1-3. (a) Baka ni asai ati mayuh orang pasal kereja? (b) Nama tanya ti deka dikerandauka ba pelajar tu?

 SEMUA kitai patut gawa kena ngintu diri sebilik. Tang mayuh orang enda rinduka kereja sida. Enti nuan ngasaika baka tu, nama ulih digaga nuan ngambika bisi runding ti betul pasal kereja? Baka ni nuan ulih gawa enggau lantang ati?

² Jehovah madah: ‘Semua kitai patut makai, ngirup lalu ngelantangka diri ngena utai ti udah ulih kitai, laban semua utai nya endang pemeri ari Petara magang.’ (Pengajar 3:13) Jehovah ngaga kitai enggau pengingin ti deka kereja. Iya deka kitai lantang ati enggau kereja kitai.—Bacha Pengajar 2:24; 5:18.

³ Nyadi, baka ni kitai ulih gawa enggau lantang ati? Nama bansa pengawa ti patut diseliahka orang Kristian? Baka ni kitai ulih magi jam entara kereja enggau sembah ke Jehovah? Nama pengawa ti pemadu beguna ba kitai?

4, 5. Nama runding Jehovah pasal kereja?

⁴ Jehovah rindu bekereja. Pemungkal 1:1 madahka: ‘Ba pun iya kelia, Petara berengkah ngaga langit enggau dunya.’ Pengudah Jehovah ngaga dunya sereta semua utai bukai, Iya ngumbai semua nya “manah magang.”—Pemungkal 1:31.

⁵ Jehovah enda kala ngetu gawa. Jesus madah: ‘Apai aku seruran gawa.’ (John 5:17) Nama sekeda pengawa ti benung digaga Jehovah? Iya benung milih orang merintah enggau Anak Iya, Jesus, ba serega. (2 Korint 5:17) Jehovah mega benung nyaga mensia sereta ngiring pengawa nginjil ba serata dunya. Asil iya, bejuta iku orang ulih ngelala Jehovah sereta bisi peluang idup belama iya ba dunya Paradais.—John 6:44; Rome 6:23.

6, 7. Nama runding Jesus pasal kereja?

⁶ Baka Apai iya, Jesus rindu bekereja. Sebedau datai ke dunya, Jesus pekereja “ke landik” ti nulung Jehovah ngaga semua utai ba dunya sereta ba serega. (Jaku Dalam 8:22-31; Kolosi 1:15-17) Lebuh ba dunya, Jesus terus bekereja enggau bagas. Iya belajar nyadi tukang kayu, engka ngaga rumah sereta perengka rumah. Ketegal iya landik ba pengawa iya, iya seiku “tukang kayu” ti tampak nama ba menua iya empu.—Mark 6:3.

⁷ Tang ba Jesus, pengawa ti pemadu beguna nya nusui berita manah sereta ngajar orang pasal Jehovah. Pengelama tiga taun setengah, iya bebendar nginjil ari tumu pagi nyentukka malam. (Luke 21: 37, 38; John 3:2) Jesus bejalai jauh nengah jalai ti bedebu ngambika mayuh orang ulih ninga berita manah.—Luke 8:1.

8, 9. Nama kebuah Jesus rindu enggau pengawa iya?

⁸ Ba Jesus, ngereja pengawa Petara baka pemakai. Pengawa tu meri iya pengering. Kekadang, Jesus bebendar gawa nyentukka nadai awak makai. (John 4:31-38) Iya ngena semua peluang ngajar orang pasal Apai iya. Nya alai, iya ulih madah ngagai Jehovah: ‘Aku udah ngemuliaka Nuan di dunya tu, laban aku udah nembuka pengawa ti diasuh Nuan kereja aku.’—John 17:4.

⁹ Endang terang, Jehovah enggau Jesus bagas gawa, lalu berasai lantang sereta puas ati enggau pengawa seduai iya. Kitai deka ‘nunda teladan Petara’ sereta “nitihka singkang” Jesus. (Epesus 5:1; 1 Peter 2:21) Nya kebuah kitai ngereja semua pengawa kitai enggau naka ulih.

10, 11. Nama ulih nulung kitai bisi runding ti betul pasal kereja?

¹⁰ Nembiak Jehovah bagas gawa kena ngintu diri sebilik. Kitai deka gawa enggau lantang ati, tang tu enda senang. Nyadi, nama ulih digaga enti kitai enda rinduka kereja kitai?

¹¹ Bisi runding ti betul. Kitai ulih bisi runding ti betul enti kitai nemu runding Jehovah pasal kereja. Ambika chunto, Jehovah deka tuai bilik nyediaka utai ti diguna diri sebilik enggau naka ulih. Bup Kudus madah orang ke enda ngereja nya, “jai agi  ari orang ke enda arap.” (1 Timoti 5:8) Enti nuan seiku tuai bilik, nuan tentu bagas gawa kena ngintu diri sebilik. Enda ngira nuan rindu kereja nuan tauka enda, pechaya meh Jehovah gaga ati lebuh nuan nyediaka utai ti diguna diri sebilik.

12. Nama penguntung enti kitai gawa enggau bagas sereta lurus?

¹² Gawa enggau bagas sereta lurus. Enti kitai bagas sereta lurus, kitai deka rindu agi gawa. (Jaku Dalam 12:24; 22:29) Nama kebuah? Tuke senang agi arapka nuan laban nuan enda ngenchuri duit, barang tauka ngular maya gawa. (Epesus 4:28) Keberat agi, Jehovah meda lebuh nuan gawa enggau bagas sereta lurus. Nuan deka bisi ‘ati ti beresi’ laban nemu diri udah ngelantangka ati Petara.—Hebrew 13:18; Kolosi 3:22.

13. Nama asil iya enti kitai bisi ulah ti manah ba endur gawa?

¹³ Ulah manah kitai ba endur gawa ulih ngemuliaka Jehovah. Tu siti agi kebuah ti meransang kitai rindu gawa. (Titus 2:9, 10) Ulah kitai ti manah engka ulih narit ati orang ke sama gawa belajarka Bup Kudus.—Bacha Jaku Dalam 27:11; 1 Peter 2:12.

14-16. Nama tanya ti patut diperundingka maya milih kereja?

¹⁴ Bup Kudus nadai meri lis pasal kereja ke ulih tauka enda ulih digaga. Tang Bup Kudus bisi meri jaku lalau ti ulih nulung kitai milih kereja enggau manah. (Jaku Dalam 2:6) Kena ngereja nya, bisi dua iti tanya ke patut diperundingka kitai.

 ¹⁵ Kati kereja tu ngasuh aku ngereja utai ti dipegedika Jehovah? Jehovah begedika ulah ti jai, baka ngenchuri enggau bula. (Pemansut 20:4; Kereja Rasul 15:29; Epesus 4:28; Pemandang 21:8) Nya alai, kitai patut bejimat lalu enda nerima kereja ti ngelaban standard Jehovah.—Bacha 1 John 5:3.

 ¹⁶ Kati kereja tu nyukung tauka meransang ulah ti dipegedika Jehovah? Ambika chunto, baka ni enti nuan bulih kereja nyadi kerani ba kedai nyual lumur? Kereja kerani enda salah. Tang nuan udah belajar Jehovah begedika ulah ti amu baka bejudi. Taja pan nuan enda enggau meli lumur, tang baka ni asai ati nuan gawa ba endur ke meransang ulah ti dipegedika Jehovah?—1 Korint 6:10; 1 Timoti 3:8.

17. Nama ulih nulung kitai ngaga pemutus ti ngerinduka ati Jehovah?

¹⁷ Enti kitai ngaga pemutus nitihka jaku lalau Bup Kudus, kitai nyadi orang ke “matihka diri ngelala bida entara utai ti badas enggau utai ti jai.” (Hebrew 5:14) Tanya diri empu: ‘Kati bisi orang enda nyamai ati enti aku nerima kereja tu? Kati kereja tu ngasuh aku jauh ari kaling pengidup enggau anak? Nama deka nyadi ngagai sida?’

18. Nama kebuah enda senang deka terus ngenuluka sembah ngagai Jehovah?

¹⁸ Kitai benung idup maya “mayuh macham penusah deka nyadi.” Ketegal nya, kitai engka tusah deka ngenuluka sembah ngagai Jehovah. (2 Timoti 3:1) Kemayaharitu, tusah deka ngiga kereja. Taja pan kitai patut gawa kena ngintu diri sebilik, tang kitai deka terus ngemeratka sembah ngagai Jehovah. Kitai enggai kelalu berunding pasal duit. (1 Timoti 6:9, 10) Nya alai, baka ni kitai “nemu milih  utai ti pemadu badas” lalu ba maya ti sama nyediaka utai ti diguna diri sebilik?—Pilipi 1:10.

19. Baka ni bepanggai ba Jehovah ulih nulung kitai enda kelalu irau pasal kereja?

¹⁹ Bepanggai ba Jehovah enggau pengabis ati. (Bacha Jaku Dalam 3:5, 6.) Jehovah amat ibuhka kitai, lalu Iya nemu utai ti diguna kitai. (Masmur 37:25; 1 Peter 5:7) Bup Kudus madah: ‘Anang angkunka duit. Kita patut nemu puas ati ke utai ti dikemisi kita, laban Petara udah nyebut, “Aku enggai sekali-kali ninggalka kita, tauka ngelengkaka kita.”’ (Hebrew 13:5) Jehovah enggai kitai kelalu irau pasal utai ti diguna diri sebilik. Iya udah meri mayuh bukti ti nunjukka Iya ulih meri utai ti diguna bala nembiak Iya. (Matthew 6:25-32) Nya alai, enda ngira nama kereja kitai, terus meh belajarka Bup Kudus, nginjil sereta datai gempuru.—Matthew 24:14; Hebrew 10:24, 25.

20. Baka ni kitai ulih idup enggau pengumbas iya?

²⁰ Beberatka peneka Jehovah. (Bacha Matthew 6:22, 23.) Kitai patut idup enggau pengumbas iya ngambika ulih terus nyembah Jehovah. Kaul kitai enggau Jehovah amat berega. Kitai enggai kaul nya rusak ketegal dilimpangka duit, gaya pengidup ti senang tauka perengka elektronik ti pemadu baru. Nyadi, nama ulih nulung kitai ngemeratka peneka Jehovah? Anang sekali-kali berutang! Tang enti nuan bisi utang, bayar meh utang nya enggau lengkas. Anang bebelika utai ti begunaka mayuh jam kena ngintu iya. Tu tau ngujungka kitai nadai  awak besampi, belajarka Bup Kudus sereta nginjil. Kitai patut puas ati enti kitai bisi “pemakai enggau gari.” (1 Timoti 6:8) Enda ngira gaya pengidup nuan, kekadang peresa meh diri empu sekalika ulih gawa ke Jehovah enggau mayuh agi.

21. Nama kebuah kitai patut nentuka utai ti pemadu beguna ba pengidup kitai?

²¹ Tentuka utai ti pemadu beguna. Kitai patut ngena jam, pengering sereta reta tengkira kitai  enggau bejimat. Enti enda, kitai deka masau jam ba utai ti enda entu beguna baka pelajar tauka duit. Jesus madah: ‘Giga dulu Perintah Petara.’ (Matthew 6:33) Juluk ati kitai, pemutus ke digaga sereta utai ti digaga ninting hari nunjukka utai ti pemadu beguna ba kitai.

22, 23. (a) Nama pengawa ti pemadu beguna ba orang Kristian? (b) Nama ulih nulung kitai gawa enggau lantang ati?

²² Pengawa ti pemadu beguna iya nya nyembah Jehovah. Siti chara kitai ngereja nya nengah pengawa nginjil. (Matthew 24:14; 28:19, 20) Baka Jesus, kitai deka bebendar ngereja pengawa tu. Sekeda menyadi Kristian pindah ngagai endur ti begunaka penginjil. Sekeda belajar bansa jaku baru ngambika ulih nginjil ngagai orang ke ngena jaku nya. Nuan ulih berandau enggau bala menyadi ti udah ngereja semua tu. Sida tentu madahka pengidup sida lantang agi sereta ngemuaska ati.—Bacha Jaku Dalam 10:22.

²³ Kemayaharitu, mayuh ari kitai gawa enggau naka ulih kena nyediaka utai ti diguna diri sebilik. Jehovah meda pengawa kitai, lalu Iya lantang ati meda kitai bebendar ngintu diri sebilik. Nya alai, enda ngira nama kereja kitai, aram meh kitai bagas gawa baka Jehovah enggau Jesus. Kingatka, pengawa ti pemadu beguna iya nya nyembah Jehovah. Enti kitai ngenuluka pengawa nginjil, tu deka mai pengelantang ti bendar!