Mark 16:1-8
-
Jesus diidupka baru (1-8)
16 Pengudah Hari Sabat, Maria Magdalin, Maria indai James, enggau Salomi, meli rempah ti bebau rengut, laban sida deka ngagai kubur Jesus, lalu ngunsut rempah nya ba bangkai Jesus.
2 Kena tumu pagi Hari Minggu,* lebuh mata panas berengkah tumbuh sida mansang ngagai kubur Jesus.
3 Ku sida bejaku enggau pangan diri: “Sapa ke deka maringka batu ke dikena nutup kubur tu ke kitai?”
4 Tang lebuh sida malik ngagai kubur nya, sida meda batu nya udah dibaringka, taja pan batu nya besai amat.
5 Lebuh sida tama ke dalam kubur, sida tekenyit meda siku lelaki ke biak, ti ngena baju jubah burak, duduk ba sepiak kanan kubur nya.
6 Ku iya bejaku ngagai sida: “Anang takut. Kita ngiga Jesus, orang Nasaret, ke udah diukum bunuh ba tiang. Iya udah diidupka baru ari mati. Iya nadai ditu. Peda kita! Ditu meh alai sida ngengkahka bangkai iya.
7 Mupuk kita, lalu padah ngagai bala murid iya sereta ngagai Peter: ‘Iya benung mansang ngagai Galili dulu ari kita. Ba din, kita deka betemu enggau iya, baka ke dipadah iya ngagai kita.’”
8 Sida balat alit ati sereta balat takut. Nya alai, lebuh sida pansut, sida rari ari kubur nya. Sida enda madahka nama-nama utai ngagai orang laban sida takut.*
Nota Kaki
^ Jaku Asal, “hari keterubah dalam seminggu.” Ba orang Judah, Hari Minggu nya hari keterubah dalam seminggu.
^ Nitihka manuskrip Bup Kudus ke lama, ke ulih dikearapka, Berita Manah ke Ditusui Mark abis ba ayat lapan.
