Pemansut 18:1-27
18 Jetro, entua Moses ke lelaki, udah ninga pasal semua utai ke udah digaga Jehovah ke Moses enggau ke bala nembiak Iya, Israel. Iya mega udah ninga pasal baka ni Petara udah mai orang Israel pansut ari Ejip. Jetro nya imam orang Midian.
2 Sebedau tu, Moses udah nganjung bini iya, Sipora, pulai ngagai entua iya ke lelaki, Jetro. Nya alai, Jetro nyaga Sipora
3 enggau dua iku anak lelaki iya. Siku anak iya benama Gersom,* laban Moses madahka: “Aku udah nyadi orang asing ba menua tu.”
4 Anak ke siku da agi benama Elieser,* laban Moses madahka: “Petara apai aku meh penulung aku. Iya meh ke nyelamatka aku ari pedang Firaun.”
5 Lebuh Moses ba kem sida ba menua puang, enda jauh ari gunung Petara ti bendar, entua iya ke lelaki, Jetro, datai ngagai iya. Bini Moses enggau bala anak iya mega bisi enggau.
6 Udah nya, Jetro ngirumka pesan ngagai Moses: “Aku, entua nuan, Jetro, udah datai ngagai nuan enggau bini sereta dua iku anak lelaki nuan.”
7 Moses pan lalu mansang ngagai entua iya. Moses besugang lalu nyium iya. Pengudah sida betanyaka rita pangan diri, sida pan tama ngagai kem.
8 Moses becherita ngagai entua iya pasal semua utai ke udah digaga Jehovah ke orang Israel, sereta semua utai ke udah digaga Iya ngagai Firaun enggau Ejip. Iya mega becherita pasal baka ni Jehovah udah nyelamatka sida ari penusah ke ditapi sida ba sepemanjai pejalai sida.
9 Jetro gaga ati ninga semua utai ti manah ke udah dikereja Jehovah ke orang Israel, lebuh Iya nyelamatka sida ari Ejip.
10 Udah nya, Jetro madahka: “Puji meh Jehovah ke udah nyelamatka kita ari Ejip enggau ari Firaun. Iya udah nyelamatka orang Israel ari dikuasa Ejip.
11 Diatu aku nemu, Jehovah lebih agi bekuasa ari semua petara ke bukai, laban Iya udah ngelindung bala nembiak Iya ari orang Ejip ke sumbung sereta jai.”
12 Udah nya, entua Moses, Jetro, mai pemeri tunu enggau korban ke bukai ke Petara. Aron enggau semua tuai orang Israel pan datai sama makai enggau entua Moses, ba depan Petara ti bendar.
13 Hari siti, baka selama, Moses duduk lalu ngakim orang Israel. Orang majak datai ngagai Moses ari pagi sampai malam.
14 Lebuh entua Moses meda semua utai ke digaga Moses, iya lalu nanya: “Nama utai ke digaga nuan ke bala orang tu? Nama kebuah nuan duduk ditu kediri-diri, lalu orang majak datai ngagai nuan ari pagi sampai malam?”
15 Ku Moses nyaut: “Laban orang majak datai ngagai aku, minta iring Petara.
16 Enti bisi penanggul entara dua iku orang, seduai iya deka datai lalu madahka nya ngagai aku. Aku mesti ngakim entara seduai iya, lalu madahka pemutus ari Petara ti bendar sereta madahka Adat Iya.”
17 Ku entua Moses madah ngagai Moses: “Enda manah chara nuan ngereja nya.
18 Nuan enggau orang Israel tentu deka berasai amat lelak, laban pengawa tu kelalu berat ke nuan, lalu nuan enda ulih ngereja tu kediri.
19 Diatu, dingaka jaku lalau aku, lalu Petara deka enggau nuan. Nuan mesti bejaku enggau Petara ti bendar ngarika orang Israel. Nuan mega mesti madahka penanggul sida ngagai Petara ti bendar.
20 Nuan mesti ngajar sida pasal atur sereta adat Petara, lalu madah ngagai sida jalai pengidup ke patut dititihka sida sereta utai ke patut dikereja sida.
21 Tang, nuan mega mesti milih ari entara orang Israel, sida ke ulih ngereja pengawa tu. Sida mesti orang ke nangika Petara sereta ulih dikearapka. Sida mesti orang ke enda rindu ngulihka penguntung ngena chara ti enda jujur. Pilih sida ngambika nyadi tuai atas 1000 iku orang, 100 iku orang, 50 iku orang, enggau 10 iku orang.
22 Enti bisi nama-nama penanggul ke nyadi, sida ulih ngakim penanggul nya. Enti penanggul nya tusah deka diputarka, sida deka mai penanggul nya ngagai nuan. Tang enti penanggul nya mit, sida ulih ngaga pemutus. Enti sida sama bekereja enggau nuan, lempung agi pengawa nuan.
23 Enti nuan nitihka chara tu, lalu nya sejalai enggau peneka Petara, enda nuan kelalu lelak, lalu semua orang deka berasai puas ati maya sida pulai.”
24 Moses ningaka jaku lalau entua iya, lalu terus ngereja semua utai ke dipadahka iya.
25 Ari bala orang Israel, Moses milih sida ke lelaki ke ulih ngereja pengawa tu, lalu ngasuh sida nyadi tuai atas 1000 iku orang, 100 iku orang, 50 iku orang, enggau 10 iku orang.
26 Nya alai, sida deka ngakim orang Israel lebuh bisi penanggul nyadi. Enti penanggul nya mit, sida deka ngakim nya kediri empu. Tang enti penanggul nya tusah diputarka, sida deka mai nya ngagai Moses.
27 Udah nya, Moses meri selamat jalai ngagai entua iya, lalu entua iya pan pulai ngagai menua diri.
