Pemansut 8:1-32
8 Udah nya, Jehovah bejaku ngagai Moses: “Alai nuan betemu enggau Firaun, lalu padahka tu ngagai iya: ‘Tu utai ke dipadahka Jehovah: “Awakka nembiak Aku mupuk ngambika sida ulih nyembah Aku.
2 Enti nuan agi enggai ngasuh sida iya mupuk, Aku deka ngasuh kita ditinggang penulah. Aku deka ngemenuhka serata menua nuan enggau katak.
3 Sungai Nil deka penuh enggau katak. Katak nya deka tama ngagai istana nuan, ngagai bilik tinduk nuan, ngagai katil nuan, ngagai rumah bala pegawai nuan, enggau rumah rayat nuan. Katak nya indah deka tama ngagai oven nuan sereta ngagai mangkuk ke dikena nuan ngaga adunan tepung.
4 Katak nya deka ngasuh nuan, bala rayat nuan, enggau semua pegawai nuan idup merinsa.”’”
5 Udah nya, Jehovah bejaku ngagai Moses: “Padah ngagai Aron: ‘Ambi tungkat nuan lalu unjurka jari nuan ngagai sungai, parit, enggau paya ngambika katak pansut lalu ngemenuhka serata menua Ejip.’”
6 Aron pan ngunjurka jari iya ngagai ai ba menua Ejip. Katak pan pansut lalu ngemenuhka serata menua Ejip.
7 Tang, bala imam ke nemu sihir* ngena penemu resia sida kena ngereja utai ti sama. Sida mega ngasuh katak pansut lalu ngemenuhka serata menua Ejip.
8 Udah nya, Firaun ngangauka Moses enggau Aron. Ku iya madah ngagai seduai iya: “Pinta ngagai Jehovah ngambika Iya ulih muai katak tu ari aku enggau bala rayat aku, laban aku deka ngasuh orang Israel pansut ngambika sida ulih nyerahka pemeri sida iya ngagai Jehovah.”
9 Udah nya, Moses bejaku ngagai Firaun: “Aku ngawakka nuan madah ngagai aku, kemaya nuan deka aku ngarika nuan minta katak tu dibuai ari nuan, ari bala pegawai nuan, ari rayat nuan, enggau ari semua rumah nuan. Semina ba Sungai Nil aja ke bisi katak.”
10 Firaun lalu nyaut: “Pagila.” Ku Moses bejaku: “Aku deka nitihka peminta nuan ngambika nuan nemu nadai sapa-sapa ke baka Petara kami, Jehovah.
11 Semua katak nya deka rari ari nuan, ari semua rumah nuan, ari bala pegawai nuan, enggau ari rayat nuan. Semina ba Sungai Nil aja ke bisi katak.”
12 Nyadi, Moses enggau Aron pan mupuk ari Firaun. Moses minta ngagai Jehovah ngambika muai semua katak ke udah dianjung Iya ngagai Firaun.
13 Jehovah nitihka utai ke dipinta Moses. Semua katak ba dalam rumah, ba tengah laman, sereta ba ladang mati magang.
14 Bangkai katak ke digumpul orang Ejip nyau betugung-tugung, lalu menua Ejip nyau bebau but.
15 Pengudah Firaun meda katak nya nyau nadai agi, ati iya degil baru, lalu iya enggai mendingka Moses enggau Aron, baka ke udah dipadahka Jehovah.
16 Udah nya, Jehovah bejaku ngagai Moses: “Padahka tu ngagai Aron: ‘Palu tanah ngena tungkat nuan, lalu debu ari tanah nya deka nyadi kerengit ba serata menua Ejip.’”
17 Seduai iya pan ngereja nya. Aron lalu malu tanah ngena tungkat iya. Debu ba serata menua Ejip pan berubah nyadi kerengit ke nyerang mensia enggau jelu.
18 Bala imam ke nemu sihir ngena penemu resia sida lalu nguji deka ngaga kerengit, tang enda ulih. Semua kerengit nya nyerang mensia enggau jelu.
19 Nya alai, bala imam ke nemu sihir bejaku ngagai Firaun: “Tu ari kuasa Petara!”* Tang ati Firaun agi degil. Iya enggai mendingka Aron enggau Moses, baka ke udah dipadahka Jehovah.
20 Udah nya, Jehovah bejaku ngagai Moses: “Pagila, nuan patut dani tumu lalu mansang ngagai sungai dulu agi ari Firaun. Lebuh Firaun datai ba sungai, padahka tu ngagai iya: ‘Tu utai ke dipadahka Jehovah: “Awakka nembiak Aku mupuk ngambika sida ulih nyembah Aku.
21 Tang enti nuan enggai, Aku deka ngasuh lalat* nyerang nuan, bala pegawai nuan, enggau bala rayat nuan. Rumah orang Ejip deka penuh laban lalat. Indah tanah endur sida bediri pan deka penuh laban lalat.
22 Maya nya, Aku deka ngelindung Gosen ngambika nadai lalat ba endur nya, laban nya endur nembiak Aku diau. Nya baru nuan nemu, Aku, Jehovah, bisi ba menua tu.
23 Aku deka ngasuh nembiak Aku bebida ari rayat nuan. Utai ti luar biasa tu deka nyadi pagila.”’”
24 Jehovah pan ngereja nya. Mayuh amat lalat datai nyerang istana Firaun, nyerang rumah bala pegawai iya, sereta nyerang serata menua Ejip. Lalat nya ngasuh orang Ejip balat merinsa.
25 Pengujung iya, Firaun ngangauka Moses enggau Aron, lalu madahka: “Alai, serahka pemeri kita ngagai Petara kita. Tang kereja nya ba menua tu.”
26 Tang ku Moses nyaut: “Enda ulih. Orang Ejip tentu ringat ketegal jelu ke diserahka kami nyadi pemeri ngagai Petara kami, Jehovah. Enti orang Ejip meda kami nyerahka pemeri nya, sida tentu deka nikau kami ngena batu.
27 Kami deka bejalai tiga hari ngagai menua puang, lalu ba dia meh kami deka nyerahka pemeri kami ngagai Petara kami, Jehovah, baka ke udah dipadahka Iya ngagai kami.”
28 Ku Firaun nyaut: “Aku deka ngasuh kita mupuk ngambika ulih nyerahka pemeri ngagai Petara kita, Jehovah, ba menua puang. Tang anang bejalai kelalu jauh. Tulung aku minta ngagai Petara kita ngambika muai lalat tu.”
29 Udah nya, Moses madahka: “Aku deka mupuk lalu minta ngagai Jehovah. Pagila, lalat tu deka rari ari nuan, ari bala pegawai nuan, enggau ari bala rayat nuan. Tang badu agi nipu kami. Anang nagang kami ari nyerahka pemeri ngagai Jehovah.”
30 Moses pan mupuk ari Firaun, lalu besampi ngagai Jehovah.
31 Jehovah lalu ngereja utai ke dipinta Moses, lalu lalat pan rari ari Firaun, ari bala pegawai iya, enggau ari bala rayat iya. Nadai siku pan lalat ke agi tinggal.
32 Tang ati Firaun degil baru, lalu iya enggai ngemendarka orang Israel mupuk.
Nota Kaki
^ Peda Penerang Leka Jaku, “Ilmu sihir.”
^ Jaku Asal, “Tu tunjuk jari Petara!”
^ Sebengkah lalat ke nemu ngigit.
