Pemungkal 6:1-22
6 Mensia majak mayuh ba dunya, lalu sida bisi anak indu.
2 Sekeda anak Petara ti bendar* nyau berengkah sedar anak indu mensia nya bajik gamal. Nya alai, sida jadi enggau indu ti dikedekaka sida.
3 Udah nya Jehovah bejaku: “Aku enggai agi sabar enggau mensia laban sida nitihka pengingin sida ti bedosa. Nya alai sida semina ulih idup 120 taun* da agi.”
4 Lebuh Petara bejaku munyi nya, orang ke ngembuan pemesai tubuh enggau peninggi ti luar biasa* endang udah bisi ba dunya, laban anak Petara ti bendar besetubuh* enggau sida ke indu lalu ngadaka anak lelaki ke baka nya. Maya jeman nya, bala anak sida amat kering sereta tebilang.
5 Jehovah meda mensia ngereja mayuh pengawa ti jai ba dunya, lalu ati enggau runding sida seruran jai.
6 Jehovah nesal* laban Iya udah ngaga mensia ba dunya tu, lalu ati Iya balat pedis.
7 Nya alai Jehovah bejaku: “Aku deka ngemunaska mensia ari dunya tu, nyengkaum jelu tupi, jelu ti ngerayap, enggau utai idup ti besayap, laban Aku udah nesal ngaga sida.”
8 Tang Noah ngelantangka ati Jehovah.
9 Tu utai ke nyadi ba pengidup Noah.
Noah siku lelaki ke ngereja utai ti betul ba mata Petara. Noah enda baka orang bukai ke idup maya jeman iya. Iya seruran ngereja utai ti betul. Noah bejalai enggau Petara ti bendar.
10 Noah bisi tiga iku anak lelaki, iya nya Sem, Ham, enggau Japet.
11 Ba mata Petara, dunya udah rusak lalu penuh enggau penyai.
12 Au, lebuh Petara meda dunya, ba mata Iya, dunya udah rusak. Semua mensia ngereja utai ti jai.
13 Udah nya, Petara bejaku enggau Noah: “Aku udah ngaga pemutus deka ngemunaska semua mensia laban dunya udah penuh enggau penyai ke digaga sida. Aku deka ngemunaska sida sama enggau dunya.
14 Gaga siti bandung* ari kayu ti manah.* Gaga mayuh bilik ba dalam bandung nya, lalu begian luar enggau dalam bandung nya dilapis ngena tar.
15 Tu sukatan kena nuan ngaga bandung: Pemanjai iya 134 meter, buka iya 22 meter, lalu peninggi iya 13 meter.*
16 Bandung nya deka bisi tiga tingkat. Gaga jenila* ngambika cahaya ulih tama. Jenila nya kira-kira setengah meter* ari perabung bandung nya. Gaga meh siti pintu ba tisi bandung nya.
17 “Aku deka ngemunaska semua utai ti bisi seput pengidup ba baruh langit ngena ai bah. Semua utai ba dunya tu deka mati magang.
18 Aku deka ngaga sempekat enggau nuan. Nuan, bini nuan, bala anak nuan, enggau bala bini sida mesti tama ngagai bandung nya.
19 Bai semua macham jelu tama ngagai bandung nya. Bai sepasang ari tiap iti bansa jelu nya, siku lelaki enggau siku indu, ngambika sida ulih terus idup.
20 Bai sepasang ari tiap bansa utai idup ke besayap, jelu tupi, enggau jelu ti ngerayap, ngambika sida ulih terus idup.
21 Nuan mega patut ngumpul lalu mai semua bansa pemakai ke kita sebilik enggau ke bala jelu.”
22 Nya meh utai ke digaga Noah. Iya ngereja semua utai ke diasuh Petara.
Nota Kaki
^ Tauka “melikat.”
^ Timpuh 120 taun merujuk ngagai penyampau taun ke agi tinggal sebedau orang jai ba dunya dipunaska ngena ai bah.
^ Jaku Hebrew, “Nefilim,” engka mai reti “Ke Ngelabuhka,” iya nya sida ke ngasuh orang bukai labuh. Peda Penerang Leka Jaku, “Nefilim.”
^ Iya nya, pengawa seks entara siku lelaki enggau siku indu.
^ Tauka “kecewa.”
^ Kapal besai ti baka kutak ti panjai.
^ Engka sebengkah ari kayu pain.
^ Jaku Asal, “Pemanjai iya 300 kiubit, buka iya 50 kiubit, lalu peninggi iya 30 kiubit.” Peda Rujukan B14.
^ Jaku Hebrew, “tso′har.” Engka mai reti atap tauka jenila.
^ Jaku Asal, “1 kiubit.” Peda Rujukan B14.
