Titus 3:1-15
3 Terus meh ngingatka sida ngambika nunduk sereta ngasika perintah enggau sida ke bekuasa, sereta ngambika sida besedia ngereja tiap iti pengawa ti manah.
2 Terus meh ngingatka sida ngambika enda bejaku jai pasal sapa-sapa sereta enda rindu belaya. Tang, sida mesti bisi runding ti masuk akal sereta amat nelap enggau semua orang.
3 Nya ketegal suba, kitai mega enda nemu berunding, enda ngasi, dilimpangka, nyadi ulun mayuh macham pengingin enggau pengelantang diri, majak ngereja utai ti jai, kepapas, nyadi orang ti keji, sereta begedika pangan diri.
4 Tang, Petara ti Penyelamat kitai mandangka pemanah ati enggau pengerindu ngagai mensia
5 (ukai ketegal kitai ngereja utai ti lurus, tang ketegal pengasih Iya). Iya nuchi kitai ngambika kitai bulih pengidup lalu nengah kuasa kudus,* Iya ngaga kitai nyadi baru. Nya meh chara Iya nyelamatka kitai.
6 Iya nuangka kuasa kudus Iya enggau chukup mayuh* ngagai kitai nengah Penyelamat kitai, Jesus Kristus.
7 Enggau nya, pengudah kitai dikumbai lurus nengah pemanah ati Petara ti besai, kitai ulih nerima pesaka ke dianti kitai enggau andal, iya nya pengidup ti meruan belama iya.
8 Jaku nya tau dikearapka lalu aku deka kita seruran ngingatka orang pasal pekara nya, ngambika sida ke pechayaka Petara ulih terus ngasuh runding sida ditujuka ngagai pengawa ti manah. Semua utai nya manah sereta beguna ba orang.
9 Tang anang enggau kelikuh ti beli, betalat pasal tusut peturun, bekelakar, tauka belaya pasal Adat, laban semua nya nadai guna sereta nadai mai nama-nama penguntung.
10 Enti bisi orang ngerembaika ajar ti pelesu, rara meh* orang nya. Pengudah ngerara iya kedua kali, nuan patut ngenyauhka diri ari iya.
11 Laban orang ke baka nya udah limpang ari jalai ti bendar. Iya ngereja dosa lalu pengawa iya empu nunjukka iya besalah.
12 Maya aku nganjung Artemas tauka Tikikus ngagai nuan, uji meh enggau naka ulih datai ngagai aku ba Nikopolis laban aku udah mutuska deka diau ba dia maya musin chelap.
13 Uji meh enggau naka ulih nyediaka utai ke diguna Apollos enggau Senas ke landik pasal Adat, ngambika seduai iya nadai kurang nama-nama utai lebuh ba rantau jalai.
14 Awakka bala menyadi kitai mega belajar nelebaka diri ngereja pengawa ti manah, ngambika sida ulih nulung maya orang amat-amat begunaka bantu. Enggau nya, sida deka seruran mansutka asil ba pengawa sida.
15 Semua sida ke bisi enggau aku ngirumka salam ngagai nuan. Kirumka salam aku ngagai sida ke sama arap sereta ke rinduka kami.
Ngarapka semua kita nerima pemanah ati Petara ti besai.
