Pemungkal 8:1-22
8 Udah nya, Petara ingat pasal Noah enggau semua jelu liar sereta jelu tupi ke bisi enggau iya ba dalam bandung. Petara ngasuh angin bepuput ba serata dunya, lalu ai berengkah surut.
2 Ai ngetu labuh ari langit, lalu pintu ai ba langit pan ditutup. Nya alai, hari pan ngetu ujan.
3 Ai majak surut. Pengudah 150 hari, ai nyau majak kurang.
4 Ba hari ke-17 dalam bulan ketujuh, bandung nya ngetu ba kawasan gunung Ararat.
5 Ai majak surut nyentuk ngagai bulan ke-10. Ba hari kesatu dalam bulan ke-10, tuchung gunung nyau ulih dipeda.
6 Pengudah 40 hari, Noah muka jenila ba bandung nya.
7 Iya ngelepaska siku burung kak. Burung nya terebai ke luar lalu pulai baru ngagai bandung. Burung nya terebai baka nya tiap kali iya dilepaska. Maya ai bah udah abis surut, nya baru burung nya enda agi pulai ngagai bandung.
8 Udah nya iya ngelepaska siku burung achang kena nemu sekalika ai udah surut tauka bedau.
9 Burung nya nadai tetemuka endur alai iya ulih inggap laban ai agi ngampuhka serata dunya. Nya alai iya pulai baru ngagai bandung. Noah ngulurka jari iya ngagai burung nya lalu mai iya tama ngagai bandung.
10 Udah nya, iya nganti tujuh hari da agi lalu ngelepaska burung achang nya baru.
11 Lemai nya lebuh burung nya pulai baru, Noah meda iya mai daun kana ke baru dipatahka. Nya baru Noah nemu, ai udah surut.
12 Noah nganti tujuh hari da agi. Udah nya iya ngelepaska burung achang nya. Tang kali tu, burung nya nadai pulai.
13 Ba taun ke-601, ba hari kesatu dalam bulan kesatu, ai bah udah surut. Noah muka perabung bandung nya mimit, lalu meda tanah nyauka rangkai.
14 Ba hari ke-27 dalam bulan kedua, tanah udah rangkai magang.
15 Petara madah ngagai Noah:
16 “Nuan enggau bini nuan, bala anak nuan enggau bala bini sida ulih pansut ari bandung tu.
17 Bai pansut magang semua jelu, utai idup ti besayap, jelu tupi, jelu liar, enggau jelu ti ngerayap, ngambika sida beranak enggau mayuh lalu nyadi majak mayuh ba dunya.”
18 Noah enggau bini iya, bala anak seduai iya enggau bala bini anak seduai iya pan pansut ari bandung nya.
19 Semua jelu: Jelu ti ngerayap, utai idup ti besayap, enggau semua jelu ke idup ba darat pansut ari bandung, nitihka raban sida empu.
20 Noah lalu ngaga siti alta* ke Jehovah. Ari semua bansa jelu ti tuchi enggau ari semua bansa burung ti tuchi, Noah ngambi sekeda ari nya nyadika pemeri tunu ba alta nya.
21 Jehovah lalu nyium bau ti ngelantangka ati Iya. Ku Jehovah bejaku dalam ati Iya: “Aku enggai agi nyumpah tanah ketegal pengawa ke dikereja mensia, laban ati enggau runding sida seruran jai kenyau ari mit. Aku enggai agi ngemunaska semua utai ti idup baka ke udah dikereja Aku sebedau tu.
22 Kenyau ari diatu, dunya deka seruran bisi musin nanam enggau musin ngetau, hari chelap enggau hari angat, musin panas enggau musin chelap, sereta siang enggau malam.”
Nota Kaki
^ Peda Penerang Leka Jaku.
