PELAJAR 37

Kati Aku Patut Dibaptisa?

Tanda betul tauka salah utai ke disebut ba baruh:

Orang Kristian patut dibaptisa.

□ Betul

□ Salah

Tuju nuan dibaptisa, ngambika nuan ulih dijaga ari dosa.

□ Betul

□ Salah

Baptisa muka peluang ngambika nuan diselamatka.

□ Betul

□ Salah

Enti nuan bedau dibaptisa, nuan enda ibuh betanggungjawap ke Petara enggau penyalah ke digaga nuan.

□ Betul

□ Salah

Enti bala kaban nuan deka dibaptisa, reti iya nuan mega besedia dibaptisa.

□ Betul

□ Salah

KATI nuan idup nitihka ajar Bup Kudus, rapat enggau Petara, sereta bekunsika utai ke dipechayaka nuan enggau orang bukai? Enti au, nuan engka benung berunding pasal dibaptisa. Baka ni nuan nemu, sekalika nuan udah sedia tauka bedau? Kena nemu saut tu, aram kitai meda saut ke tanya ba atas tadi.

● Orang Kristian patut dibaptisa.

Betul. Jesus madahka, orang ke nitihka iya patut dibaptisa. (Matthew 28:19, 20) Indah, Jesus empu pan dibaptisa. Enti nuan deka nitihka Jesus, sereta udah nemu ngaga pemutus kediri empu, nuan patut dibaptisa.

● Tuju nuan dibaptisa, ngambika nuan ulih dijaga ari dosa.

Salah. Baptisa, tanda ke ditunjukka nuan ngagai semua orang, nuan udah nyerahka diri ngagai Jehovah. Tang tu enda ulih nagang nuan ari ngereja dosa. Nuan deka nyerahka diri ngagai Jehovah, laban nuan deka idup sejalai enggau peneka Iya.

● Baptisa muka peluang ngambika nuan diselamatka.

Betul. Dalam Bup Kudus bisi ngajar, kitai patut dibaptisa ngambika ulih diselamat. (1 Peter 3:21) Taja pia, baptisa enda ulih nyamin nuan tentu deka selamat. Nuan patut dibaptisa laban nuan rinduka Jehovah, lalu deka nyembah Iya belama iya, ukai ketegal nuan deka selamat aja.—Mark 12:29, 30.

● Enti nuan bedau dibaptisa, nuan enda ibuh betanggungjawap ke Petara enggau penyalah ke digaga nuan.

Salah. James 4:17 madahka, “Enti orang nemu baka ni ngereja utai ti betul, tang iya enda ngereja nya, iya bedosa.” Nya alai, enda ngira nuan udah tauka bedau dibaptisa, nuan patut betanggungjawapka ulah nuan. Enti nuan benung berunding enggau dalam pasal pengidup diri, pinta meh lalau ari apai indai, enggau orang Kristian ke bukai ngambika nuan ulih terus mansang nyentukka dibaptisa.

● Enti bala kaban nuan deka dibaptisa, reti iya nuan mega besedia dibaptisa.

Salah. Pengingin nuan deka dibaptisa, patut datai ari ati nuan empu. (Masmur 110:3) Enti nuan deka dibaptisa, nuan patut nemu nama tanggungjawap diri, lalu besedia megai tanggungjawap nya.—Pengajar 5:4, 5.

Pengidup Nuan Berubah Pengudah Dibaptisa

Baptisa siti singkang ti amat penting ke patut digaga kitai, lalu mai mayuh berekat. Pia mega, baptisa siti tanggungjawap ti besai. Maya nuan nyerahka diri ngagai Jehovah, reti iya nuan besemaya deka nyembah Iya belama iya. Nyadi, nuan patut besedia ngamatka semaya nya.

Kati nuan udah besedia deka nyerahka diri ngagai Petara? Enti au, nuan patut gaga ati ngembuan runding sereta asai ati tu. Nyadi penyembah Jehovah siti peluang ti berega! Arapka nuan ulih nyadi penyembah Jehovah, lalu nyembah Iya enggau pengabis ati sereta runding nuan.—Matthew 22:36, 37.

BA PELAJAR KE NANGKAN

Belajarka chara netapka juluk ati ngambika pengidup nuan bisi tuju.

BATANG AYAT

“Nyerahka tubuh kita nyadi pemeri ti idup, ke kudus, sereta ke diterima Petara. Nya alai, kereja meh pengawa ti tuchi ke Iya enggau pengabis runding kita.”—Rome 12:1.

TIP

Ari bantu apai indai, giga meh bala menyadi ba raban gempuru ke ulih nulung nuan ngaga pemansang ba pengarap.—Surat Kereja Rasul 16:1-3.

KATI NUAN NEMU . . . ?

Baptisa nya “tanda” ti penting ke nunjukka nuan bisi peluang diselamatka.—Esekiel 9:4-6.

PELAN AKU!

Ngambika aku ulih nyapai juluk ati deka dibaptisa, aku deka ngenalamka agi penemu aku ngagai ajar Bup Kudus pasal: ․․․․․

Ba topik tu, aku deka nanya apai indai aku ․․․․․

NAMA RUNDING NUAN?

● Nama kebuah baptisa nya pemutus ti amat penting?

● Nama utai ke engka ngasuh bala nembiak berumban ngaga pemutus deka dibaptisa?

● Nama kebuah sesiku nembiak engka kakang ati deka nyerahka diri lalu dibaptisa?

[Penerang]

“Laban aku udah dibaptisa, aku naka ulih ngaga pemutus ti manah, lalu nyeliahka diri ari milih jalai ti salah.”—Holly

[Kutak/​Gambar]

Tanya ke Suah Ditanya pasal Baptisa

Nama reti dibaptisa? Lebuh nuan diselamka ke dalam ai, tu nunjukka nuan udah ninggalka pendiau tauka chara pengidup nuan ti lama. Pengudah nuan angkat ari ai, tu nunjukka diatu nuan idup nitihka peneka Jehovah.

Nama reti nyerahka diri ngagai Jehovah? Reti iya, nuan enda agi idup nitihka chara diri empu, tang idup ke Petara. Nuan besemaya deka ngemeratka peneka Petara. (Matthew 16:24) Sebedau dibaptisa, nuan patut nyerahka diri ngagai Jehovah nengah sampi.

Nama patut digaga nuan sebedau dibaptisa? Nuan patut idup sejalai enggau ajar Bup Kudus, bekunsika utai ke dipechayaka nuan, lalu ngerapatka kaul enggau Petara nengah sampi sereta belajarka Bup Kudus enggau tetap. Nuan patut nyembah Jehovah enggau ati ti deka, tang ukai ketegal dipejal.

Kati nuan patut dibaptisa ba sesiti umur? Enda. Ke pemadu penting nya, nuan udah chukup nemu berunding, lalu faham reti nyerahka diri enggau dibaptisa.

Baka ni enti nuan deka dibaptisa, tang apai indai ngasuh nuan nganti? Engka sida deka nuan ngulihka mayuh agi pengalaman ba orang Kristian. Beterima kasih meh ke lalau sida, lalu kena meh awak tu ngerapatka kaul nuan enggau Jehovah.—1 Samuel 2:26.

[Kutak]

Keretas kereja

Kati Nuan Deka Dibaptisa?

Peresa meh pemansang nuan empu ari nyaut tanya ba baruh. Sebedau nyaut, bacha meh ayat Bup Kudus ke bisi dia.

Baka ni nuan nunjukka diri benung bepanggai ba Jehovah?—Masmur 71:5. ․․․․․

Baka ni nuan nunjukka diri udah nemu berunding sereta nemu bida entara utai ti berul enggau utai ti salah?—Hebrew 5:14. ․․․․․

Berapa penyuah nuan besampi? ․․․․․

Kati sampi nuan nyemetak lalu ngayanka pengerindu nuan ngagai Jehovah? Terangka.—Masmur 17:6. ․․․․․

Tuliska juluk ati ke deka dijapai nuan dalam sampi. ․․․․․

Ni penyuah nuan belajarka Bup Kudus kediri empu?—Josua 1:8. ․․․․․

Nama utai ke dikena nuan maya belajarka Bup Kudus kediri empu? ․․․․․

Tuliska juluk ati ke deka dijapai nuan pasal belajarka Bup Kudus kediri empu. ․․․․․

Kati nuan bebendar ba pengawa nginjil? (Chunto iya: Ulih nuan nerangka batang ajar Bup Kudus? Kati nuan bisi ngaga datai ngabas? Kati nuan bisi usaha deka ngepunka belajarka Bup Kudus?)

□ Au □ Enda

Taja apai indai nuan enda pansut nginjil, kati nuan agi pansut nginjil?—Surat Kereja Rasul 5:42.

□ Au □ Enda

Tuliska juluk ati ke deka dijapai nuan ba pengawa nginjil.—2 Timoti 2:15. ․․․․․

Ni penyuah nuan datai begempuru? Kati nya ulih disebut tetap tauka kekadang?—Hebrew 10:25. ․․․․․

Baka ni nuan nunjukka diri bisi ngambi begian ba gempuru? ․․․․․

Enti apai indai nuan enda datai begempuru, kati nuan bisi usaha datai (enti sida udah ngemendarka nuan datai)?

□ Au □ Enda

Kati nuan amat rindu ngereja peneka Petara?—Masmur 40:8.

□ Au □ Enda

Padahka siti chunto, chara nuan udah mujur ngelaban tekanan ari orang ke serambau?—Rome 12:2. ․․․․․

Nama deka digaga nuan kena nentuka pengerindu nuan ngagai Jehovah mengkang kering?—Jude 20, 21. ․․․․․

Enti apai indai enggau bala kaban nuan ngetu nyembah Jehovah, kati nuan deka terus nyembah Iya?—Matthew 10:36, 37.

□ Au □ Enda

[Gambar]

Baka orang ke kawin, baptisa mega siti singkang ti ulih ngubah pengidup kitai. Nya alai, anang ngumbai tu pekara biasa aja.