Pemansut 22:1-31
22 “Enti sesiku orang enchuri siku sapi tauka siku bedus, lalu iya munuh tauka nyual jelu nya, iya patut meri lima iku sapi nyadika ganti rugi ke siku sapi, tauka meri empat iku bedus nyadika ganti rugi ke siku bedus.
2 (“Enti siku penchuri tama ngagai rumah orang maya malam hari lalu iya ditemu orang, lalu penchuri nya dipalu sereta dibunuh, orang ke munuh iya enda berutang darah.
3 Tang enti utai nya nyadi maya siang hari, orang ke munuh iya deka berutang darah.)
“Penchuri nya mesti mayar ganti rugi. Enti iya nadai utai kena mayar, iya mesti dijual nyadika ganti rugi ke utai ke udah dichuri iya.
4 Enti iya enchuri sapi, keledai, tauka bedus, lalu jelu nya agi bisi ba iya sereta agi idup, iya mesti mayar ganti rugi dua kali lipat.
5 “Enti bisi orang mai jelu tupi iya makai rumput ba ladang tauka ba kebun anggur, lalu jelu iya makai utai tanam ba ladang orang bukai, iya mesti meri asil ti pemadu manah ari ladang iya tauka kebun anggur iya nyadika ganti rugi.
6 “Enti bisi orang nunu utai lalu api nya nyerarai ngagai babas, lalu udah nya nganguska utai tanam* ke udah diketau tauka ke bedau diketau tauka nganguska ladang orang bukai, orang ke ngidupka api nya mesti mayar ganti rugi.
7 “Enti sesiku orang ngasuh kaban iya nyimpan duit iya tauka barang iya, lalu semua utai nya kena churi ari rumah kaban iya, penchuri nya, enti iya ditangkap, iya mesti mayar ganti rugi dua kali lipat.
8 Enti penchuri nya enda ulih ditangkap, kaban iya ke ngempu rumah nya mesti dibai ngagai Petara ti bendar, ngambika nemu sekalika kaban iya ke enchuri barang nya tauka ukai.
9 Enti bisi orang nuduh orang bukai ngembuan utai ke ukai enggi iya, sekalika nya sapi, keledai, bedus, gari, tauka nama-nama utai ke lenyau, lalu siku ari seduai iya madah: ‘Aku ngempu tu!’ seduai iya mesti mansang ngagai Petara ti bendar kena nemu sapa ke amat-amat ngempu barang nya. Petara deka madahka sapa ke salah. Orang ke salah nya mesti mayar ganti rugi dua kali lipat.
10 “Enti sesiku orang ngasuh kaban iya nyaga siku keledai, tauka siku sapi, tauka siku bedus, tauka nama-nama jelu tupi iya, lalu jelu nya mati tauka balat bakal tauka ditangkap maya nadai orang meda,
11 kaban ke diasuh nyaga jelu nya mesti besumpah ba depan Aku, Jehovah, madahka diri enda salah. Orang ke ngempu jelu nya mesti setuju enggau jaku sumpah kaban iya nya. Kaban iya nya enda ibuh mayar ganti rugi.
12 Tang, enti jelu nya udah dichuri ari kaban iya, kaban iya mesti mayar ganti rugi ngagai iya.
13 Enti jelu nya mati diserang jelu ti liar, kaban iya mesti mai bangkai jelu nya nyadika bukti. Kaban iya enda ibuh mayar ganti rugi.
14 “Enti sesiku orang deka nginjau jelu ari orang bukai, lalu jelu nya balat bakal tauka mati maya orang ke ngempu jelu nya nadai enggau jelu nya, orang ke nginjau nya mesti mayar ganti rugi.
15 Tang, enti orang ke ngempu jelu nya bisi enggau jelu nya maya utai nya nyadi, orang ke nginjau nya enda ibuh mayar ganti rugi. Enti jelu nya disua, duit sua nya deka nyadi ganti rugi.
16 “Enti siku lelaki nguntik sereta nipu* siku indu dara ke bedau betunang, lalu ngereja pengawa seks enggau indu nya, lelaki nya mesti mayar mas kawin lalu kawin enggau indu nya.
17 Tang, enti apai indu nya enda ngasuh lelaki nya kawin enggau anak iya, lelaki nya agi mesti mayar sama penyampau enggau mas kawin nya.
18 “Bala indu ke nemu sihir* enda tau ditejuka idup.
19 “Orang ke ngereja ulah seks enggau jelu mesti dibunuh.
20 “Sapa-sapa ke nyerahka pemeri ngagai petara-petara bukai, kelimpah ari nyerahka pemeri ngagai Aku, Jehovah, mesti dipunaska.
21 “Anang merinsaka tauka kasar enggau orang asing, laban kita mega kala nyadi orang asing ba menua Ejip.
22 “Anang merinsaka indu balu tauka anak ke nadai apai.*
23 Enti kita merinsaka sida lalu sida ngangauka Aku minta tulung, Aku sigi tentu deka ningaka sida.
24 Pengeringat Aku deka mau baka api, lalu Aku deka munuh kita ngena pedang. Bini kita deka nyadi indu balu, lalu anak kita nadai agi apai.
25 “Enti kita nyali duit ngagai nembiak Aku ke miskin,* anang minta bungai duit, baka ke digaga sekeda orang lebuh sida nyali duit.
26 “Enti orang berutang ba kita, lalu kita ngambi gari iya nyadika jamin, kita mesti mulaika baru gari nya ngagai iya sebedau mata panas padam,
27 laban semina gari nya aja ke dikemisi iya kena nutup tubuh diri. Enti nadai gari nya, nama agi utai ke ulih dikena iya maya iya tinduk? Lebuh iya ngangauka Aku minta tulung, Aku sigi deka ningaka iya laban Aku endang pengasih.
28 “Anang nyumpah Petara tauka nyumpah bala tuai bansa kita.
29 “Anang kakang ati nyerahka sebagi ari asil ti mayuh ke udah diketau kita, sereta minyak enggau wain kita ke belimpah nyadika pemeri ke Aku. Anak tuai kita ke lelaki mesti diberi ngagai Aku.
30 Tu meh utai ke patut digaga kita ngagai anak tuai sapi kita ke lelaki enggau anak tuai bedus kita ke lelaki: Awakka jelu nya begulai enggau indai iya pengelama tujuh hari. Tang ba hari ti kelapan, kita patut nyerahka iya ngagai Aku.
31 “Kita mesti nyadi nembiak Aku ti kudus. Anang makai nama-nama dagin jelu ke udah diserang jelu ti liar ba padang. Tikauka dagin jelu nya ngagai ukui.
Nota Kaki
^ Tauka “nganguska bijirin.”
^ Tauka “siku lelaki menggoda.”
^ Peda Penerang Leka Jaku, “Ilmu sihir.”
^ Tauka “anak yatim.”
^ Tauka “merinsa.”
