantin lelaki.
10 Ku iya bejaku ngagai pengantin lelaki nya: “Kesuah iya, orang mantaika wain ti manah dulu. Pengudah bala temuai mabuk, nya baru sida mantaika wain ke enda entu nyamai. Tang nuan udah nyimpan wain ti manah nyentuk ke diatu.”
11 Tu meh kereja ajih Jesus ti keterubah. Iya ngereja nya ba Kana, Galili. Enggau nya, iya mandangka mulia iya, lalu bala murid iya arapka iya.
12 Udah nya Jesus, indai iya, bala menyadi lelaki iya, enggau bala murid iya mupuk ngagai Kapernaum. Tang sida semina diau dia beberapa hari aja.
13 Ketegal Pengerami Paska orang Judah nyau semak, Jesus mupuk ngagai Jerusalem.
14 Ba Rumah Sembiang, iya meda orang bejualka sapi, bedus, enggau burung achang. Bala penukar duit mega duduk ba dia.
15 Nya alai, iya ngaga penyipat ari tali, lalu muru semua orang ke nyual bedus enggau sapi ari Rumah Sembiang. Iya mega mubuhka duit seling bala penukar duit lalu nungkupka mija sida.
16 Ku iya bejaku ngagai sida ke nyual burung achang: “Bai pansut semua utai tu. Badu agi ngaga rumah Apai aku nyadi endur bejualka utai!”*
17 Lebuh meda semua utai ke nyadi nya, bala murid iya lalu teingatka ayat ke udah ditulis: “Pengeransing aku ke Rumah Nuan mau baka api.”
18 Nya alai orang Judah bejaku ngagai iya: “Nama kereja ajih ke deka dipandangka nuan ngagai kami, kena nunjukka nuan bisi hak ngereja semua utai tu?”
19 Jesus lalu nyaut sida: “Rubuhka Rumah Sembiang tu, lalu dalam tiga hari, aku deka nirika iya baru.”
20 Ku orang Judah madah ngagai iya: “Orang ngaga Rumah Sembiang tu pengelama 46 taun, lalu nuan deka nirika iya baru dalam tiga hari?”
21 Kebendar iya, Rumah Sembiang ke disebut Jesus nya tubuh iya empu.
22 Pengudah iya diidupka baru ari mati, bala murid iya teingatka iya suah bejaku munyi nya. Nya alai, sida arapka ayat Bup Kudus sereta arapka utai ke udah disebut Jesus.
23 Lebuh Jesus ba Jerusalem maya Pengerami Paska, mayuh orang arapka nama iya pengudah meda kereja ajih ke digaga iya.
24 Tang Jesus enda arapka sida enggau pengabis ati, laban iya nemu sapa sida kebendar iya.
25 Nambahka nya, iya enda begunaka orang meri saksi pasal mensia, laban iya nemu utai ke ba dalam ati mensia.
Nota Kaki
^ Tauka “Indu, nama kaul hal nya enggau tua?” Kelia menya, lebuh nyebut “indu,” nya ukai reti enda ngayanka basa. Tang chara bejaku baka nya dikena orang nunjukka diri mantah tauka enggai ngereja utai ke dipinta.
^ Tiap igi beledi engka ulih ngundan kira-kira 22 L ai.
^ Tauka “pasar!”
