Josua 3:1-17
-
Orang Israel meraka Sungai Jordan (1-17)
3 Josua dani tumu pagi. Iya enggau orang Israel berangkat ari Sitim ngagai Sungai Jordan. Sida iya bemalam enda jauh ari Sungai Jordan sebedau meraka sungai nya.
2 Pengudah tiga hari, bala tuai orang Israel bejalai ba serata kem
3 lalu meri pesan ngagai orang Israel: “Lebuh kita meda bala imam Lewi ngesan peti lampang batu Adat Petara kita, Jehovah, kita mesti angkat ari endur kita lalu titihka sida,
4 ngambika kita nemu ni bagi jalai ke deka ditengah kita laban kita bedau kala nengah jalai tu. Tang anang bejalai semak enggau peti lampang batu Adat. Tentuka jarak kita enggau peti nya kira-kira 900 meter.”*
5 Josua bejaku ngagai orang Israel: “Tentuka diri kita tuchi laban pagila Jehovah deka ngereja utai ti luar biasa ke kita.”
6 Udah nya, Josua bejaku ngagai bala imam: “San peti lampang batu Adat lalu bejalai dulu ari orang Israel.” Bala sida imam nya pan nitihka utai ke dipadahka Josua.
7 Jehovah lalu bejaku ngagai Josua: “Berengkah ari seharitu, Aku deka ngasuh nuan nyadi orang ke dipebasaka semua orang Israel ngambika sida nemu, Aku bisi enggau nuan baka Aku ke udah enggau Moses.
8 Nuan patut meri pesan tu ngagai bala imam ke ngesan peti lampang batu Adat: ‘Lebuh kita datai ba tebing Sungai Jordan, kita mesti bediri ba ai sungai nya.’”
9 Josua lalu bejaku ngagai orang Israel: “Datai kitu kita lalu pendingka jaku Petara kita, Jehovah.”
10 Ku Josua nampung: “Kita deka nemu Petara ti idup bisi enggau kita. Iya tentu deka muru orang Kanaan, orang Het, orang Ibi, orang Peris, orang Girgas, orang Amor, enggau orang Jebus. Kita deka nemu tu
11 lebuh kita meda peti lampang batu Adat, ke enggi Tuan ti bekuasa atas serata dunya, dibai mupuk dulu ari kita ngagai Sungai Jordan.
12 Pilih 12 iku lelaki, siku ari tiap iti raban bansa.
13 Lebuh bala imam ke ngesan peti lampang batu Adat Jehovah, Tuan ti bekuasa atas serata dunya, ngindik Sungai Jordan, ai ke datai ari ulu deka ngetu tekala nya lalu deka nyadi baka siti dinding.”
14 Lebuh orang Israel mupuk ari kem sida deka meraka Sungai Jordan, bala imam ke ngesan peti lampang batu Adat bejalai dulu ari sida.
15 Maya nya musin ngetau. Ai Sungai Jordan benung pasang besai nyentukka tebing sungai nya ampuh. Lebuh bala imam ke ngesan peti lampang batu Adat ngindik Sungai Jordan,
16 ai ke datai ari ulu ngetu tekala nya semak enggau kuta Adam,* lalu ai nya nyadi baka dinding. Endur ai nya ngetu jauh ari orang Israel. Ba maya ti sama, ai ke ba ili kuta Adam terus mengalir ngagai Tasik Arabah* sampai sungai nya rangkai. Ketegal ai badu agi mengalir, orang Israel nyau ulih meraka ke seberai ba depan kuta Jeriko.
17 Bala imam ke ngesan peti lampang batu Adat Jehovah terus bediri ba tanah ti rangkai ba tengah-tengah Sungai Jordan. Sida iya terus bediri ba dia sampai semua orang Israel meraka ke seberai.
Nota Kaki
^ Jaku Asal, “2,000 kiubit.” Peda Rujukan B14.
^ Tauka “kuta Adam ke semak enggau kuta Saretan.”
^ Iya nya, Tasik Mati.
