Pemansut 32:1-35
32 Lebuh orang Israel ngasaika Moses lama amat ba gunung lalu iya bedau agi nurun ari gunung nya, sida pan mansang ngagai Aron lalu madahka: “Gaga meh petara ke kitai ngambika ngiring kitai, laban kitai enda nemu nama udah nyadi ngagai Moses ke mai kitai pansut ari Ejip.”
2 Aron pan nyaut sida: “Buka antin emas bini kita, bala anak lelaki kita, enggau bala anak indu kita, lalu bai antin nya ngagai aku.”
3 Nya alai, semua orang pan muka antin emas sida lalu mai nya ngagai Aron.
4 Aron pan ngambi emas nya ari sida, lalu ngaga patung anak sapi. Iya ngaga nya ngena perengka kena ngukir. Orang Israel lalu madah: “O Israel, tu meh Petara kitai ke udah mai kitai pansut ari menua Ejip.”
5 Lebuh Aron meda nya, iya lalu ngaga siti alta ba depan patung nya. Udah nya, iya madahka: “Bisi pengerami ke Jehovah pagila.”
6 Sida dani tumu pagi hari siti lalu nyerahka pemeri tunu enggau pemeri bebaik. Sida duduk makai enggau ngirup. Udah nya, sida angkat lalu berami.
7 Jehovah lalu madah ngagai Moses: “Alai nuan nurun, laban orang ke udah dibai nuan pansut ari Ejip udah ngereja dosa ti besai.
8 Jampat amat sida udah limpang ari pesan Aku. Sida udah ngaga siku patung anak sapi, lalu sida majak besugang ngagai patung nya. Sida mega nyerahka pemeri ngagai patung nya lalu madahka: ‘O Israel, tu meh Petara kita ke udah mai kita pansut ari Ejip.’”
9 Jehovah nampung jaku Iya ngagai Moses: “Sida tu sigi orang ke degil.
10 Nya alai, awakka pengeringat Aku ti mau baka api ngemunaska sida. Manah agi Aku ngaga peturun nuan aja nyadi bansa ti besai.”
11 Udah nya, Moses minta ngagai Petara iya, Jehovah. Ku iya madah: “O Jehovah, Nuan Empu ke udah mai nembiak Nuan pansut ari Ejip ngena kuasa Nuan ti besai. Nama kebuah diatu Nuan ringat lalu deka ngemunaska sida?
12 Enti Nuan ngereja nya, orang Ejip tentu deka madah: ‘Iya bisi tuju ati ti jai maya Iya mai sida pansut. Iya deka munuh sida ba gunung lalu ngemunaska sida ari dunya tu.’ Anang meh ringat, lalu ubah meh pemutus Nuan. Anang ngemunaska nembiak Nuan.
13 Kingatka meh nembiak Nuan Abraham, Isak, enggau Israel. Nuan udah besumpah ngagai sida lalu madahka: ‘Aku deka ngasuh peturun nuan nambah belipat kali ganda, baka bintang ba langit. Aku deka meri serata menua tu, menua ke udah disemayaka Aku, ngagai peturun nuan ngambika sida ulih bempu menua tu belama iya.’”
14 Jehovah pan ngubah pemutus Iya, lalu Iya enda nyadi ngemunaska nembiak Iya.
15 Moses lalu nurun ari gunung nya, lalu mai dua iti lampang batu ke ngembuan pesan Petara. Pesan nya bisi ditulis ba depan enggau ba belakang lampang batu nya.
16 Petara Empu ke ngaga lampang batu nya. Tulisan ke diukir ba lampang batu nya tulisan Petara Empu.
17 Lebuh Josua ninga orang Israel manjung, iya lalu madah ngagai Moses: “Aku bisi ninga munyi orang beperang ba kem.”
18 Tang, Moses nyaut:
“Nya ukai munyi panjung orang menang beperang,Nya mega ukai munyi orang nyabak ketegal alah,Nya munyi orang belagu.”
19 Lebuh Moses nyau datai semak ngagai kem nya, iya meda patung anak sapi sereta meda orang Israel benung betanda. Iya balat amat ringat, lalu ngempaska lampang batu ke dibai iya ba kaki gunung, nyentukka lampang batu nya pechah.
20 Iya pan ngambi patung ke digaga sida lalu nunu patung nya. Iya nganchurka patung nya sampai nyadi serbuk. Iya naburka serbuk nya ke dalam ai, lalu ngasuh orang Israel ngirup ai nya.
21 Ku Moses madah ngagai Aron: “Nama utai ke udah digaga sida tu ngagai nuan, nyentukka nuan udah ngasuh sida ngereja dosa ti besai?”
22 Ku Aron nyaut: “Anang ringat tuan. Nuan endang udah nemu sida tu sigi deka ngereja utai ti jai.
23 Ku sida madah ngagai aku: ‘Gaga meh petara ke kitai ngambika ngiring kitai, laban kitai enda nemu nama udah nyadi ngagai Moses ke mai kitai pansut ari Ejip.’
24 Nya alai, aku madah ngagai sida: ‘Buka emas ke dikena kita lalu beri ngagai aku.’ Aku pan nikauka emas nya ngagai api, lalu patung anak sapi nya pan pansut.”
25 Moses meda Aron nejuka sida ngereja utai peneka ati sida, nyentukka sida ngemaluka diri ba depan munsuh sida.
26 Udah nya, Moses mansang lalu bediri ba pintu penama kem. Ku iya madah: “Sapa ke nyukung Jehovah? Datai kitu ngagai aku.” Semua orang Lewi pan begempuru ngelingi iya.
27 Ku Moses bejaku ngagai orang Lewi: “Tu utai ke dipadahka Jehovah, Petara orang Israel: ‘Tiap iku kita mesti mai pedang kita, lalu bejalai ba serata kem. Bunuh menyadi kita, jiran kita, enggau kaban rapat kita.’”
28 Orang Lewi pan ngereja utai ke dipadahka Moses. Ba hari nya, bisi kira-kira 3,000 iku orang mati.
29 Udah nya, Moses madah: “Tentuka kita tuchi seharitu, ngambika kita ulih gawa ke Jehovah. Petara deka merekatka kita seharitu, laban kita udah sanggup ngelaban anak lelaki kita empu enggau ngelaban menyadi kita.”
30 Ba hari siti, Moses madah ngagai orang Israel: “Kita udah ngereja dosa ti amat besai. Nya alai, diatu aku deka niki gunung lalu minta ampun ngagai Jehovah. Engka Iya deka ngampunka dosa kita.”
31 Moses pulai baru ngagai Jehovah lalu iya madah: “Besai amat dosa ke udah digaga orang Israel. Sida udah ngaga petara ke diri empu ari emas.
32 Enti Nuan deka, ampunka meh dosa sida. Tang enti Nuan enggai, buai meh nama aku ari bup ke udah ditulis Nuan.”
33 Tang Jehovah nyaut Moses: “Barang sapa ke udah bedosa ngelaban Aku, nama orang nya meh ke deka dibuai ari bup Aku.
34 Diatu, mupuk nuan lalu iring orang Israel ngagai endur ke udah dipadahka Aku ngagai nuan. Melikat Aku deka bejalai dulu ari nuan. Ba hari Aku deka ngakim, Aku deka ngukum sida ketegal dosa sida.”
35 Udah nya, Jehovah ngasuh orang Israel ditinggang penulah, laban sida udah ngaga patung anak sapi. Sida meh ke ngasuh Aron ngaga patung anak sapi nya.
