Ulang Adat 6:1-25
6 “Jehovah, Petara kita, udah meri pesan, adat, enggau atur, ngambika kita ulih nitihka semua nya pengudah kita tama ngagai menua ke deka alai kita diau.
2 Kita, bala anak kita, enggau bala uchu kita patut nangika Jehovah, Petara kita, seumur idup. Kita mega patut ngasika semua adat enggau pesan Iya, ti dipadahka aku ngagai kita ngambika kita panjai umur.
3 Orang Israel, pendingka lalu titihka semua adat enggau pesan nya, ngambika kita ulih idup lantang sereta majak mayuh ba menua ke kaya enggau ai tusu sereta madu, baka ke udah disemayaka Jehovah, Petara aki ini kita.
4 “Pendingka tu, O kita orang Israel, Jehovah nya Petara kitai, lalu semina siku Iya aja ti Jehovah.
5 Kita patut rinduka Jehovah, Petara kita, enggau pengabis ati kita, enggau pengabis pengidup* kita, sereta enggau pengabis pengering kita.
6 Semua pesan ke diberi aku ngagai kita seharitu patut disimpan dalam ati kita.
7 Ajar pesan nya ngagai bala anak kita. Kita patut ngulang pesan nya lebuh kita ba rumah, lebuh kita bejalai, lebuh kita gali, enggau lebuh kita dani.
8 Tanchangka semua nya ba lengan kita sereta ba kening kita ngambika kita ingat.
9 Tuliska semua nya ba bingkai pintu rumah kita enggau ba pintu penama kuta kita.
10 “Jehovah, Petara kita, udah besemaya ngagai aki ini kita, iya nya Abraham, Isak, enggau Jakop. Iya deka meri sereta mai kita ngagai menua ke bisi mayuh kuta ti besai sereta manah, ke ukai digaga kita.
11 Rumah ba dia penuh enggau utai ti manah ke ukai diulih kita kediri empu. Lalu bisi telaga ke ukai ditumbak kita, enggau kebun anggur sereta kebun pun kayu kana ti ukai ditanam kita. Lalu kita deka makai sampai kita kenyang.
12 Maya nya, anang enda ingatka Jehovah, Petara ti udah mai kita pansut ari menua Ejip, iya nya menua alai kita nyadi ulun.
13 Kita patut nangika Jehovah, Petara kita, lalu nyembah Iya siku aja. Enti kita besumpah, besumpah meh atas nama Iya.
14 Anang nyembah petara bukai tauka petara orang bansa bukai ke diau ngelingi kita,
15 laban Jehovah, Petara ke bisi enggau kita dekaka kita nyembah Iya siku aja. Enti kita nyembah petara bukai, Jehovah deka ringat ngagai kita, lalu Iya deka ngemunaska kita ari dunya tu.
16 “Anang nguji Jehovah, Petara kita, baka ke udah dikereja kita di Masah.
17 Kita patut bebendar nitihka pesan, atur, sereta utai ke patut dikingatka kita ke udah diberi Jehovah, Petara kita.
18 Kita mesti ngereja utai ti manah sereta ngena ba mata Jehovah. Enggau nya, kita deka idup lantang sereta ulih tama lalu diau ba menua ti manah nya, ke udah disemaya Jehovah ngagai aki ini kita.
19 Kita ulih muru munsuh kita, baka ke udah disemayaka Jehovah.
20 “Dudi hari ila, enti bala anak kita nanya: ‘Nama kebuah Jehovah, Petara kitai, meri semua atur, adat, enggau utai ke patut dikingatka kita?’
21 Udah nya, kita deka madah ngagai bala anak kita: ‘Kami udah nyadi ulun Firaun* ba Ejip. Tang, Jehovah udah mai kami pansut ari menua nya ngena jari Iya ti bekuasa.
22 Kami empu udah meda, Jehovah udah ngereja mayuh utai ti luar biasa sereta ngereja utai ti balat ngenakutka ngagai orang Ejip, ngagai Firaun, enggau ngagai semua orang ke ba rumah Firaun.
23 Iya udah mai kami pansut ari menua Ejip ngambika kami ulih tama ngagai menua ke udah disemayaka Iya ngagai aki ini kitai.
24 Udah nya, Jehovah ngasuh kami nangika Iya. Jehovah mega ngasuh kami nitihka semua atur ke diberi Iya ngagai kami, ngambika kami ulih idup lantang sereta mengkang idup baka ke seharitu.
25 Enti kami ngasika Jehovah, Petara kitai, lalu enggau bebendar nitihka semua pesan Iya, Iya deka ngumbai kami orang ke lurus.’
Nota Kaki
^ Jaku Asal, “ne′phesh.” Peda Penerang Leka Jaku, “Ne′phesh.”
^ Gelar ke diberi ngagai raja Ejip.
