Mark 3:1-35
3 Sekali agi, iya tama ngagai balai gempuru. Lalu ba dia, bisi siku lelaki ke mati jari sepiak.*
2 Orang Parisi bendar beratika Jesus. Sida deka meda sekalika iya ngeraika lelaki nya ba Hari Sabat tauka enda, ngambika sida ulih ngiga kebuah kena nuduh iya.
3 Ku Jesus bejaku enggau lelaki ke mati jari sepiak: “Angkat, lalu mansang ke tengah.”
4 Udah nya, iya nanya sida: “Nama patut digaga kitai maya Hari Sabat? Ngereja utai ti manah tauka utai ti jai? Munuh tauka ngidupka nyawa?” Tang sida enda bemunyi.
5 Jesus merening ngagai sida enggau ati ti pedis. Tang iya mega tusah ati laban ati sida enda ulih ngasaika nama-nama utai. Udah nya, iya bejaku ngagai lelaki ke mati jari sepiak nya: “Unjurka jari nuan.” Lelaki nya ngunjurka jari iya, lalu jari iya gerai.
6 Udah nya, orang Parisi pansut lalu baum tekala nya enggau bala nembiak Herod, ngiga chara kena munuh Jesus.
7 Tang Jesus enggau bala murid iya mupuk ngagai danau. Mayuh amat orang ari Galili enggau ari Judea nitihka iya.
8 Indah, mayuh amat orang ari Jerusalem, ari Idumea, ari seberai Sungai Jordan, enggau ari endur ke ngelingi Tirus sereta Sidon, datai ngagai Jesus pengudah sida ninga pasal semua utai ti udah dikereja iya.
9 Iya ngasuh bala murid iya nyediaka perau mit ke iya, ngambika orang mayuh enda ngempit iya.
10 Ketegal iya udah ngeraika mayuh orang, semua sida ke sakit raya nyau berebut deka negu iya.
11 Indah orang ke dirasuk melikat ti jai pan nyungkurka diri ba mua Jesus lebuh meda iya, lalu sida merakka nyawa: “Nuan tu Anak Petara.”
12 Tang iya suah amat bebendar enda ngasuh sida madahka pasal iya ngagai orang bukai.
13 Udah nya, Jesus niki ngagai bukit, lalu ngangauka sekeda murid iya. Sida lalu datai ngagai iya.
14 Iya milih* 12 iku orang nitihka iya, lalu iya ngumbai sida rasul. Sida nya meh ke dianjung Jesus nusui Berita Manah,
15 lalu meri sida kuasa kena muru melikat ti jai.
16 Tu meh 12 iku orang ke dipilih* iya: Simon ke mega dikumbai iya Peter;
17 James anak Sebedi enggau menyadi iya John (iya mega meri seduai iya nama Boanerges ke mai reti “Anak Guntur”);
18 Andrew, Philip, Bartolomew, Matthew, Thomas, James anak Alfius, Tadius, Simon ke ransing;
19 enggau Judas Iskariot ke udah nya nyerahka Jesus ngagai munsuh.
Pengudah nya, Jesus tama ngagai sebuah rumah.
20 Sekali agi, orang mayuh begelumu, nyentukka Jesus enggau bala murid iya enda ulih makai.
21 Lebuh kaban belayan Jesus ninga pasal utai ke nyadi, sida datai deka mai iya mupuk ari endur nya. Ku sida bejaku: “Iya nyau udah gila.”
22 Pia mega, bala penulis Adat ke datai ari Jerusalem madahka: “Iya dirasuk Belsebup,* lalu iya muru melikat ti jai ketegal iya bisi kuasa ari ketuai melikat ti jai.”
23 Nya alai, Jesus ngangauka sida ngagai iya, lalu madahka sida sekeda jaku sempama. Ku iya: “Baka ni ku Sitan ulih muru Sitan?
24 Enti perintah bepechah-belah ngelaban diri empu, perintah nya enda ulih tan lama.
25 Lalu enti ruang bilik bepechah-belah ngelaban diri empu, ruang bilik nya enda ulih tan lama.
26 Pia mega, enti Sitan angkat ngelaban diri empu, lalu sida ke nitihka iya bepechah-belah, Sitan enda ulih tan lama, lalu deka nadai agi.
27 Kebendar iya, nadai orang ke tama ngagai rumah orang ke kering ulih ngenchuri reta orang ke kering nya. Iya patut nanchang orang ke kering nya dulu. Udah nya, baru iya ulih ngerampas reta ari rumah orang ke kering nya.
28 Enggau bendar aku madah ngagai kita: Semua dosa ke dikereja mensia, enggau semua jaku ke ngelaban utai ti kudus ke disebut sida, deka diampun.
29 Tang barang sapa ke bejaku ngelaban kuasa kudus Petara, enda sekali-kali ulih diampun. Dosa nya deka mengkang belama iya.”
30 Iya nyebut munyi nya laban orang madahka: “Iya dirasuk melikat ti jai.”
31 Maya nya, indai Jesus enggau bala menyadi iya ke lelaki datai. Sida bediri ba luar, lalu minta orang ngangauka iya.
32 Orang ke duduk ngelingi iya madah ngagai iya: “Indai enggau sida menyadi lelaki nuan bisi ba luar. Sida benung ngiga nuan.”
33 Tang ku Jesus nyaut sida: “Sapa indai aku, lalu sapa bala menyadi aku?”
34 Jesus malik ngagai sida ke duduk ngelingi iya, lalu bejaku: “Peda! Sida tu meh indai aku enggau bala menyadi aku!
35 Barang sapa ngereja peneka Petara, nya meh menyadi lelaki, menyadi indu, enggau indai aku.”
Nota Kaki
^ Tauka “ke sakit bajung.”
^ Tauka “nyiri; ngeletak.”
^ Tauka “dichiri; diletak.”
^ Gelar ti diberi ngagai Sitan.
