Penyampau 25:1-18
25 Lebuh diau ba Sitim, orang Israel berengkah ngereja pengawa seks enggau bala indu orang Moap.
2 Bala indu orang Moap mai orang Israel nyerahka korban ngagai bala petara sida. Orang Israel makai korban nya lalu besugang nyembah petara-petara nya.
3 Sida enggau nyembah Baal ba Peor. Nya alai, Jehovah balat ringat ngagai sida.
4 Ku Jehovah madah ngagai Moses: “Tangkap semua bala tuai nya. Bunuh sida lalu gantung bangkai sida ba depan Aku, Jehovah, ngambika ulih dipeda semua orang. Nya baru Aku, Jehovah, badu ringat ngagai orang Israel.”
5 Udah nya, Moses madah ngagai bala hakim orang Israel: “Tiap iku kita patut munuh orang ke udah nyembah Baal ba Peor.”
6 Tang, lebuh orang Israel benung nyabak ba pintu penama langkau gempuru, siku lelaki Israel mai siku indu orang Midian ngagai kawasan kem. Iya ngereja nya ba depan Moses enggau semua orang Israel.
7 Lebuh Pinehas anak Eleasar, iya nya uchu Imam Aron, tepedaka seduai iya, iya pan terus angkat lalu ninggalka orang Israel ke benung begelumu. Iya ngambi siti sangkuh,
8 lalu ngagai lelaki nya sampai ke dalam langkau kain lelaki nya. Iya ngerejang seduai iya ngena sangkuh nya sampai perut* indu nya tembus. Udah nya, penulah ke ninggang orang Israel pan ngetu.
9 Penulah nya udah nabanka nyawa 24,000 iku orang.
10 Udah nya, Jehovah madah ngagai Moses:
11 “Ketegal Pinehas anak Eleasar, iya nya uchu Imam Aron, Aku badu ringat ngagai orang Israel, laban iya enggai sekali-kali nejuka orang Israel nyembah petara bukai kelimpah ari Aku. Nya alai, Aku enda ngemunaska orang Israel.
12 Nyadi, padah ngagai iya: ‘Aku deka ngaga sempekat enggau iya, laban Aku lantang ati ngagai iya.
13 Nitihka sempekat tu, iya enggau bala peturun iya deka seruran gawa nyadi imam. Tu ketegal iya enggai sekali-kali nejuka orang Israel nyembah petara bukai kelimpah ari Aku, lalu iya udah minta pengampun dosa ke orang Israel.’”
14 Lelaki Israel ke dibunuh enggau indu orang Midian nya benama Simri anak Salu. Iya siku tuai suku ari raban bansa Simion.
15 Indu orang Midian ke dibunuh nya benama Kosbi anak Zur. Zur nya siku tuai suku ari siti raban bansa ba Midian.
16 Udah nya, Jehovah bejaku ngagai Moses:
17 “Serang orang Midian lalu bunuh sida,
18 laban sida pintar amat nipu kita ngambika kita bedosa ba Peor. Sida mega udah ngasuh kita bedosa nengah Kosbi, iya nya anak indu siku tuai orang Midian, ke dibunuh ba hari ti sama kita ditinggang penulah ke dibai Aku ketegal dosa kita ba Peor.”
Nota Kaki
^ Tauka “perengka seks.”
