Pemungkal 4:1-26
4 Adam besetubuh* enggau bini iya Awa, lalu bini iya pan ngandung. Pengudah Awa ngadaka Kain, ku iya bejaku: “Jehovah udah nulung aku ngadaka siku anak lelaki.”
2 Udah nya Awa ngadaka Abel, iya nya menyadi lelaki Kain.
Abel nyadi pengibun bedus, lalu Kain nyadi orang ke betanamka utai.
3 Pengudah sesiti timpuh, Kain mai asil utai ke ditanam iya nyadika pemeri ke Jehovah.
4 Tang Abel mai beberapa iku anak keterubah ari raban bedus iya, nyengkaum lemak jelu nya. Jehovah lantang ati enggau Abel sereta pemeri iya.
5 Tang Petara enda lantang ati enggau Kain sereta pemeri iya. Nya alai, Kain balat pedis ati sereta kecewa.
6 Jehovah lalu nanya Kain: “Nama kebuah nuan pedis ati sereta kecewa?
7 Enti nuan muai runding ti salah lalu ngereja utai ti betul, Aku deka lantang ati enggau nuan. Tang enti nuan milih ngereja utai ti salah, dosa deka manjuk nuan lalu bekuasa atas nuan. Nuan mesti ngalahka iya.”
8 Udah nya, Kain bejaku ngagai menyadi iya Abel: “Aram tua bejalai.” Lebuh seduai iya datai ba siti endur, Kain nyerang Abel lalu munuh iya.
9 Ku Jehovah nanya Kain: “Dini menyadi nuan Abel?” Udah nya Kain nyaut: “Ni aku nemu. Aku ukai nya pengibun iya.”
10 Ku Petara nyaut: “Nama kebuah nuan ngereja nya? Dinga nuan! Darah menyadi nuan ngangauka Aku ari tanah.
11 Lalu diatu, laban nuan udah munuh menyadi nuan ba tanah tu,* nuan deka ditinggang sumpah lalu diburu ari endur tu.
12 Lebuh nuan betanam, tanah enda mansutka asil. Nuan deka bejalai segau-segau ba dunya lalu seruran ngerarika diri.”
13 Nya alai Kain bejaku ngagai Jehovah: “Ukum tu kelalu berat.
14 Seharitu Nuan muru aku ari endur tu, lalu aku nyau jauh ari Nuan. Aku deka bejalai segau-segau ba dunya tu lalu seruran ngerarika diri. Sapa-sapa ke tetemuka aku tentu deka munuh aku.”
15 Nya alai Jehovah bejaku ngagai Kain: “Ketegal nya, sapa-sapa ke munuh nuan deka diukum tujuh kali.”
Jehovah lalu ngaga siti tanda ke Kain, ngambika sapa-sapa ke betemu enggau iya enda munuh iya.
16 Kain pan mupuk ninggalka Jehovah lalu diau ba menua alai orang ngerarika diri,* tunga ke timur Eden.
17 Udah nya, Kain besetubuh enggau bini iya. Bini iya ngandung lalu ngadaka Enok. Kain nirika siti kuta, lalu kuta nya diberi nama nitihka nama anak lelaki iya, Enok.
18 Enok bisi siku anak lelaki ke benama Irat. Irat bisi siku anak lelaki ke benama Mehujael. Mehujael bisi siku anak lelaki ke benama Metusael, lalu Metusael bisi siku anak lelaki ke benama Lamek.
19 Lamek bisi dua iku bini. Nama bini iya ti keterubah nya Adah, lalu bini iya ti kedua nya Silah.
20 Adah ngadaka Jabal, lalu Jabal nya orang keterubah diau ba langkau kain sereta betupika jelu.
21 Nama menyadi lelaki iya Jubal. Jubal nya orang keterubah ke nemu nebah belikan* enggau nyepu kesuling.*
22 Silah ngadaka Tubal-kain. Tubal-kain nya orang ke begagaka semua macham pekekas ari temaga enggau besi. Lalu nama menyadi indu Tubal-kain nya Naamah.
23 Udah nya Lamek nyebut tu ngagai bini iya, Adah enggau Silah:
“Bini aku, dingaka aku;Pendingka jaku aku:
Aku udah munuh siku lelaki ke ngemediska aku,Siku lelaki ke biak, laban iya mukut aku.
24 Enti orang ke munuh Kain diukum 7 kali,Orang ke munuh aku patut diukum 77 kali.”
25 Adam besetubuh baru enggau bini iya, lalu bini iya ngadaka siku anak lelaki. Anak nya diberi nama Set,* laban ku indu nya: “Petara udah meri aku siku agi anak kena nganti Abel ke udah dibunuh Kain.”
26 Set mega bisi siku anak lelaki, lalu anak nya diberi nama Enos. Ba maya nya mega, orang berengkah ngangauka nama Jehovah.
Nota Kaki
^ Iya nya, pengawa seks entara siku lelaki enggau siku indu.
^ Tauka “laban darah menyadi nuan udah neritik ba tanah tu.”
^ Tauka “menua Nod.”
^ Tauka “harp.” Sebengkah perengka musik ke betali baka gitar, tang gamal iya enda sebaka enggau gitar.
^ Tauka “seruling.”
^ Reti nya “Dipilih; Diengkah; Ditetapka.”
