Bisi nuan meda orang ba gambar tu?— Sida iya Matthew, Mark, Luke, John, Peter, James, Jude, enggau Paul. Semua sida iya idup sama jeman enggau Jesus, lalu sida nulis pasal Jesus. Aram belajar pasal sida iya.

Tiga iku ari sida iya rasul ke sama nginjil enggau Jesus. Sapa tiga iku nya?​— Matthew, John, enggau Peter. Rasul Matthew seduai John ngelala Jesus enggau manah, lalu genap iku seduai iya nulis siti bup pasal  pengidup Jesus. Rasul John mega nulis siti bup ti dikumbai Pemandang enggau tiga iti surat ti dikumbai 1 John, 2 John enggau 3 John. Rasul Peter nulis dua iti surat ti dikumbai 1 Peter enggau 2 Peter dalam Bup Kudus. Ba 2 Peter, iya nulis pasal Jehovah ke bejaku ari serega ke ngumbai Jesus nya: ‘Tu anak aku. Aku sayauka iya, lalu iya ngasuh Aku gaga ati.’

Orang ke bukai ba gambar tu mega ngajar kitai pasal Jesus dalam bup ti ditulis sida. Seiku ari sida nya Mark. Iya engka bisi ba endur Jesus ditangkap, lalu meda semua utai ke nyadi. Seiku agi Luke. Iya seiku lutur, lalu iya engka nyadi orang Kristian pengudah Jesus mati.

Dua iku agi penulis Bup Kudus ke bisi ba gambar tu, iya nya menyadi Jesus. Nemu nuan sapa nama seduai iya?​— Seduai iya James enggau Jude. Keterubah, seduai iya enda pechayaka Jesus. Seduai iya mega ngumbai Jesus gila. Tang udah nya, seduai iya pechayaka Jesus, lalu nyadi orang Kristian.

Penulis Bup Kudus ke penudi ba gambar tu, Paul. Sebedau iya nyadi orang Kristian, nama iya Saul. Iya begedika orang Kristian sereta jai enggau sida iya. Nemu nuan nama kebuah Paul deka nyadi orang Kristian?— Bisi sekali, benung Paul bejalai ke Damaskus, iya ninga nyawa orang bejaku enggau iya ari serega. Nya Jesus! Iya nanya Paul: ‘Nama kebuah nuan jai amat enggau orang ke pechayaka aku?’ Udah nya, Paul nyadi orang Kristian. Paul nulis 14 iti bup dalam Bup Kudus, ari bup Rome ngagai bup Hebrew.

Kitai macha Bup Kudus ninting hari. Ari macha Bup Kudus, kitai belajar mayuh utai pasal Jesus. Deka nuan belajar mayuh agi pasal Jesus?—