Aku ada ba Acul, siti endur ti amat dalam ba Guatemala. Ruang bilik aku peturun Ixil, iya nya siti ari raban bansa Maya. Aku udah belajarka bansa jaku Sepanyol enggau Ixil. Maya aku agi mit, perang nyadi ba menua Guatemala pengelama 36 taun. Lalu mayuh orang Ixil mati.

Maya aku beumur 4 taun, menyadi lelaki aku ke tuai main enggau bom jari. Bom nya meletup. Menyadi lelaki aku mati ketegal nya lalu aku nyadi buta. Pengudah nya aku dianjung ngagai endur bala anak mit ke buta. Dia aku belajar macha jaku Braille. Tang, orang ke gawa dia nagang aku bejaku enggau bala anak mit ke bukai, lalu orang ke sama sekula ngelaungka aku. Aku berasai sunyi amat lalu enda sabar deka pulai ke rumah lebuh bisi chuti ninting taun pengelama 2 bulan. Indai aku amat manah ati sereta siru. Tang sayau amat, indai aku mati lebuh aku beumur 10 taun. Aku amat tusah ati laban lenyau indai ti amat sayauka aku.

Lebuh aku beumur 11 taun, aku pulai ke kampung lalu diau enggau menyadi tiri sereta sida sebilik. Sida nyaga utai ti diguna tubuh aku, tang nadai orang ulih nulung aku ba emosi. Bisi maya iya, aku besebana ngagai Petara: “Nama kebuah indai aku mati? Nama kebuah aku buta?” Orang madah tu meh peneka Petara. Nya alai, aku nyimpulka Petara nya enda lurus sereta jai. Aku deka munuh diri.

Ketegal aku buta, aku nyadi mansa ba fizikal enggau emosi. Aku kala dipasung beberapa kali maya agi mit. Tang aku nadai madah ngagai orang bukai—laban ngumbai orang enda bedulika aku. Orang jarang bejaku enggau aku, lalu aku mega enda berandau enggau sapa-sapa. Ketegal nya, aku napi depression tauka kemurungan, lalu aku enda pechayaka orang bukai. Nya alai, aku ngenyauhka diri ari orang bukai.

Maya aku beumur 13 taun, sepasang laki bini Saksi-Saksi Jehovah betemu enggau aku maya rehat ba sekula. Seiku cikgu sinu ke aku lalu mai Saksi nya betemu enggau aku. Sida bejaku pasal semaya Bup Kudus ke madahka orang mati deka idup baru, lalu orang buta deka meda baru. (Isaiah 35:5; John 5:28, 29) Aku rindu ninga semua utai tu, tang aku tusah deka bejaku enggau sida laban aku enda biasa bejaku. Taja pan aku ngenyauhka diri, tang sida amat manah ati sereta sabar. Sida selalu ngelawa aku ngambika ulih ngajar aku Bup Kudus. Sida bejalai penyauh 10 km meraka gunung ngambika ulih datai ngagai endur aku.

Menyadi tiri madah ke aku sepasang laki bini nya selalu ngena gari ti kemas tang sida ukai orang ti kaya. Tang sida selalu ngayanka pengibuh lalu mai hadiah ti mit ke aku. Semina orang Kristian ti bendar aja ke deka ngereja mayuh utai ngambika ulih nulung orang bukai.

Aku belajar Bup Kudus ngena litaricha dalam jaku Braille. Aku mereti utai ti dipelajar tang bisi sekeda nya tusah deka diterima. Ambika chunto, aku enda pechaya Petara sereta orang bukai amat ibuhka aku. Aku nemu kebuah Jehovah nejuka penyai nyadi tang aku enda ulih ngambarka Iya nya seiku Apai ti bisi pengerindu. *

Tang nyau kelama, Bup Kudus ngubah runding aku. Ambika chunto, aku belajar pasal Petara ke amat sinuka sida ti merinsa. Lebuh nembiak Iya diperinsa, Petara madahka: “Aku udah meda pemedis bala nembiak Aku diperinsa . . . Aku nemu pemalat sida kena perinsa.” (Pemansut 3:7) Aku berengkah mereti sereta rinduka kualiti manah ke dikembuan Jehovah. Ketegal nya, aku nyerahka diri ngagai Petara lalu dibaptisa ba taun 1998.

Kira setaun pengudah aku dibaptisa, aku enggau siti kursus ke orang buta semak Escuintla. Seiku tuai gempuru ari eklisia dia nemu penanggul ke ditapi aku ngambika ulih datai begempuru. Kena mupuk ngagai eklisia ti pemadu semak, aku patut meraka gunung lalu pejalai nya amat tusah. Nyadi, tuai gempuru nya berandau enggau siti ruang bilik Saksi ba Escuintla ke deka mantu. Sida mai aku diau enggau sida sereta begulai datai begempuru. Nyentukka diatu, sida agi nyaga aku lalu ngumbai aku seiku ari sida sebilik.

Mayuh bala menyadi ke bukai mega ngayanka pengerindu ti bendar ngagai aku. Semua peneleba tu ngasuh aku andal Saksi-Saksi Jehovah nya meh orang Kristian ti bendar.—John 13:34, 35.

Aku enda agi ngasaika diri nadai guna. Diatu pengidup aku bisi reti lalu aku bisi utai ti manah ke dianti aku jemah ila. Ketegal aku seiku ari Saksi Jehovah ke gawa penuh jam ngajar orang Bup Kudus, aku enda agi betumpu ba penimpang ke dikemisi aku. Tang, aku betumpu ba pengawa ngajar orang pasal pemendar ari Bup Kudus. Aku mega bisi peluang nyadi tuai gempuru sereta meri cheramah ba eklisia bukai di endur tu. Aku indah bisi peluang ngenataika cheramah ngagai beribu iku orang maya konvensyen.

Ba taun 2010, aku tembu belajar ari Ministerial Training School (diatu dikumbai Sekula Penginjil Perintah Petara) ke dipejalaika ba El Salvador. Sekula tu nulung aku bejalaika pengawa ba eklisia enggau manah agi. Ketegal Petara Jehovah ulih ngena sapa-sapa aja bejalaika pengawa Iya, latih tu ngasuh aku nemu Jehovah udah amat nerima sereta rinduka aku.

Jesus madahka: “Gaga ati agi sida ke meri, ari sida ke nerima.” (Surat Kereja Rasul 20:35, NWT) Diatu, aku amat gaga ati. Aku enda nyangka diri ulih nulung orang bukai tang diatu aku andal aku ulih ngereja nya.