John 3:1-36
3 Bisi siku orang Parisi ke benama Nikodimus. Iya siku ketuai orang bansa Judah.
2 Iya datai ngagai Jesus maya malam hari, lalu bejaku enggau Jesus: “Rabbi,* kami nemu nuan pengajar ke dianjung Petara, laban nadai orang ke ulih ngereja pengawa ajih baka ke digaga nuan, enti Petara nadai enggau orang nya.”
3 Jesus nyaut iya: “Enggau bendar aku madah ngagai nuan: Nadai orang ulih meda Perintah Petara enti iya enda diadaka baru.”*
4 Ku Nikodimus bejaku ngagai iya: “Baka ni ku orang ke besai tuai ulih diadaka baru? Ulih iya tama ngagai kandung indai iya lalu diadaka baru?”
5 Ku Jesus nyaut: “Enggau bendar aku madah ngagai nuan: Nadai orang ulih tama ngagai Perintah Petara enti iya enda diadaka ari ai enggau kuasa kudus Petara.
6 Sida ke diadaka mensia nya, anak mensia, lalu sida ke ada ari kuasa kudus Petara nya, anak Petara.
7 Anang alit ati lebuh aku madah ngagai nuan: Semua kita patut diadaka baru.
8 Ribut bepuput ngagai sebarang endur iya deka, lalu nuan ninga munyi iya. Tang nuan enda nemu ari ni penatai iya sereta kini ke tunga iya bepuput. Pia mega enggau tiap iku orang ke ada ari kuasa kudus.”
9 Nikodimus pan nanya iya: “Baka ni ku utai tu ulih nyadi?”
10 Ku Jesus nyaut: “Endaka nuan siku pengajar ba Israel? Nama kebuah nuan enda nemu semua utai tu?
11 Enggau bendar aku madah ngagai nuan: Kami madahka utai ke ditemu kami sereta meri saksi pasal utai ke dipeda kami. Tang kita enggai nerima saksi ke diberi kami.
12 Enti kita enda arap lebuh aku madah ngagai kita pasal pekara ba dunya, baka ni ku kita deka arap enti aku madah ngagai kita pasal pekara ba serega?
13 Nambahka nya, nadai orang kala niki ke serega kelimpah ari iya ke nurun ari serega, iya nya Anak Mensia.
14 Baka Moses ke nuatka ular ba menua puang, baka nya meh Anak Mensia patut dituatka,*
15 ngambika semua orang ke arapka iya tau bulih pengidup ti meruan belama iya.
16 “Laban Petara balat rinduka dunya tu, nya alai Iya meri Anak tunggal Iya, ngambika genap iku orang ke arapka Anak Iya enda dipunaska tang bulih pengidup ti meruan belama iya.
17 Petara enda ngirumka Anak Iya ke dunya ngambika ngakim dunya, tang kena nyelamatka dunya nengah iya.
18 Barang sapa ke arapka iya enda diakim. Barang sapa ke enda arap udah diakim laban iya enda arapka nama Anak tunggal Petara.
19 Taja pan penampak udah tama ke dunya, tang orang rinduka pemetang, ukai penampak, laban sida ngereja utai ti jai. Ketegal nya meh sida diakim.
20 Barang sapa ke selalu ngereja utai ti jai begedika penampak, lalu iya enda datai ngagai penampak, ngambika pengawa iya enda ditemu orang.
21 Tang barang sapa ke ngereja utai ti lurus datai ngagai penampak, ngambika pengawa iya nunjukka iya ngereja utai sejalai enggau peneka Petara.”
22 Udah nya, Jesus enggau bala murid iya mupuk ngagai menua pesisir ba Judea. Iya diau lama mimit ba dia enggau sida, lalu maptisa orang.
23 Tang John mega maptisa orang ba Ainon, endur ke semak enggau Salim, laban endur nya bisi mayuh ai. Orang majak datai ngambika dibaptisa.*
24 Maya nya, John bedau agi dijil.
25 Bala murid John bekelakar enggau siku orang Judah pasal adat nuchi diri.
26 Udah nya sida datai ngagai John, lalu madahka: “Rabbi, peda nuan lelaki ke kala enggau nuan ba seberai Sungai Jordan. Nuan bisi meri saksi pasal iya. Tang diatu iya maptisa orang lalu semua orang datai ngagai iya.”
27 Ku John nyaut: “Orang enda ulih nerima nama-nama utai enti Petara enda meri utai nya ngagai iya.
28 Kita empu nyadi saksi aku lebuh aku madahka, ‘Aku ukai Kristus, tang aku udah dianjung dulu ari iya.’
29 Pengantin indu endang enggi pengantin lelaki. Taja pia, kaban pengantin lelaki balat gaga ati lebuh iya bediri sereta ninga nyawa pengantin lelaki. Nya alai, aku penuh enggau pengaga ati.
30 Pengawa ke dikereja iya deka majak nambah, tang pengawa ke dikereja aku deka majak kurang.”
31 Iya ke datai ari atas besai agi ari semua orang. Iya ke datai ari dunya endang ari dunya, lalu iya bejaku pasal pekara ba dunya. Iya ke datai ari serega besai agi ari semua orang.
32 Iya meri saksi pasal utai ti udah dipeda sereta didinga iya, tang nadai orang nerima saksi ke diberi iya.
33 Orang ke nerima saksi iya pechaya enggau pengabis ati* Petara nyebut utai ti bendar.
34 Orang ke dianjung Petara nusui jaku Petara, laban Petara meri kuasa kudus Iya enggau gerah jari.*
35 Apai rinduka Anak lalu udah nyerahka semua utai ngagai iya.
36 Barang sapa arapka Anak deka bulih pengidup ti meruan belama iya. Barang sapa ke enda ngasika Anak nadai bulih pengidup. Tang pengeringat Petara deka mengkang ba orang nya.
Nota Kaki
^ Tauka “Pengajar.”
^ Tauka engka, “diadaka ari atas.”
^ Jaku Asal, “diangkat tinggi.”
^ Tauka “disepuhka; diselamka.”
^ Tauka “ngengkahka chop ti nunjukka.”
^ Tauka “Iya enda meri kuasa kudus nitihka takar.”
