Penyampau 27:1-23
27 Bala anak indu Zelofehat benama Malah, Noa, Hoklah, Milkah, enggau Tirsah. Zelofehat nya anak Heper, Heper nya anak Gilead, Gilead nya anak Makir, Makir nya anak Manasi, lalu Manasi nya anak Josep. Bala anak indu Zelofehat mansang
2 ngagai Moses, Imam Eleasar, bala tuai, enggau semua orang Israel ba pintu penama langkau gempuru. Ku sida madahka:
3 “Apai kami mati ba menua puang, tang ukai ketegal iya enggau bala penyukung Korah ngelaban Jehovah. Iya mati ketegal dosa iya empu. Iya nadai anak lelaki.
4 Nama kebuah nama apai kami patut dibuai ari suku iya, semina ketegal iya nadai anak lelaki? Beri meh kami tanah pesaka sama baka bala menyadi apai kami.”
5 Nyadi, Moses pan mai pekara nya ngagai Jehovah.
6 Udah nya, Jehovah madah ngagai Moses:
7 “Betul utai ku bala anak indu Zelofehat nya. Nuan patut meri tanah pesaka ngagai sida sama baka bala menyadi apai sida. Tanah pesaka apai sida patut diberi ngagai sida.
8 Padah ngagai orang Israel: ‘Enti siku lelaki mati, lalu iya nadai anak lelaki, tanah pesaka iya patut diberi ngagai anak indu iya.
9 Tang enti iya nadai anak indu, tanah pesaka iya patut diberi ngagai bala menyadi iya ke lelaki.
10 Enti iya nadai menyadi lelaki, tanah pesaka iya patut diberi ngagai menyadi apai iya ke lelaki.
11 Tang enti apai iya nadai menyadi lelaki, tanah pesaka iya patut diberi ngagai kaban belayan ke pemadu semak enggau iya.* Baka ke dipadah Aku, Jehovah, ngagai nuan, atur tu deka nyadi adat ke patut dititihka orang Israel.’”
12 Udah nya, Jehovah bejaku ngagai Moses: “Niki ngagai gunung ba kawasan Abarim, lalu peda meh menua ke deka diberi Aku ngagai orang Israel.
13 Pengudah nuan meda menua nya, nuan deka mati baka abang nuan, Aron, lalu dikuburka baka aki ini nuan.
14 Tu ketegal, lebuh orang Israel mutap ngelaban Aku ba menua puang Zin, nuan enda nitihka pesan Aku lalu nuan enda ngemuliaka Aku ba depan sida. Utai nya nyadi lebuh Aku meri sida ai ba mata ai Meribah ba Kades.”
15 Udah nya, Moses bejaku ngagai Jehovah:
16 “Jehovah, Petara ke meri nyawa ngagai semua mensia, lantik meh siku orang kena ngiring orang Israel
17 ngambika nembiak Nuan, Jehovah, enda nyadi baka raban bedus ke nadai pengibun. Orang ke dilantik nya deka ngiring sida, lalu sida mesti ngasika iya ba semua pekara.”
18 Ku Jehovah bejaku ngagai Moses: “Josua anak Nun nya orang ke landik ngereja pengawa. Kangauka meh iya, lalu engkahka jari nuan ba atas iya.
19 Asuh iya bediri ba depan Imam Eleasar enggau semua orang Israel, lalu lantik iya ba depan semua sida.
20 Beri sekeda kuasa nuan ngagai iya, ngambika semua orang Israel ngasika iya.
21 Josua deka bediri ba depan Imam Eleasar lalu Imam Eleasar deka betanya ngagai Aku, Jehovah, ngena Urim* kena nemu pemutus Aku. Lebuh Josua meri pesan,* semua orang Israel mesti nitihka pesan nya.”
22 Moses pan ngereja utai ke diasuh Jehovah. Iya ngangauka Josua, lalu ngasuh Josua bediri ba depan Imam Eleasar enggau semua orang Israel.
23 Udah nya, Moses ngengkahka jari iya ba atas Josua lalu ngelantik iya baka ke diasuh Jehovah.
Nota Kaki
^ Tauka “ke bisi pertalian darah enggau iya.”
^ Peda Penerang Leka Jaku.
^ Tauka “Lebuh Petara meri pesan,” engka nengah Josua tauka Eleasar.
