Pilimon 1:1-25
1 Aku, Paul, ke dijil ketegal nyadi murid Jesus Kristus, enggau menyadi kitai Timoti, nulis surat tu ngagai Pilimon, menyadi ke sama gawa enggau kami sereta ke dikerinduka kami.
2 Surat tu mega ditujuka ngagai menyadi indu kami, Apia, ngagai Arkipus ke nyadi soldadu Kristus baka kami, sereta ngagai raban gempuru* ke begempuru ba rumah nuan:
3 Ngarapka kita bulih pemanah ati ti besai enggau pengelantang ari Petara ti Apai kitai, sereta ari Tuan Jesus Kristus.
4 Aku seruran beterima kasih ngagai Petara aku lebuh aku nyebut nuan dalam sampi aku,
5 laban aku suah ninga pasal pengarap enggau pengerindu ke diayanka nuan ngagai Tuan Jesus sereta ngagai semua nembiak Petara ti kudus.
6 Aku besampi ngambika pengarap ke dikembuan kita ulih ngasuh kita sedar pasal tiap iti utai ke manah ti diulih kitai nengah Kristus.
7 Menyadi, aku bulih pengaga ati ti besai lalu aku berasai amat lantang ati lebuh ninga pasal pengerindu nuan, laban nengah nuan nembiak Petara ti kudus udah berasai diperansang.
8 Taja pan aku ke nyadi rasul Kristus bisi kuasa ti besai ulih ngasuh nuan* ngereja utai ke patut dikereja,
9 tang aku ka agi minta nuan ngereja tu ketegal pengerindu nuan, laban aku, Paul, udah tuai lalu diatu aku mega dijil ketegal nyadi murid Jesus Kristus.
10 Utai ke dipinta aku tu bekaul enggau anak aku, Onesimus. Sekumbang aku dijil,* aku nyau nyadi baka apai iya.
11 Suba, iya nadai guna ba nuan, tang diatu, iya beguna ba nuan enggau ba aku.
12 Aku balat sayauka iya, lalu aku nganjung iya pulai baru ngagai nuan.
13 Aku ka iya mengkang enggau aku ba ditu, ngambika iya nganti nuan lalu ngintu aku sekumbang aku dijil ketegal Berita Manah.
14 Tang, aku enggai ngereja nama-nama enti nadai pemendar ari nuan, ngambika nuan ulih ngereja utai ti manah nya, ukai ketegal dipejal, tang ketegal nuan empu ke deka ngereja nya.
15 Engka nya meh kebuah iya ninggalka nuan enda lama, ngambika nuan tau nerima iya pulai baru belama iya,
16 ukai nyadi ulun agi, tang lebih agi ari nya, iya nya nyadi menyadi Kristian kitai. Aku amat sayauka iya, tang nuan deka lebih agi sayauka iya ke nyadi ulun nuan sereta ke nyadi siku menyadi Kristian.
17 Nyadi, enti nuan ngumbai aku kaban nuan, terima meh iya enggau manah baka nuan ke nerima aku.
18 Kelimpah ari nya, enti iya bisi ngereja utai ti salah ngagai nuan tauka berutang ba nuan, awakka aku meh ke mayar ngagai nuan.
19 Aku empu ke nulis surat tu, lalu aku besemaya deka mayar semua utang iya. Aku mega enda ibuh ngingatka nuan pasal nuan ke berutang nyawa ba aku.
20 Au menyadi, ngarapka nuan ke sama nyadi murid Tuan nulung aku ba pekara tu, ngambika ati aku ke nyadi murid Kristus berasai diperansang.
21 Aku andal nuan deka ngereja utai ke dipinta aku. Nya alai, aku nulis ngagai nuan laban aku nemu nuan deka ngereja lebih ari utai ke dipadah aku.
22 Tang kelimpah ari nya, sediaka meh endur diau ke aku, laban aku ngarapka nengah sampi kita, aku ulih pulai baru* ngagai kita.
23 Epafras, ke dijil baka aku ketegal beserakup enggau Jesus Kristus, ngirumka salam ngagai nuan.
24 Pia mega enggau Mark, Aristarkus, Demas, enggau Luke, ke sama gawa enggau aku.
25 Awakka runding enggau ulah* ke diayanka kita diberekat enggau pemanah ati Tuan Jesus Kristus ti besai.
Nota Kaki
^ Tauka “sidang.”
^ Tauka “ulih bejaku enggau berani lalu ngasuh nuan.” Peda Penerang Leka Jaku, “Bejaku enggau berani.”
^ Jaku Asal, “dirantai.”
^ Tauka “dilepaska.”
^ Jaku Gerika, “pneu′ma.” Peda Penerang Leka Jaku, “Pneu′ma.”
