BUP KUDUS ti asal ngena leka jaku Hebrew sheʼohlʹ enggau leka jaku Gerika haiʹdes lebih ari 70 kali. Sheʼohlʹ enggau haiʹdes bekaul enggau pemati. Sekeda Bup Kudus nyalin jaku tu ngena “kubur,” “dunya pemati,” “pendam” tauka “neraka.” Tang, mayuh Bup Kudus enda nyalin reti jaku tu nitihka leka jaku Hebrew sereta Gerika enggau betul. Nama reti sheʼohlʹ enggau haiʹdes? Aram kitai meda baka ni leka jaku tu dikena dalam Bup Kudus.

Pengajar 9:10 madah: “Di dunya pemati [sheʼohlʹ] ila endang nadai pengawa, nadai runding, nadai penemu, nadai penemu-dalam. Kia ke meh nuan deka mupuk.” Kati Sheol tu siti lubang kubur endur nguburka orang ti dikesayau kitai? Ukai. Maya Bup Kudus nyebut siti-siti kubur, iya ngena leka jaku Hebrew enggau Gerika ti bukai, ukai sheʼohlʹ enggau haiʹdes. (Pemungkal 23:7-9; Matthew 28:1) Pia mega, Bup Kudus enda ngena “Sheol” nunjukka pendam endur nguburka bala mayuh.—Pemungkal 49:30, 31.

“Sheol” nunjukka endur ti baka ni? Jaku Petara madahka “Sheol” tauka “Hades,” ukai semina pendam aja. Chunto, Isaiah 5:14 madahka Sheol [dunya pemati, nitihka BKB] “merangapka nyawa iya.” Taja pan Sheol udah “nelan” mayuh orang, tang iya mengkang “lapar,” seruran nerima orang mati. (Jaku Dalam 30:15, 16) Enda baka pendam ti ulih penuh endur nguburka orang mati, “Sheol [dunya pemati], endang nadai sekat.” (Jaku Dalam 27:20) Sheol tauka Hades nya ukai ba siti-siti endur. Tang, iya nunjukka semua endur mensia mati.

Ajar Bup Kudus pasal orang mati diidupka baru nulung kitai bulih penemu ti mayuh agi pasal “Sheol” enggau “Hades.” Jaku Petara madahka Sheol enggau Hades bisi kaul enggau orang mati ke bisi peluang deka diidupka  baru. * (Jop 14:13; Kereja Rasul 2:31; Pemandang 20:13) Iya mega nunjukka orang ke mati ba Sheol tauka Hades, nyengkaum orang ke nyembah Jehovah enggau orang ke enda nyembah Iya. (Pemungkal 37:35; Masmur 55:15) Nya alai, Bup Kudus ngajar “semua orang ke lurus enggau ke enda lurus deka diangkatka ari mati.”—Kereja Rasul 24:15.